咖啡弄

今晚約咗人食飯，仲有個幾鐘，就同同事去飲杯野，原本想去 Pacific coffee ，跟住見到咖啡弄，咁就梗係去咖啡弄啦， Pacific coffee 幾時都去得，周圍都有分店，咖啡弄就唔係啦！

都有一段時間冇去過，雖然呢度D窩夫都好吸引，不過陣間要去食晚飯，所以都冇叫嘢食，淨係飲嘢，我就叫咗一杯冰滴咖啡，話係每日限量供應，去到黃昏時間都仲有，可能今日都係比較靜，又或者根本冇限量？我地都叫咗唔同嘅咖啡飲，佢地果D都有忌廉，好彩我個杯冇忌廉，如果唔係一定好飽！

九十寿司

睇完戲約咗好友食飯，好友一向好鍾意XO仔，咁啱商場有間時裝店聯成左XO仔，Like 佢個Facebook 就有個小氣球送，就幫好友攞咗個，好友開心到不得了，不過我自己都買咗兩件T恤，雖然我唔特別喜好呢個公仔，不過見佢件T恤個款幾好，所以就買咗！

商場有間新開嘅壽司店，我地就去試下！呢間壽司店話佢地D 米係特別好，所以我地叫左一個用飯做嘅軟殻蟹漢堡，我地又叫咗個壽司 set，同埋一 set 串燒，壽司嘅用料都好新鮮，飯都好味，個軟殻蟹漢堡好好食，串燒就麻麻地喇！呢間店嘅設計以吧枱比較多，都有兩張大嘅卡位同埋一D兩人、四人枱，不過見到佢兩張大卡位，可以坐到六至七個人，因為好多人都係兩個四個，所以張卡位一路都冇人坐，但係門口外面就好多人等位！

我地一路食一路傾計，都傾左好耐，好友心情太興奮，因為攞咗XO仔氣球令佢好開心，因為佢一直以為要買野先可以攞，其實唔使之餘，仲可以攞多個，所以佢太興奮了，我地又傾去旅行嘅嘢，又講返佢之前去荷蘭去過嘅地方，因為最近電視台個旅遊節目就係介紹荷蘭，我都覺得好吸引，好有興趣去！考慮明年去一個長途D嘅旅行，到時再諗下點啦！同好友約定出年去陽光與海灘，希望到時可以放航拍啦！

高凶浩劫 Skyscraper

Will  在一次行動中，被炸斷了左腳，之後從事保安工作，他一家四口到了香港，在號稱全球最高，樓高240層的明珠塔，為這座大廈測試保安及防火系統，他們居住在這座大廈𥚃面，亦是唯一的一戶住客，大廈的主人趙先生，安排了一部tablet 給他，這部 tablet 可以控制整座大廈的保安系統，一天，突然有人來搶走Will 的 tablet ，同明明珠塔發生火警，防火系統被人用他的 tablet 關掉，Will 的妻兒都在大廈之內，Will 為救妻兒，不惜一切........!

原本想睇4DX 版本，但係時間唔係太理想，唯有睇2D，套戲拍得好緊張，對於我呢D有畏高嘅人嚟講，真係睇到好驚，好多鏡頭都係居高臨下，或者差D跌落街果隻，好彩係睇2D，如果睇4DX就更加驚，套戲個背景係香港，有D演員都要講廣東話，不過好多景明顯唔係香港，見到D停車場寫住車庫，就知唔係香港啦！有份演出嘅昆凌，冇乜幾多句對白，只係客串多！整體套戲都好睇，雖然係好誇張，不過 Stone 嘅戲一向都唔會太差！

古琴雅苑

又約了好友飯局，對上一次同呢班好友飯局已經是一月的事，相隔了半年先一次飯局，仍然係唔齊人！今次去咗灣仔食燒鴨，之前在尖沙咀海運大廈食過一間羲和雅苑，以為係同一個集團，原來唔同嘅！反而呢間入到去，見到個裝修有D似莆田，有冇關係就唔知喇！

今次我地七個人，希望下次可以齊人八個啦！我哋坐咗一張大卡位，可以坐到八個人的卡位，多咗個位當然係放袋啦！我哋叫咗一個六人餐，入面有成10款餸，另外再加左一個鱔糊，個餐有四小碟、皮蛋豆腐、有個湯叫全家福、糖醋黃魚、片平鴨、獅子頭、帶子賽螃蟹、津白同埋木桶飯，甜品係核桃糊！未上甜品之前，見到隔離張枱條炸銀絲卷好似好正，我地又叫左一客，正！整體食物都唔錯，片皮鴨唔算特別出色，包片皮鴨果塊片唔錯，夠熱又薄，每塊皮之間都有張紙隔住，冇咁易黐埋一齊，呢個做法幾好！

可能都有一段時間冇見，今晚大家都幾多野傾，傾到都唔多願走，不過店員就好匆忙，好似想我地快D走，但係距離佢地收工仲有成個鐘，而且仲有好多客未走，唔知點解咁急！搭車果陣時好友提及另一個好友的太太有精神問題，實在令人有點擔心，希望她能夠好好康復！

慢煮肉眼扒

又玩慢煮，上次在好友的家𥚃食咗佢做既慢煮牛扒，因為個黑松露牛扒味道怪怪地，相當之失望！今次買咗澳洲黑毛和牛肉眼扒，先用鹽同黑胡椒醃左佢，再加幾條新鮮的迷迭香，再抽真空，之前趁低吸納買咗部抽真空機，係樂信牌果隻，因為話佢唔再出，所以特價清貨，只係二百幾蚊，屋企原本果部 Nova 因為上次吸到D汁壞壞地，雖然上次都用到，但係唔知幾時用唔到，因為佢時得時唔得，呢部樂信咁平就買部返嚟傍身，今日就開來試下用，網上有D人話部機唔好用，但係我覺得就咁抽真空同埋封口，都冇話好唔好用，抽真空嘅效果同之前果部冇乜分別，我唔知人地話佢唔好用嘅原因係乜嘢，反正有D人冇真空機，就咁將個袋放入水做抽空效果咪仲差？我覺得兩隻機冇乜分別，始終呢部新買，冇吸過液體，一定好過之前壞壞地果部 ！

跟返 App食譜 set 左53.9度一小時，煮完再落鑊煎一煎兩面，覺得有小小 over cook ，可能塊扒唔厚，慢煮時間可調低D，可能半小時至45分鐘，就ok！下次再試試！

小偷家族 Shoplifters

在東京，一個貧窮的家裡，住着老婆婆、大叔兩夫婦、妻子的妹妹和男孩祥太，大叔和祥太經常一起偷竊，一天晚上，兩人在回家的路上，看見一個小女孩被父母留在屋外，他們見天氣寒冷，便將她帶回家，並在她的身上發現傷痕纍纍，原本大叔的妻子想將女孩送回家，但在門外聽到她父母因為小女孩的存在而吵架，所以最後將她再帶回家，他們帶走女孩之後，女孩的父母竟然沒有報警，對她父母來說沒有了女兒可能是一種解決！他們一家雖然貧窮，生活開心，亦因為貧窮，各人都用不同方法搵錢.....！

聽說這部電影取得金棕櫚獎，我唔識佢得獎的依據，作為觀眾，覺得套戲都幾好睇，呢個家庭各人嘅關係好複雜，亦都反映到日本社會問題，就業問題、貧窮問題等等，都係我地作為遊客睇唔到嘅地方！戲中各個演員都表現得好好，特別係女主角大叔的太太，最後果幾場戲都做得非常好！

Mad for garlics

又放假，又去又一城食野！

去左呢間，開左一段時間都未去過，見到個名有韓文，但係又食西餐，可能同其他韓式餐廳同一集團吧！

午餐時間，lunch set 揀咗個卡邦尼意粉，跟餐有沙律或者湯，我揀咗沙律，因為個湯係甘筍湯，我好少食紅蘿蔔同埋甘筍，因為食得多膚色會變得好黃，所以我好少食！沙律就好一般，好彩佢係用橄欖油同埋醋，最怕係用沙律醬，唔係唔鍾意食，只係去佢太高鈉！我醒唔起意粉係有煙肉，其實我係唔鍾意食煙肉，佢嘅煙肉分量唔多而且唔係好肥，所以食咗少少，意粉味道一般！令我好懷念 Oak tree 的堂煮的卡邦尼意粉呢！

立鮨、飯局作客-慢煮

食完麵，好友約我晚飯，時間尚早大家出去旺角諗住買牛扒，點知牛扒店因為停電冇開！我哋就去咗食壽司先，好友食過呢間幾次都覺得OK ! 呢度係係立食，我地只係叫左少少野試下，好友推介海膽壽司、飛魚子壽司、火炙三文魚壽司，另外再叫多兩個set ，魚生都幾新鮮，當然冇响日本食嘅咁正啦！海膽都唔錯，呢度嘅壽司米係唔係白色，而係加咗汁去煮，所以D壽司米係啡色嘅，同埋有味嘅，所以唔使落咁多豉油，主要點D Wasabi 就得啦！

食完嘢我哋去尖沙咀 City Super 睇下牛扒，原本我哋想買帶骨嘅肉眼扒，但佢非常之大塊，亦都好厚，仲要超過一kg重，雖然我地有四個人，但係我地諗住慢煮，咁大塊慢煮起碼要四、五個鐘！所以我地轉買普通嘅牛扒！我地揀咗澳洲黑毛和牛扒，另外揀咗一款黑松露 Dye age 牛扒，黑松露呢款牛扒比較瘦，冇乜脂肪，不過聞到黑松露味好香，跟住我地再買咗D蘆筍同埋番茄仔，跟住去好友屋企玩慢煮！

我哋用香草同鹽醃一醃兩塊牛扒，然後慢煮半小時，另外好友亦買咗薄餅同埋糖水，我地先食咗 pizza 同埋蘆筍，再煎埋牛扒食，個黑毛和牛都唔錯，但係黑松露果塊就真係麻麻地，首先個黑松露味太勁，完全蓋過晒肉味，肉質亦都唔係咁軟淋，所以都好失望！食完飯我哋又search民宿，搵到一間都唔錯嘅，不過話要行好遠，我發揮我嘅偵探頭腦，根據住客嘅留言，搵吓間民宿個實際位置響邊度，同埋難唔難搵，根據蛛絲馬跡，同埋D相嘅環境，終於比我搵到民宿位置，睇情況要行成20分鐘先去到，不過間民宿真係唔錯，因為佢有兩層，仲有四間房，啱晒我哋四個人去，因為另外有一間好細無房嘅，四張床平排對住廚房同廁所，都只係平幾十蚊，不過位置當然係理想好多啦，不過我哋唔想對住個爐頭瞓覺，所以放棄咗，繼續再搵下其他民宿，不過都真係幾花時間！

the night market

近日少左外出用膳，今日午餐去又一城食個下午茶，先發覺原來都開咗幾間新嘅食店，我都未去過，就先去試下呢間夜市，呢度主打係台式食物，叫得夜市就應該係同台灣夜市食嘅嘢類似，不過下午茶餐選擇唔係好多，不過都應該係夜市會最常見到果D食物，我叫咗個麻辣牛肉麵，叫咗杯梅子寒天，仲加埋個小食，我就揀咗小籠包，可惜佢冇胡椒包，如果唔係我一定會食！不過就算有得食都未必有喺台灣食到嘅咁好味！馬辣都幾夠辣，牛肉就麻麻地，麵都可以！小籠包都唔錯！