Coffee Voyage (東涌） / 羅麥記 / Shangri-La lobby

今晚約咗好友食飯，晏晝我哋先去行吓，去咗東涌東薈城睇吓個咖啡展，呢個咖啡展已經去咗三個location做，原先都冇諗住去，咁啱今日大家得閒，就去睇吓佢第三個location，亦都係最後一轉！

先去食個lunch，就喺商場嗰間羅麥記度食，我之前冇食過呢間，以茶餐廳嚟講，食物嘅質素都唔錯！

食飽飯就去咖啡展，場地分咗兩邊，先去咗近地鐵站嗰邊嘅場地，然後再上返去Blue bottle 對面，近地鐵嗰邊大概有四個booth，每邊兩個商戶，見到上次去灣仔嗰間當舖Cafe嘅Boat coffee，我就冇試到，好友就試咗覺得OK，另外又買咗薑柚樂，跟住就行過去另一邊，呢邊只有四個booth，主要係一啲日本嘅參展商，我哋試咗其中兩間，一間主要係拉花咖啡，咖啡嘅質素不過不失，因為我哋比較鍾意飲深烘焙，而日本咖啡多數係淺至中烘焙，今次就冇買咖啡豆，因為人哋啱啱送咗兩包咖啡豆俾我😄

跟住我哋出咗尖沙咀，因為另一好友仲未收工，今晚去食潮州嘢，仲未夠鐘我哋就去咗尖東嘅香格里拉酒店，聽聞話佢哋有買糖水，夜晚仲好多人排隊添，我哋喺非繁忙時間去，所以唔使排隊，我哋三個人叫咗三個糖水，分別係即叫即做嘅薑汁撞奶、豆腐花、芝麻糊，出乎意料之外地大碗，比起一般糖水舖嘅糖水係大碗好多，個薑汁撞奶就做得唔成功，店員就幫我哋換過第二碗，豆腐花就跟咗三種小杯糖水，質素都唔錯，唔會太甜，最重要係酒店嘅服務，環境坐得舒適，真係物超所值，難怪咁多人過嚟食！

等埋好友收工之後，我哋去食潮州菜，去咗上次同屋企人食嗰間潮州菜館，上次覺得佢好好食，今次就有啲失望，唔知係咪夜咗，賣剩嘅嘢冇咁好，鵝肝同埋鵝片都比上次爭少少🤏🏻😅