2025年11月日本東至西長途旅行 Day 13 - 上野、淺草橋、銀座

好友今日返香港，所以我哋嘅活動範圍只在上野，先check out，然後寄存行李，就出去搵食，搵咗酒店附近有間coffee shop 叫做 Shelves coffee，店入面淨係賣咖啡，食物就只有曲奇餅，佢都有咖啡豆賣，去到嘅時候店入面冇乜人，我哋坐低嗌咗兩杯咖啡同一件曲奇餅，呢度嘅咖啡幾好飲，好友仲話曲奇餅好好食，但係我就唔鍾意食曲奇餅，所以冇試到，好友再買多兩塊上飛機食，我哋坐左一陣，店入面越嚟越多人，甚至要等位，我哋就去食晏！

去咗上野火車站旁邊嘅商場，去搵一間叫做寿司処ニノ宮，去到要等位，不過等兩張就到我哋，叫咗幾款壽司，同埋海膽手卷，仲另外叫咗Wasabi(要俾錢)，因為我哋以為冇Wasabi喺壽司入面，原來係有，只係份量好少，所以食唔出，不過佢呢度嘅Wasabi係真Wasabi，即時手磨嘅，所以唔會好攻鼻，壽司嘅質素都唔錯，食完壽司仲有時間喺附近行咗一陣就返酒店攞行李，同好友一齊行到去火車站就分道揚鑣，佢搭火車去機場，我就去淺草橋，去酒店放低行李！

前幾日住嘅酒店係Apartment，跟住book咗同一集團嘅酒店，位於淺草橋，先去酒店check-in，放低件行李之後，就去銀座，諗住去試吓一間咖啡店Glitch ，但係門口有條長人龍，所以放棄咗，本來想去食一間拉麵店，叫做銀座八五，但係見到佢原來要預約，而且已經full booking，兩間都食唔到，就喺附近行吓，見到另一間Latte Art Mania，同前日嗰間分店比較，呢間地方大啲，但係人客少好多，今次唔飲咖啡，飲咗杯焙茶！呢間嘅店員全部都係女仔，亦都冇展示拉花攞獎嘅資料，所以兩間分店應該係好唔同！

跟住行去搵另一間拉麵店叫做 Morry，叫咗佢招牌拉麵，係京都熟成醬油拉麵，呢間店應該比較多遊客，見佢餐牌有多種語言選擇，而且都幾多外國人嚟幫襯，所以店員都能夠講英文，拉麵嘅味道都唔錯，個湯都幾好！食完嘢就去附近行街，去咗UNIQLO，今次唔去12層樓嗰間，去咗呢間只有七層樓，因為佢樓下有間OK超級市場，聽講話啲嘢好平，不過去到見佢就真係賣日用品同食物嘅超市，佢有個位係賣藥妝，不過藥妝部關咗門，睇唔到佢啲價錢係咪平！上返去UNIQLO，睇啱咗個熨畫，所以買咗件T恤印個熨畫，見呢間UNIQLO入邊有間coffee shop，係佢哋自己UNIQLO的，我就冇幫襯coffee shop因為都夜喇！買完嘢就返酒店休息！

酒店住後感：
Monday hotel Asakusabashi 
酒店位於淺草橋，如果搭JR，去邊都要經秋葉原轉車，除非搭都營淺草線，酒店出門口行一個街口已經係地鐵站入口，不過呢條線只有樓梯！如果行去JR淺草橋站東口只需要4分鐘，但係呢個出口冇電梯，只有樓梯，如果拎住行李嘅話就要行去西口先至有電梯，咁就要行多4-5分鐘，大約係由車頭行去車尾嘅距離！呢度附近都有好幾間酒店，都係一啲平價酒店為主，但係食店就唔係太多，而且呢一帶主要係一些賣手工製作物料的商店，例如飾物、皮革製品嘅原材料，酒店過D就已經有一間貴和製作所，主要係售賣飾物嘅散件。酒店嘅大堂唔係好大，職員都有幾個，房間比想像中大，可能因為佢俾咗雙人房我，房入面有兩張合併一齊嘅單人床，床同洗手間之間都有少少空位，電視機下面有一張摺埋咗嘅枱面，叫做多番少少位置擺嘢，行李箱可以擺喺窗下面嘅空位，洗手間就比較細，不過整體都算舒服， 2樓設有自助區水機，飲品售賣機等，酒店都唔算好新淨，但都係乾淨企理！