Urban coffee roaster by Galleon

去完花卉展覽又去飲杯野，行咗去百德新街果邊，見到有間賣傢俬嘅店舖，入邊有呢間coffee shop，又入去試吓囉！

呢度地方唔係好大，大概有20個位，我地叫咗一個羽衣甘藍沙律，同埋一個溫泉蛋藜麥厚多士，然後叫咗兩杯咖啡，一杯白咖啡同埋一杯 latte ，咖啡拉花都幾靚，同埋呢間野嘅咖啡係幾專業，食物嘅質素都唔錯，都係比較健康嘅選擇，下次可以再來試吓，呢度除咗有咖啡仲有一D相關嘅產品賣，不過選擇就唔係好多！

香港花卉展覽 2019

又到一年一度嘅花卉展覽，先去皇室堡食D嘢，去咗 Dazzling cafe 食飯，然後就即刻入場，今日天色唔係太好，完全冇太陽，而且密雲，不過都係好多人入場，而且大部份係老人家，同時亦都好多學生畫畫，呢幾年嘅佈置主要都係個幾個機構包辦，例如路政署、海洋公園等等，今年入口位係用花砌成嘅一列地鐵車身，後面亦都有火車路軌，同埋仲有個大埔墟站嘅牌，今年嘅主題係大紅花，所以每個佈置都有大紅花，至於其他嘅花同往年都係差不多，當然唔少得最多人嘅鬱金香田啦，不過今年嘅鬱金香就唔係咁靚啦，首先佢全部用橙色嘅鬱金香圍邊，只有少數黃色、紅色、粉紅色放咗喺中間位置，所以好難近距離拍攝，而且D花開得唔係太靚，所以只係影咗好少，感覺今年嘅佈置多咗，好似影景多過影花咁，不過果D佈置都有好多人影，好多是俾人遮住影唔到，或者影出嚟好多人！影左差不多兩小時就走喇！

熊本 やきにく

有兩個好友分別在一月和二月生日，但遲遲約唔到食飯，終於約到今日喇！

去左銅鑼灣食燒肉，呢間燒肉店應該開左冇幾耐，好新淨，大約有廿幾張枱，我地坐大卡位，可以坐六人的卡位，爐上面有塊岩鹽板，在烤肉店比較少見到有岩鹽板供應，呢度係一個價錢任食任飲，有唔同價錢包唔同的牛肉/飲品，我地揀左貴$38的和牛，好友話之前去過送一盤海鮮，今次要 share 佢地先送一鍋海鮮湯！ 

我地主要食刺身同和牛，都有試其他，厚切牛舌唔算厚，味道都可以，豬五花肉好肥，一片有95%係肥膏！牛肉質素都 ok 不過切得好細片，要叫好幾𨍭，海鮮叫左蝦、蠔，D蠔唔係咁新鮮，其他食物一般，同大部分日式放題差不多！

NOC coffee

食完牛扒在附近搵間coffee shop坐一坐，呢間 coffee shop 成日都經過，今次都係第一次去，因為頭先食烤肉嘅時候太大油煙，唔坐得耐，所以轉去飲杯野坐下，呢度只係賣一D簡單嘅食物，有D似 Starbucks 型式，我地叫咗少少嘢食，同埋兩杯咖啡，坐左一陣就走！

Triple steak

最近又興返熱石烤牛扒，其實呢樣唔係新嘢，不過有一排冇見到，最近又出現返，呢間係近日比較熱門嘅一間，最多人果間應該係深水埗分店，我去咗西環呢一間試吓，過咗午飯時間冇乜人，應該係源自日本嘅做法，門口有一部自動販賣機，先在門口購票，然後會有一個感應牌俾你，安排左座位之後，就等佢個牌震動，就可以去攞嘢食，呢度嘅座位大概都有20個，全部都係靠牆坐，只有一兩張在路中間嘅兩人枱，呢度所有嘅牛扒餐都會有任食沙律、湯、白飯、清水，沙律其實只係得椰菜配自選沙律汁，湯只有一款，白飯就任裝，等緊牛扒嘅時候可以攞住沙律、白飯先，呢度嘅牛扒主要分三種，一款係佢招牌牛扒叫做三拍子牛扒，店員話係牛肩位，話肉味比較濃，仲有牛柳同埋西冷，佢有幾個唔同價錢，主要係唔同嘅重量，最少有180g，最多係400g，我地揀咗一個三拍子牛扒，要300g，另外一個要西冷，都係揀300g，三拍子牛扒比較厚身，相對中間較難煎得熟D，西冷就係薄身D，牛扒在熱石上煎住，要快手煎，因為驚佢過熟，煎完就另外放起佢，否則就會過熟，食起上嚟反而覺得西冷好食D，同埋肉味比較濃D，我哋都冇食飯，因為食淨係食牛扒都好飽，食完都匆匆忙忙走喇，因為成間鋪頭都好大油煙！抽氣方面做得麻麻地！

Marvel 隊長 Captain Marvel

Carol 經常與部隊指揮官Yon-Rogg 練習， Carol 失去了記憶，只有一些零碎的片段，而且經常夢見同一個情景，Yon 經常提醒她要控制自己能量，在一次行動中他們到達了土化星，卻遇到史克魯爾人襲擊，Carol 在對抗過程中被擄走，史克魯爾人以記憶讀取裝置，收集她腦中的情報，令 Carol 回想起一些零碎記憶，Carol 逃脫後，乘逃生艙墜至C35星球（地球），並遇見前來調查的神盾局探員Nick，後來 Nick 帶她到美國太空總處及美國海軍所的秘密基地。兩人在檔案庫裡，發現六年前一位機師在試飛中墮機身亡，相中人竟是 Carol ........!

呢套戲主要係講 Captain Marvel 嘅由來，同埋佢嘅能力，同埋佢點樣同神盾局有關連，好多人誤會左呢套係復仇者第四集，其實復仇者第四集要四月先至上畫，所以而家要介紹左 Captain Marvel 先，之後佢會在第四集出現，我估係為免佢突然間出現唔知係乜嘢人物，所以先有呢一套戲介紹佢先，套戲都有少少笑位，不過對白比較多，有幾個位係悶悶地嘅，當然去到最後大打一場，一定有返咁上下睇頭，而且點都要睇咗佢先至可以睇復仇者第四集！

Lab 10

上次去東京買咗一盒檸檬茶包，裏面嘅檸檬係心型既，之前都在 City super 見過新鮮嘅心形檸檬，今次係乾嘅心形檸檬，早上冲返一杯檸檬茶飲下心情都好D！

今晚約咗好友去睇戲！我先去買咗飛先，買完飛去食啲嘢，見到呢間烤肉店，門口個餐牌好似幾吸引，諗緊好唔好今晚食，見有set lunch，就入去試吓啦！

店𥚃面嘅間隔係兩個或者四個一張枱，不過我估佢D間隔可以移動，因為佢係兩個人一個爐，咁間隔可以間開四個人或者六個人都得，比較靈活性！過咗最繁忙嘅午市時間，只有一、兩個客，我叫咗一個牛扒餐，塊牛扒非常之大塊，而且好厚，另外仲有一碗飯上面有紫菜同埋一隻鵪鶉蛋，呢度寫明自從白飯任裝，不過塊牛扒咁大塊，食完都應該飽啦，牛扒送到黎嘅時候，兩面已經係煎過，輕輕煎過表面，我將個牛扒擺落個爐度煎，睇到牛扒𥚃面嘅肉係冇油花，簡單D講好似一舊瘦肉咁，完全冇油花，都可以想像到味道麻麻地，結果真係，首先牛肉本身冇味，由於冇脂肪冇油花所以頗為韌，所以只係食咗少少，不過見到佢價錢咁平都已經有咁大塊牛扒，就知道質素唔會好啦！不過叫做試過就算！