今日去中環睇醫生，因為睇開嘅醫生1:30就走，所以趕喺12點幾過去，睇完醫生時間尚早，撞啱食晏時間，所以唔去食嘢住，因為周圍都好多人，就去孫中山紀念館行吓，佢位於堅道，搭半山行人扶手電梯上去，沿路見到好多大陸遊客，呢幾年中環都好熱鬧，好多遊客打卡，多數係國內人士，事實上中環有好多地點都係好有特色，好值得遊客打卡留念！
去到紀念館，館內冇乜人，呢度免費入場，只有四五個人喺裏面參觀㗎，呢個展館有四層，睇介紹呢度以前係富貴人家嘅住宅，孫中山先生曾經喺香港生活過，亦都喺呢度同好多人交流過，館內有唔少相都係呢度影，呢度嘅佈置都係百幾年前英式大宅嘅風格，保留咗一啲壁爐，亦有一個露台位置，都好啱影相，最重要係人唔多！去開呢邊可以過嚟睇吓！
去完紀念館，沿着鴨巴甸街行落去，喺PMQ前一個路口，去咗呢間叫Jus的麵店，之前一路都想嚟食，2:15pm 嚟到嘅時候啱啱好仲有一個位！不過2:30後就大把位！呢度有十幾個位，餐牌都非常簡單，主要係三款麵，最多人叫係招牌牛油拌麵，其餘兩款都係擔擔麵，可以另外叫餸，當然佢只有幾款餸，牛油拌麵就有齊晒，有牛叉燒、牛舌、牛筋凍、涼菜(芽菜)，湯，而飲品只有湯力咖啡同有氣伯爵檸檬茶，我叫咗牛油拌麵，冇想像中咁好食，雖然用牛油嚟撈麵唔會差得去邊，不過都頗”漏”，我見好多女士都食唔晒，有啲甚至剩咗半碗，我因為冇食早餐，所以都食得晒，個牛叉燒都唔錯，牛舌就好似湯渣咁，冇乜味，牛筋凍都係冇乜特別，整體嚟講有啲失望，可能期望太高，我諗女士們可能叫擔擔麵加牛叉燒就夠！因為食完個牛油拌麵之後都好滯！😅
沒有留言:
發佈留言