Meet met met

今日攞手信去香港仔俾朋友，因為呢個好友自駕旅行咗好幾次，九州我哋都去過兩三次，但係都未食過努努雞，所以今次特登攞一盒俾佢哋試吓！

跟住我就搭車去黃竹坑地鐵站，因為呢度個商場我未去過，所以去睇吓，順便食少少嘢，行咗兩個圈去咗呢間餐廳，叫咗個下午茶餐意粉，意粉份量係非常之少😅佢本身跟咗湯，我另外加咗麵包，配埋飲品都夠飽，意粉係幾好食，只係份量細咗啲！

 

Ohayo / 家上海

今日約咗舊同事去尖沙咀食lunch，本來五個人，有一個甩咗底，得返我哋四個都照食，都差不多半年冇見，大家別來無恙，我哋去咗海運大廈食呢間日式食品，因為大家都唔係太肚餓，所以淨係叫咗一件Tiramisu，同一個夾餅，不過都食唔晒😅 志在大家聚下傾吓偈！今期都見到海港城擺咗個高達，啱啱去完福岡睇高達，返嚟覺得佢好細個🤣🤣

夜晚約咗另一個舊同事一家三口一齊食飯，去九龍塘食上海嘢，因為晏晝嗰餐太飽，所以夜晚都唔係叫好多嘢食，呢度嘅食物質素都唔錯！

因為都幾年冇見，佢哋嘅小朋友都大個咗，當然係唔會認得我啦！好友個仔好搞笑，同佢一樣好多嘢講，雖然只有六歲，但係講嘢好老積，食完飯我哋仲去玩具反斗城行吓，又去馬莎買嘢，然後先至走！

 

M+ / 越男仔

今日約咗好友去M+博物館，其實早幾個月已經嚟過一次，當時係睇畢加索展，今次因為好友有飛，趁佢未過期我哋要嗱嗱聲去睇，好友就第一次嚟，我就已經嚟過幾次，其實只有下面嗰兩層嘅展館，同樓上其中一個展館會轉展覽，樓上嗰層大部份冇變，雖然睇過幾次，但係我仲係好鍾意睇東京中銀大廈拆出嚟嘅房間，以當年嘅設計，算係好新穎，可惜佢未拆之前未去過，睇返資料佢應該係2022年拆嘅，我記得當年網上好似有講過佢將會拆，但係當其時應該係疫情，所以唔可以喺佢拆之前去望一望！唯有喺展覽度睇😅今期新嘅展覽有Lee Bul 一個韓國藝術家，同埋坂本龍一嘅音樂片！

睇完展覽，我哋搭小巴落旺角，落車嘅時候見到有間食越南菜一間食泰國菜，見到泰國菜冇乜人，但係越南菜就坐滿人咁滯，就去試吓越南菜！啱啱好有兩個位，見佢啲價錢都幾實惠，而且份量都唔細，我哋叫咗兩碗河粉，加個蝦多士，味道不過不失，勝在性價比高👍🏻

 

Mild (銅鑼灣世貿)

今日去銅鑼灣世貿食lunch，呢間餐廳嘅位置喺5樓，但係電梯係上唔到，我以為個位喺535 Tower嗰邊，過到去又見唔到，再走返嚟世貿上扶手電梯搵，終於搵到了， 5樓係一個戶外嘅場地，有個counter賣咖啡，餐廳要行樓梯上多一層，上到嚟佢又擺咗啲公仔，有啲似服裝店，當然會見到餐枱，就知冇錯！

我哋見到午餐嘅餐牌都幾吸引，望到其他人叫嘅幾樣嘢都好似好好味，我哋揀咗海南雞飯同埋叉燒蛋焗飯，兩款嘅味道都唔錯！不過今次就冇飲咖啡，食飯期間好友打電話俾我傾四月去立山黑部嘅行程，又要準備出發了！好友用咗Deep seek幫我哋安排行程，不過其中一個巴士券，網上已經停售， AI仲未更新🤣 不過當你問AI，巴士券係咪停售？佢又答你係，又話俾你聽解決方案😆以後去旅行，唔使再編行程了！

 

香港花卉展覽2026

又到一年一度嘅花卉展覽💐🌷🌹🪻🪷🌺🌸🌼🌻🌿🪴🎍🌱，今年主題花係紫羅蘭，今日嘅天氣非常之熱唔熱，而且好曬好好天，但係對於嚟影相，就係非常辛苦嘅一件事，未試過有一次入咗場十幾分鐘，已經個人同相機一齊Over Heat🥵🥵 要搵個地方休息，因為太曬太熱，要cool down 一陣，喺鬱金花海側邊有個位，既唔曬仲有風，爽!

今年嘅裝飾都幾靚，都有好多唔同嘅題材，好豐富，所以人都好多，不過今次我都好快走，因為真係太熱，可能之前喺日本返嚟，習慣咗嗰邊凍嘅天氣，返到嚟覺得好熱，所以都唔能夠stay太耐！😅

 

夜王 Night King

 

夜總會生意日漸式微，因東日的老闆去世，夜總會經理歡哥面對前妻V姐的繆斯夜總會收購東日，V姐進行改革及意圖辭退歡哥，後來發現V姐被東日太子爺所騙，被迫欠上千萬巨債，他們要在短時間內籌錢，才能挽救東日。。。。！

今年黃子華嘅戲都係票房嘅保證，加上鄭秀文都有唔少粉絲，題材對而家年輕一代嚟講好新鮮，因為佢哋冇經歷過香港有夜總會嘅日子，所以對佢哋嚟講應該都好特別，其實套戲主要都係講佢兩個人嘅感情為主，同埋面對逆境嘅迎難而上，都幾有香港精神！

2026年3月四人福岡自私遊 Day 6 - 博多站、福岡機場

我哋搭兩點機，先去街角Mei cafe 食早餐，大家念念不忘佢個crêpes ，所以臨走都要食一次，食完嘢先返民宿攞行李，分兩架的士搭去博多站，因為要買努努雞🤭 原本想話去機場買，但係機場要喺國內線嗰邊買，又唔知佢係使唔使過關，所以都係博多站買咗先，買完就搭火車去機場，去到機場再轉巴士去國際線嗰邊！

過咗海關就搵嘢食，同埋最後衝刺買嘢，去咗food court食嘢，今日就各自嗌自己想食嘅嘢，跟住手信店再買手信，大家都買咗少少！然後就上飛機返香港了！