La Taverna /Mercato gourment Gran Selezione

今日出尖沙咀食呢間意大利餐廳，呢間餐廳好有歷史，但係我從來未嚟過，之前有一次book咗，臨時取消咗，今次再book過，正常可以唔使book，因為唔多人，不過見十一假期，驚好多遊客會嚟，所以最終都係book咗枱，我哋兩個人都係俾四人枱我哋，因為只有6-7 枱客，我哋揀咗兩個午餐，前菜揀咗Parma Ham同埋沙律，主菜就揀咗牛扒同埋卡邦尼意粉，兩款都好食，牛扒應該係用炭火燒，好細心地切咗一條條，方便我哋share，我哋另外叫咗一個Tiramisu，味道都唔錯，整體呢間service好，食物質素都唔錯👍🏻

食完晏，我哋行一陣街，去咗半島酒店商場，因為呢度有間意大利雜貨店，有好多意大利嘅食品售賣，我哋行咗一陣，買咗朱古力同沙甸魚罐頭，跟住睇到佢有個電視播緊片，之前蔡瀾介紹過呢間雜貨店嘅聖誕蛋糕，連續幾年喺意大利攞咗冠軍，不過價錢都唔平😅

買完嘢我哋行過斜對面有一間賣半島嘅吉祥物，嗰隻熊仔相關嘅產品，仲有一啲餅類嘅食物，知道佢中秋節就會買月餅，旁邊有個位置係coffee shop咁，我哋就坐低飲杯嘢，叫咗一客scone ，有原味同提子，另外叫咗一件士多啤梨蛋糕，我就試咗佢哋嘅抹茶latte，因為早排好多人話好飲，不過我就覺得一般，唔算好出色，不過試過就算🤣 

 

鍋癮火鍋

尋日同好友食完飯，今日同佢前度食生日飯，因為另一個好友見到呢間火鍋店嘅廣告，諗起我哋上次喺成都食嘅麻辣火鍋，佢都話想試吓好唔好食，所以就去咗呢間度試試，見佢開到凌晨三點，我哋就晏少少去食，個位置有少少隔涉，我哋冇訂枱，因為通常八點後都會有位，安排咗個卡位俾我哋，呢度有幾張卡位，旁邊就係幾張中型圓枱，亦都有幾間房，我哋叫咗個鴛鴦湯底，因為兩個好友其實唔係好食得辣，佢哋驚個麻辣會好辣，所以我哋淨係叫咗小辣，我就覺得完全唔辣😅我記得上次我哋喺成都仲要加辣添😅 我哋叫咗一碟牛肉試一試先，諗住如果OK就叫第二個部位嘅牛肉，不過呢碟牛肉好一般，而且都幾細碟，我哋另外叫咗鴨血，因為上次喺成都食嗰個鴨血係好好食，不過呢度嘅鴨血唔係嗰回事，都係香港一般火鍋店嗰種好似豬紅咁嗰種，唔係成都嗰種鮮紅色好軟身嘅鴨血😅另外仲叫咗少少配料，食物嘅質素就一般，唔係想像中正宗四川嗰隻，本來呢度靜靜地冇限時，打吓邊爐傾吓偈都幾好，不過過咗10點後，因為有特價六折，所以多咗人，而且有部份人食煙、猜枚、玩骰盅，所以相當嘈吵，有點烏煙瘴氣，所以頂唔順，冇下次🫢

 

海中寶海鮮舫

今日好友忽然約食飯，話順便參觀吓佢新屋，先喺地鐵站會合佢，佢就住喺地鐵站上蓋，非常方便，間屋唔係好大，但係整得好靚，而且好友嘅品味都變咗，變得有藝術感，仲種咗幾棵植物😆又可以探吓佢隻貓！

坐咗一陣，再去地鐵站等佢阿媽，我哋三個一齊出旺角食飯，話預祝我生日😬去咗呢間食海鮮同小菜，店入面只有兩三枱客，我哋叫咗個套餐，另外加咗隻乳鴿，套餐就有魚、蝦、蠔、雞、菜等等，份量都幾多，食物都唔錯，我哋都有好幾個月冇見，大家都傾吓近況，因為之前好有忙搬屋，又去冰島旅行，所以佢忙咗一排，而家先至有時間約我哋，我哋食食吓其他人已經走晒，剩返我哋一枱，所以就坐多陣就走，費事阻住人哋提早收工😅

 

國際中秋綵燈滙 International Lantern Spectacular

每年中秋節維園都有賞燈晚會，我從來都冇去過，不過今年睇新聞報道，話有一個世界綵燈大街，睇落好似好靚，所以今年就去睇吓，今日係中秋節正日，預計可能都會好多人食完飯過嚟，所以我提前五點左右過去，避開最多人嘅時間，去到維園，先喺球場嗰邊影一陣相，因為天未黑，裝飾都未着燈，睇新聞報告話6:15先至開燈，所以我大概5: 40分，就過去世界綵燈大街嗰邊，雖然未開燈但係人都唔少，要分流排隊，首先喺一個球場間開嘅位置度排隊，分咗幾group人，我去到排喺第一group，等咗一陣，開始放人行，要經過一段長長的路，呢度平時係緩跑徑，然後再行到去柏寧酒店對面嗰個位，呢度就已經望到個入口，但係呢個位置要排晒隊喺度等，等到六點，已經見到佢着咗燈，我大概6:24可以入場，因為呢度影相係冇限時間，所以好多人喺度影好耐，警察只係呼籲大家盡量向前行，唔好停留一個位置太耐，不過入到世界綵燈大街，個個都每個位置狂影相，我都影咗一陣，不過都係嗱嗱臨影完走，因為越夜越多人，越係塞住啲人，後邊要等得更耐，唔怪得新聞話要排成兩個鐘🫢不過呢個綵燈大街真係好靚，好值得花時間嚟睇，不過排兩個鐘就真係太耐了，可能好似我咁，非繁忙時間排嘅時間就短啲，不過聽講呢個展覽會延期，我諗過咗中秋之後應該冇咁多人😅今次呢個綵燈大會好成功！好多人都大讚👍🏻👍🏻👍🏻

 

阿閒泰

好友上網買咗iPhone 18 Pro，今日我幫佢去攞，攞完之後去尖沙咀食晚飯，去咗K11食泰國嘢，呢間成日經過都未食過，我哋叫咗生蝦刺身、蠔餅、青口、通菜、炒河粉，個蠔餅嘅蠔都幾大隻，不過份量少啲，青口就唔太新鮮，我食咗一隻已經覺得唔太新鮮就冇食，好友都話麻麻哋，整體嚟講呢一餐真係麻麻哋，係個河粉比較好食D😅

 

Ọ566 Specialty coffee boutique

今日去海港城試吓呢間新開嘅咖啡店，位置近住中港城嗰邊，之前係Omotesando ，知道呢個舖位係好細，間隔同以前都有啲相似，一入嚟就係整咖啡嘅地方，見到佢有賣咖啡豆，座位大概有廿個左右，如果order咗咖啡喺度飲，咖啡係有啲似Cocktail 咁，有啲咖啡有乾冰效果，我因為見到冇位，所以叫咗外賣紙杯，到我攞咗咖啡之後佢又有位，所以坐低飲，見佢啲咖啡豆最少有20 gram一小支咁賣，不過飲完就覺得一般，所以冇買佢嘅咖啡豆，或者下次試吓第二隻咖啡再睇吓有冇需要買🤭