Joyful dessert house

食完火鍋，去咗轉角果間甜品店食甜品，因為好友想整個蛋糕食下，其實所謂嘅蛋糕，佢係用三份拿破崙餅拼埋一齊，就成個蛋糕咁嘅樣，我哋有吹蠟燭，不過就冇唱生日歌，因為甜品店地方好細，亦都坐滿晒客，佢地咁有心我已經好開心，呢班朋友識咗咁耐，一年只係出嚟食幾次飯，都係有人生日先出嚟，我就覺得除咗生日之外，都可以出嚟食飯，因為我地四個人嘅生日分別在一月、四月、十月同埋十二月，所以四月至10月之間好少出來， 12月至四月又出得嚟好密D，所以大家都約定下次在四月至十月之間都要約出來食飯！

火鍋撚

每年生日，呢班好友都會係最早約我食飯好友，真係好有心，一早約咗今晚去打邊爐，呢間火鍋店之前去過中環嘅分店，旺角呢間都去過但係冇位，今次因為訂咗枱所以有位，呢度地方其實幾細，所以好快就爆場，如果唔訂枱真係有排等！大家都好準時去到，我哋叫咗牛肉、脆肉鯇魚片、水餃、雲吞、響鈴等等，食物嘅質素唔錯嘅，湯底嘅味道亦都好好，每次我哋食飯都會講旅行嘅話題，不過今次冇講，亦都冇講任何政治話題，主要係講番好有D小朋友，今次佢地冇買蛋糕，因為佢哋訂咗張枱在附近食甜品！食完火鍋呢度都會送個甜品，係腐竹糖水沙冰，味道就好腐竹糖水，略為甜咗D ！

黑魔后 2 Maleficent 2

公主想同王子結婚，黑魔后雖然唔想，最後都同意，當佢出席王子父母嘅邀請到皇宮晚餐，受到皇后的挑釁，令她一怒之下離開，原來皇后暗中部署連串行動，要剷除黑魔后......!

在尖沙咀食完野，行咗一陣街，跟住出咗旺角，因為約咗另一班好友食晚飯但係未夠鐘，所以去睇返場戲先，時間剛剛好就睇呢套黑魔后，之前睇咗第一集，覺得幾好睇，呢一集都好睇，雖然劇情係意料之內，不過都拍得好睇！

The Tiffany Blue Box cafe HK

最近Tiffany 在尖沙咀開左間餐廳，當然要去試吓啦，佢只可以網上訂位，所以就上網訂，佢係要經過一個叫做 Chope 網站預約，約咗今日嘅上午，因為約唔到下午，但係去到發現有好多位，其實唔需要訂位 walk in 都有位！

餐廳嘅面積唔大，大約三十個位左右，不過佢仲有另一邊，我諗要呢邊坐滿晒先至會開果邊，餐具係佢也果隻Tiffany Blue顏色拼白色，唔算得係好靚，不過係佢哋自己品牌嘅餐具，但不鏽鋼類嘅餐具就唔係佢地牌子！

因為係早上嘅時間，餐牌只有早餐，我地揀咗一個 Signature Blue box toast ，同埋海鹽糖脆花生醬 pancake ，先來一個well come drink，酒杯上面有一個藍色嘅棉花糖，然後倒入梳打水，杯飲品變咗藍色，甜甜地又有少少氣都幾得意，我地另外叫咗兩杯咖啡，食物份量都幾大，平時早餐好少食得咁豐富，所以食得非常之飽，我地方訂左蛋糕，但係蛋糕要12點後先至可以供應，所以我地都要坐到12點幾先食蛋糕，其實都好飽，不過都可以食少少，然後打包！餐廳食物味道唔算特別好，只係一般，蛋糕亦都未如理想！味道一般賣相亦都唔係好靚，老實說呢度主要係為咗打卡、影相，見到人地食午餐好似幾好，但係我哋早餐食得太飽而且仲有蛋糕，所以冇可能再食午餐，下次如果去開呢度可以試吓佢個午餐或者下午茶，不過唔好對食物質素有太大期望！

食得喜小廚

相約好友去荃灣食飯，主要係攞手信俾好友，因為好友都過兩日要飛，所以想比左佢先，呢間小店在商場嘅地庫，係比較舊嘅一個商場，店舖地方唔大，店外面商場嘅地方都擺咗幾張枱，主要係食小菜，我哋都係坐出面，我哋叫咗碟煎黃花魚，本來好友想食筍殼魚，不過今晚賣晒，條黃花魚都煎得好靚，另外再叫咗個蒜蓉炒白菜，同埋粉絲蝦煲，我地得兩條友，所以唔叫咁多嘢食，驚食唔晒，不過食完都啱啱好，食物質素唔錯，價錢算平，都幾抵食，下次可以再嚟食！

三聖邨

踏入10月，就係頻密嘅生日飯局，一個月前已經約好咗今晚去食飯，上次已經講咗要去屯門三聖邨食海鮮，我地有幾個都係第一次去，今晚因為得一架車，所以有兩個要搭巴士，我同好友 T 相約一齊搭巴士入去，大家差唔多時間到達，首先去海鮮檔度睇海鮮，去咗一間叫做發記嘅海鮮檔，海鮮嘅選擇好多，都唔知點揀，等人齊之後先至再揀，我地揀咗一條象拔蚌、龍蝦、賴尿蝦、東風螺、蟶子、蜆，一共買咗二千幾蚊，買完海鮮就攞去附近嘅食店度加工，我地震揀咗一間叫做興記，睇睇佢餐牌，來料加工以每斤計，每斤係$72 ，我地嘅海鮮加埋11斤，另外在叫咗半隻燒鵝，同埋炒左碟豆苗，龍蝦我地叫佢做咗芝士龍蝦伊麵，所以好快就好飽！仲有蛋糕食，好多謝好友們每次在我生日的時候都係食一餐貴野，搞到我都唔係幾好意思！

今晚大家都傾到食大閘蟹，已經講緊下次去是但一個屋企到食，不過好似唔係個個都鍾意食大閘蟹，所以到時再睇下幾多個食！其實每次我哋出嚟都講下次食乜嘢，個食店嘅清單都好長，除咗大閘蟹仲有火鍋店同埋BBQ，所以我地話唔使有人生日都出嚟食飯先至食得晒！

多賀野

飲完喜茶，坐咗一陣，開始肚餓，就去搵嘢食，聽講呢度有間拉麵店好多人食，所以去會一會佢，去到門口見到排隊，大概有十幾人，咁我哋排隊一路傾計D時間都好快過，而且人流都郁得好快，始終拉麵好多人係食完就走，所以都唔係等左好耐就已經可以有位，拉麵嘅選擇唔係好多， 湯麵有四款， 沾麵亦都有幾款，但係頭先飲完凍喜茶覺得有D凍，所以就食湯麵，我哋叫咗一碗醬油拉麵同兩碗鹽味拉麵，個湯味道都唔錯，不過D麵我覺得佢太淋，味道亦都係比較淡，另外亦都叫咗一客餃子，味道就OK，不過唔係好夠肉汁，其實今日係好友 F 嘅生日，可惜今日市面情況唔係咁理想，如果唔係大家會同佢一齊食晚飯，因為大家都想天黑之前返屋企，驚今晚冇車走，所以食完麵我地都去搭巴士走喇！

Heytea Lab 喜茶

尋日嘅社會活動搞到好大，今日有史以來第一次所有地鐵站都唔開！本來今日約咗好友 F去中環食brunch，但係餐廳話好多人取消咗訂枱，所以佢哋都取消咗個 brunch，其實今日相對係比較寧靜，可能尋日大家都搞得太夜，而且好多公司同埋商場都唔開門，好多人都唔出街，因為出街都冇地鐵搭，只有巴士小巴同埋的士，既然去唔到中環就約好友轉去尖沙咀 K11 Musea ，上網睇到商場冇出到停業通知，所以就出去睇吓，搭巴士嘅時間長過搭地鐵好多，去到見到個商場都有開，不過入面好多鋪頭都冇開，尤其是買化妝品之類嘅店舖，真係全部唔開咁滯，只有食肆有開，我地到咗商場之後，要等另一好友 J 到來會合，所以去咗呢間喜茶飲杯嘢先，呢度個 view 好靚，正正係望住尖東海旁，加上今日天氣好好，不過就有D曬，我地坐個位置係冇太陽曬住，先去買飲品，呢度飲品除咗茶類之外，亦都有一個吧專係賣雞尾酒，不過日光日白無人幫襯，就算買茶類都唔長龍，買完飲品，我地坐低一路傾計一路飲，都坐左好耐，因為好友 J 剛從東京回來，我就剛從北海道回來， 而好友 F 就過兩星期去東京，我地大家都好鍾意去日本玩，希望可以快D一齊去！我地分別叫咗一杯芝芝芒芒、芝芝桃桃、芋泥波波，都係第一次幫襯喜茶，上次在深圳見到都冇幫襯過，上次來K11 Musea 都見到亦都冇幫襯，茶類飲品味道都唔錯，環境都好舒適，不過我諗正常假日應該爆曬棚，難得今日咁休閒大家坐低飲嘢，感覺都好舒服！