Blossom 波甚、九龍城寨光影之旅

今日去九龍城訂蛋糕，準備好友生日飯嘅時候食，順便喺九龍城搵嘢食，之前喺南角道嗰間Blossom，因為舊區重建嘅關係執咗，搬咗去同一條街嘅另一邊，近地鐵站個新樓盤樓下，就在南角斜對面，新舖明顯大好多，多咗啲位喺門口外面！

我叫咗個意粉，見佢有串燒，所以嗌咗碟雞髀肉試吓，我覺得佢唔係真係串燒，係一串煎嘅雞髀肉🤣 個意粉都幾辣，好食，咖啡保持水準好飲，見到佢除咗賣咖啡豆之外，仲有賣朱古力，不過佢冇標價，我就冇特別去問店員，因為都唔係話真係好大興趣！🤣

飲完咖啡行去九龍寨城公園，呢度有個九龍城寨光影展，做咗一段時間，都冇去睇，今日就過去睇吓，去到我就記得我之前嚟過呢度，當時係冇呢個展覽，而家要攞飛先至可以入場，佢係免費嘅，因為佢分時段，大概每個時段20分鐘，所以都要攞張飛，避免某個時段人多要截人！我等嗰個時段大概有30人，裏面嘅擺設，係將電影九龍城寨之圍城呢套戲入面嘅部份場景搬咗嚟呢度，有士多、茶餐廳、魚蛋工場、髮型屋等等，可以逐個舖位入去影吓相咁，有啲似之前在Airside 做嘅展覽！記憶中九龍城寨未拆之前，曾經有搭車經過出面，記憶都好模糊，依稀記得佢係殘殘舊舊，而家睇返啲介紹，都覺得以前應該係住咗好多人，因為地方都幾大，而家公園嘅另一邊做緊工程，見到有啲好似天橋嘅建築，唔知整完之後會係點，等佢完工之後再嚟睇吓！

 

赤鱲角櫻花海岸

赤鱲角嘅櫻花海岸，印象中開咗一兩年，之前因為櫻花太少，朋友唔建議去，不過睇新聞話而家種多咗櫻花，所以又去睇吓，佢成個area 都鋪咗粉紅色嘅地，所以離遠都睇到，而且呢度上面係有昂坪纜車經過，坐纜車嘅人睇到會落嚟行，唔坐纜車嘅人都可以用纜車做背景影相，櫻花樹嘅數量雖然多，不過有部份都未開花，聽講話要情人節先至係最佳嘅欣賞時候，加上今日過到嚟天氣都唔係太晴朗，影出嚟都唔係太滿意，不過佢呢度D櫻花係有超多蜜蜂，有一棵櫻花上可以有幾十隻蜜蜂，好彩有一定距離，所以唔會驚俾佢針到，不過喺影相嘅途中見到有唔少大媽，都拉低樹枝嚟影相，都見到有一兩個人出聲話佢哋，但係佢哋冇理😔可能講廣東話佢地唔識聽，要講國語先聽得明🫣 

整體嚟講我覺得呢度嘅櫻花，冇沙田安景街公園嗰啲咁靚，亦都冇咁茂盛！同埋呢個位置冇廁所，之前上網睇話有臨時廁所，但係唔見有，睇完花，沿路行去東薈城，食碗麵，再去個廁所先搭地鐵走！😅

 

蘩樓、甘坑古鎮、牛利屋極

今日又約咗好友北上，一齊搭火車上去落馬洲，然後call車去飲茶，上車之前喺網上攞飛，因為見佢都好多人網上攞飛，去咗一間叫做蘩樓嘅酒家，我哋去嗰間係總店，地方比較大，相對等位嘅人都多，唔少係香港人，我哋已經提早咗攞飛，都要等25分鐘先可以入座，先叫咗幾款點心食，睇吓夠唔夠先再決定加唔加，先嚟煎韭菜餃，都幾大隻，而且好好味，跟住係蝦餃，又係好大粒，啖啖都係蝦肉，好味😋最好食係呢兩款點心，之後燒賣就普普通通，仲有牛肉腸、金錢肚、紅米腸粉、油炸鬼等等，份量都比較大，原本想食生煎包，但係見到佢都幾大個，所以最後都冇食到，下次可以試吓！

飲完茶我哋call車去咗甘坑古鎮，呢個車程比較遠，都搭咗成半個鐘先到，一去到見到入口附近好多漢服租借嘅商店，亦都有唔少女仔着漢服影相，裏面好似一個古鎮咁，同大陸大部份旅遊區一樣，總有一條食街，有好多嘢食，不過我哋啱啱食飽咗，所以冇買任何嘢食，純粹喺度行吓，四圍睇吓，行咗一陣見到有霸王茶姬，又去飲返杯嘢，坐低傾吓偈，又plan定今晚食乜嘢，搵咗一間食牛舌，喺網上訂咗位先！

搭返車出去都要半個鐘，去到燒肉店未夠鐘，見對面有個商場，叫做卓越匯，我哋記得之前嚟過一次，我哋去超市行咗陣，睇吓嘢，大家都冇消費😅行到咁上下就去食飯！

呢間燒肉店，主打係牛舌，我哋叫咗個四人套餐，有一條厚切嘅牛舌，非常吸引，有店員幫我哋燒，要讚一讚呢度店員，燒肉嘅技巧都好好，條牛舌燒得好靚，外脆內軟，好好味！個餐仲有四款牛肉，肉質都好軟腍，不過牛味就唔係咁夠，爭少少！佢仲有好多嘢食，有一個沙律、薯仔沙律、煎蛋餅、滷水牛舌、炸雞軟骨、天婦羅炸蝦、兩款腸，甜品係牛角包配雪糕，個牛角包佢會先喺個爐度燒一燒，然後先搽雪糕上去，燒過嘅牛角包，當然係會好食D😄 全程有店員幫我哋燒，佢每燒一款肉就換一次網，服務好好，手勢亦都好，唯一缺點係個牛肉嘅牛味爭D😅