宇治園

食完拉麵在商場行左一陣，想食抹茶甜品，記得商場有日本抹茶的甜品店，睇下水牌，就在四樓近 Jamie Oliver 果邊，去到就見到，坐低食先！原本想食抹茶芭菲，但見到有焙茶芭菲，就試試佢！其實睇餐牌見到有西多同天使之淚（類似水信玄餅）都想試，不過怕太飽，同埋今日想食雪糕！

店員送來一壼水，是用鐵壼裝的，可以保溫耐一點，芭菲味道不錯，同京都吃到的不遑多讓！食完野可以去旁邊的商店買茶葉，出示餐廳的單可以有九折呢！見到有玄米茶葉，不過剛在大阪買了，所以不會買了！

麵屋一燈

忙了一個月，今日可算能好好休息一下，就去尖沙咀食野！

聽說這店子開了一陣子，今日去試下，之前沒有在日本食過，聽說店家在日本連續五年成為東京第一拉麵，去過東京多次都沒見過排好長龍的拉麵店，上日本 open rice  たべログ tabelog search 下，見佢在新小岩呢D非遊客區，難怪未見過！

香港分店就在海外運大廈，之前是姆明餐廳，以前常排長龍，後來越來越少人，香港大部分食店都會有此情況，好似對面間度小月，初初要等位，依家大把位！

呢間一燈，地方頗大，窗邊一排單邊位，可以坐十幾廿人，中間四方枱有十幾張，仲有D吧枱位，地方頗寬敞，餐牌亦非常簡單，9款湯拉麵和三款沾麵，飲品只有兩款烏龍茶，一心想食沾麵，但係話賣晒！唯有揀湯麵，見到有期間限定秘製醬油拉麵，雖然話佢個濃厚魚介湯出名D，但見秘製醬油係期間限定，就試一試，反正濃厚魚介長期供應！

湯麵好快送到，湯底味道不錯，麵條的硬度也很適中，比較硬身爽口，味玉和一小片肉，不算特別出色，整體不過不失，本身期望不大，始終未食過令我一試難忘的拉麵！

飯局作客 - 淘大花園

好友的家堪稱 Miele 之家，佢屋企嘅洗衣機、乾衣機、洗碗機、蒸籠、焗爐、油煙機、爐頭全部都係同一個牌子！雖然只有兩個人住，但係個洗碗機係12人果隻大機，好勁！！

好友的男友買咗海鮮，有蝦、蟹、蚌、蜆、帶子同埋芥蘭，海鮮就用粉絲蒜蓉一齊蒸，好新鮮好正！好友的男友也是煮得一手好菜，除咗一屋 Miele 電器之外，佢亦都係用生鐵鑊煮餸，年輕一代都甚少人用生鐵鑊，估唔到佢咁年輕都已經用緊生鐵鑊！好友仲專誠開咗支梅酒飲，支梅酒係佢地上次在東京伊勢丹買的，俾我地飲晒成支，下次等我去日本買返支送俾佢先！

食飯嘅時候，我和好友一直勸另一好友買蒸籠，因為真係好好用，不過好友嫌佢太貴，即使家中有另一部唔好用的蒸爐，但係唔想浪費，亦唔想花費太多，所以佢都不為所動，不過仍然羨慕我地有好嘅蒸爐用！

花卉展覽 / Dazzling cafe

上星期去咗花卉展覽，今星期又再去，因為好友未去過，所以陪佢去一次，今日睇D花同上次大致上一樣，有少數係上次睇漏左，定係新加左？我唔清楚，總之上次冇見過，今次就有影返，今日非常之熱，天氣非常之好，好足夠嘅光線，不過真係身水身汗！

影完相大家都覺得肚餓，近近地去皇室堡食個Tea，叫咗個芒果厚多士，我以叫咗一杯碟豆花檸檬梳打，好友就叫咗一杯檸檬薑 Mojito，個多士好多忌廉，唔記得咗叫佢少忌廉！唯有撥開佢！

食完個 tea ，去搵另一個好友，睇吓佢今晚得唔得閒一齊食飯，點知佢真係得閒，佢男友正在家預備煮飯，於是我地決定一齊去佢屋企煮飯仔！

飯局作客 - 東頭邨

今日去剪髮，剪完去好友家中食飯，今晚好友整左生蝦剌身，好友第二次自己整，我就第一次食自己整的生蝦刺身，佢哋買咗一D好大隻嘅蝦，隻隻都係游水蝦，非常新鮮，買返來即刻冰鎮住，冰暈左咗D蝦即刻劏，D肉好厚，好友做左泰式汁料，又將蝦頭炸左，整完即刻食，好鮮甜，好好味！！！

食完蝦，仲有蒸水蛋、潤腸蜆肉炒韭菜花，同埋煎金蠔，亦都滾咗個湯，每個餸簡單得來都好好味，有個廚藝叻嘅朋友就真係有口福！

吉吉燒

今日有驟雨，但係雨勢唔大，而且只係落咗一陣，約咗好友去BBQ ，一於照去，又去九華徑的燒烤場，可能落雨，今晚唔係太多人，上次我記得爆曬場，一張枱都無，今次就大把枱，我哋買咗少少海鮮，有大蝦，扇貝、蚌同埋大眼雞，今晚D蝦好大隻，最大果隻仲大過條魚！一人一隻都飽喇！我地攞左幾碟肉類來燒，D雞翼有幾款味道，其中一款好辣，不過都食到！

我地有租網，可以放上網慢慢燒，我地燒完D食物，坐低慢慢食傾計，已經約定下個月食飯，仲約定以後如果食生日飯，就去生日果個屋企食飯，仲諗定出年一齊去旅行，希望攪得成！

香港花卉展覽 2018 - 大麗花

去到維園已經三點幾，不過今日天氣炎熱，有太陽，光度好足夠！最啱影相！

今次主題花係大麗花，之前好似唔見有呢種花，有D少見D品種就好，一入場，右邊例牌係有路政署的花草，今年整得幾靚！亦唔少得用花砌成的公仔，同唔同主題的小區，每個小區各有特色，可能第一日，D花都好靚，而重中之重當然係鬱金香花田，永遠都圍滿人同腳架！鬱金香嘅顏色好靚！

場地兩旁亦係售賣鮮花和食物飲品的攤檔，鮮花的價錢都算便宜，都有好多人買！今日真係影到身水身汗，好熱呢！