食得福海鮮私房菜

今晚同另一同事farewell ，我估唔到佢會唔做，大家傾計時，佢透露自己有情緒問題，需要食藥，所以唔能夠太大壓力，於是決定辭職！估唔到平時咁樂觀嘅人都會有情緒病，佢話可能之前患癌嘅時候，化療過程的副作用，希望佢能夠身體健康，開開心心生活落去！

去咗油麻地呢間菜館，話就話係私房菜，其實都係一間街舖，有其中一個同事食過，所以叫我哋預早訂位，不過今晚唔算爆，雖然我哋到嘅時候得返一張枱，不過陸續都有人走，反而少於一半枱有人，佢呢度有樓上，不過主要係大枱，我哋人多，所以坐樓下，食過嘅朋友話佢嘅特色小菜都唔錯，反而一般嘅小菜就麻麻哋，我哋叫咗佢嘅招牌菜，金湯豆腐，呢個係玉子豆腐，表面有啲黑芝麻，外脆內軟，配咗個南瓜芡，好食👍🏻仲嗌咗乳鴿、鹹豬手、冰鎮咕嚕肉、豉油王炒麵、黃金椒鹽鮮魷等，整體食物質素都唔錯！下次可以考慮再嚟呢度食飯！