最近尖沙咀海港城嘅food court 重開，搬咗上去city‘super 樓上，改左個名叫Food Atlas ，食店嘅選擇都幾多，而且見到好多人食，我揀咗食車仔麵，呢間車仔麵應該係深水埗長龍店，之前因為佢成日排長龍所以冇機會食，呢度就唔使排隊，用自助點餐嘅方式落單，揀咗幾款餸，雖然冇乜人，但係都要等，其實我見到個麵餅一早已經淥好咗，只係冇人去夾啲餸落個麵度，過咗幾分鐘先至有人去做呢樣嘢，食物嘅味道都幾好，個人認為未至於要排隊食，當然深水埗可能平D所以多人食，而且其實好多地方都冇車仔麵食，就以尖沙咀為例，我諗除咗呢度都好難喺海港城搵到第二間車仔麵食！佢呢度全部食店係半開放式廚房，睇到佢哋衛生做得麻麻，例如落單紙浸住落碗度，擺喺出面的自助嘅調味料同埋辣菜甫，有啲打開晒蓋，或者倒到一枱都係，都冇人去清潔😅好彩食嘢嗰邊嘅枱上高都有調味料，嗰邊就乾淨啲，下次再去試吓其他食店🤭
今日去睇展覽，五月已經推出咗呢一個展覽，呢個展覽係免費嘅，不過估計初初推出嘅時候會比較多人，所以過咗一排先至去睇，人就唔多，不過有一班好似國內學生咁嘅團體參觀，所以有一班人同時出現就好似好多人，佢哋一走咗就冇乜人，展覽圍繞着講蒙羅麗莎同達文西嘅資料，亦都有講解呢幅畫嘅畫工，亦都有介紹達文西嘅人生同作品，另一個展廳就介紹文藝復興嘅部份藝術品，展館就唔係好大，主要都係展出一啲複製品，所以好快都行晒兩個館！
行過對面仲有個展館，係香港電影幸會25歲，主要係展示一啲得獎電影嘅獎座、戲服等，亦都有一個影相位，係可以同電影海報嘅角色影相，最多人揀當然係賭聖🤣 仲有一啲比較懷舊嘅場景可以影吓相！
落返樓下會有個金庸展覽，介紹返金庸嘅小說，睇埋呢個，再行埋佢間商店，我就走喇！
今日約咗好友一齊喺銅鑼灣食lunch，去咗時代廣場地庫，見到有一間食雞嘅舖頭，就試一試佢，我哋都叫咗三種食法嘅set，佢係可以就咁食，或者加一啲調味，最後係加湯，雞就麻麻哋，話就係日本雞，但係同日本食都爭得遠！
食完飯我哋去附近行街，去咗Donki買酒，買咗上次我喺日本飲嗰隻澪，佢冇日本嘅洋梨味，不過就有士多啤梨味，買一支擺喺屋企，下次食飯飲😆
行到夜晚又再搵嘢食，去咗希慎地庫，上次見到呢間有生蠔食，但係冇食到，今日再去試一試佢，揀一款主菜加$68可以轉做套餐，多咗個湯或者沙律，同埋飲品，另外仲可以六折食兩隻生蠔，我哋叫咗四隻，因為一個好友唔食生蠔！生蠔主要係嚟自澳洲，質素都唔錯！主菜就叫咗三文魚、牛扒、豬扒，食物都唔錯，難怪呢間舖頭好多人食！
食完飯又係甜品嘅時間，行去渣甸街，有一間買榴槤嘅舖頭，叫做達人屋，我哋買咗個榴槤雪糕，佢係一個牛奶雪糕球，加一球榴槤蓉，再加兩舊新鮮榴槤肉，榴槤肉係好細舊，因為係一個好細嘅榴槤度攞出嚟，都幾抵食，而且味道唔錯，本來想一人一杯，不過買一杯試咗先，食完又覺得唔需要再加，因為都夠飽！食完雪糕就各自搭巴士走，因為大家都搭唔同嘅巴士線返屋企😅
又去啟德，上個月好友買咗飛睇排球，我完全唔記得咗呢件事，好彩佢前兩日提醒我，從來未試過喺現場睇比賽，見有中國女排，又買到飛，咁就去睇吓啦！
今日係第一日嘅賽事，一共有三場，我哋睇兩場，五點場係意大利對烏克蘭，好友話意大利係世界排名第一，所以贏面好高，比賽係五盤三勝制，取得25分𤔡之勝出，意大利第一場就贏咗，第二場就係烏克蘭，跟住兩場都係意大利，所以只係打咗四局，我哋睇完就去食個飯先，喺附近求其搵咗間嘢食咗碗麵，再返返嚟睇埋最尾嗰場，中國對加拿大，中國隊嘅打氣當然係勁好多，不過我哋後面一排都係捧加拿大，所以佢哋都叫得好大聲，兩隊嘅實力相若，所以都幾緊湊，因為輪流每隊一球，所以打足五局，最後中國隊都輸咗，分數只係爭幾分，真係可惜，不過中國女排冇以前咁犀利，加上啲隊員都唔係好識，淨係頭先喺洗手間見到2號，見佢打得都幾好，另外18號成日都接到對手嘅波，都守得好好，我同好友都覺得佢係MVP🤣🤣🤣🤣
跟住行過去世貿飲咖啡，見到開咗呢間咖啡店，我記得以前喺利園附近好似有一間，跟住冇見一排又出現返，我哋叫咗兩杯咖啡，同埋叫咗Scone同Tiramisu，咖啡好飲，食物都唔錯，而且環境幾好坐，勝在冇乜人😅
今日又過灣仔，因為睇到之前有網上宣傳，介紹一間舊式當舖改裝而成嘅coffee shop，原本想約好友一齊去，但係成日都夾唔到時間，所以就自己去睇吓，舖頭個位置喺大有商場斜對面，門口係冇任何翻新，入到去地方都幾細，因為從來冇去過當舖，所以都想入去睇吓，沖咖啡嘅位置就喺二叔公個位😂...
