今日同好友去咗西九文化區，因為有個咖啡節，我唔知佢係第幾年做，我哋就第一次嚟，撞啱呢幾日落雨，會場本身係草地，而家變咗泥地，我哋失策地着咗白色鞋，基本上，成對鞋都係泥，褲腳都係，雖然我哋去到嘅時候停咗雨，但係個泥地都有唔少水氹🫣 所以要慢慢行，呢度要俾入場費同埋買Token，入場費係$60 ， Token就每個$25 ，買$220嘅package，就包入場費同四個toku，仲送一個環保袋同紙扇🪭！今日熱熱地把紙扇都啱使😅
佢分咗幾個區域，最受歡迎係日本區，亦都係最多人嘅地方，亦都只有佢係有瓦遮頭！ 日本區呢度有好幾條隊，其中一條係排Philocoffea ，我哋都有去排，佢最貴嘅咖啡要$250杯，仲要一早賣晒，所以我哋排隊都係買其他咖啡，排咗半個鐘先買到，可以睇住佢手沖，咖啡嘅質素係唔錯，但係未至於好驚喜！另外一條隊排Glitch coffee ，呢一間我上次去東京嘅時候已經想試，但係佢超多人排隊，所以冇試到，今日佢喺呢度條隊都唔弱，仲多人過我哋頭先排嗰間，唯有留返去東京先再排，有見到我上次同好友喺東京飲嘅嗰間Latte Art Mania，佢主要係拉花攞獎，所以我哋冇去試佢嘅咖啡，反而另外一間叫做haiz coffee ，佢有個抹茶latte，好似好吸引，我哋就去排隊，雖然條隊得幾個人，但係排好耐，因為佢逐杯抹茶開粉去沖，又要計重量，所以沖一杯係要大約4-5分鐘，所以條隊大概只有10人喺前面，都要等成個鐘，佢仲有抹茶粉賣，不過我覺得佢奶嘅比重太高，奶味蓋過咗抹茶味，唔係好飲到抹茶嘅真正味道，有D可惜！
我哋又食咗杯Gelato，係豆腐花配咖啡味，都幾好食幾特別，豆腐花仲有黃糖粒粒，好搞笑！行過Urban coffee roaster ，呢間之前喺銅鑼灣飲過，佢亦都喺機場嘅40號閘附近有間舖，我對上兩次機場都有幫襯，所以本身唔想試佢哋嘅咖啡，不過好有有興趣睇佢啲杯，聽完個職員講解，又想試吓佢哋嘅巴拿馬藝妓咖啡，所以叫咗一杯，職員仲幫我哋加咗兩滴香精，佢話個名叫香精實際其實係一啲礦物質叫做Apax lab，能夠改變咖啡嘅味道，佢將我哋杯咖啡一分為二，一杯加咗兩滴，個味真係唔同，未加之前我覺得個咖啡有少少橙酸味，加咗之後冇咗嗰份酸味，仲有少少花香，都幾特別！
沒有留言:
發佈留言