2026年4月昇龍道之旅Day 4 - 金澤近江町市場、兼六園、21世紀美術館、東茶屋街

今日第一站去近江町市場，今日用我哋嘅巴士一日券，佢呢度有兩條線嘅旅遊巴士可以用，一條係橙色線，另一條係綠色，有幾個旅遊點係兩架車都到，有啲地方就只係指定嗰條線先經過，魚市場兩架車都去到，只係搭一個站，因為兩班車嘅時間相差十幾分鐘，所以見到邊架就搭邊架，巴士一程車無論搭幾多個站，都係一律¥220，我哋一日票係¥800，即係搭四程已經回本！落車嘅時候，只需要show 一 show張飛嘅日期俾司機睇就得！

今日落雨🥹 日本天文台都好準😅 去到近江町市場，之前在網上看到有人介紹一間叫もりもり的迴轉壽司店，市場入邊有一間，我哋去食少少壽司先，去到門口寫住滿席要等位，攞張飛等位，好快就有位，不過入到去，見到都有幾多空位 🤔 我哋叫咗幾款壽司，因為唔想食咁飽，留肚陣間出去食其他嘢，所以揀咗幾碟熱門壽司，以迴轉壽司嚟講，質素唔錯，價錢偏貴，個人認為唔係好值得，(後來發覺呢間壽司店原來都頗多分店，我哋去過幾個地方都見到佢)，所以我覺得唔需要特意喺呢個市場度食！

個魚市場唔算好大，而且會檔賣嘅食物都係差唔多，有部份係真係街市形式咁樣賣魚，有部份係擺明做遊客生意即食刺身，佢大部份嘅檔口都係賣好大隻嘅生蠔，同埋松葉蟹及毛蟹，都係用冰冰住，唔係游水新鮮嗰種，但係啲蠔真係大得好誇張，不過間間都寫住唔可以影相，所以就冇影到，當然你有幫襯就唔同，我哋行咗一個圈之後，揀咗一間叫做高川物產，店嘅位置比較靜，見佢價錢比最旺嘅位置平少少，所以喺呢間食，生蠔我哋見到有幾款，佢攞住張圖解釋係唔同港灣出產，我哋揀咗最貴嗰款，石川產最大嗰兩隻，¥1,800 一隻，好大隻！好新鮮好好味👍🏻，我哋見到有隻毛蟹好生猛，只係¥3,500，諗住食埋隻毛蟹，不過老闆話要等半個鐘頭先烚得熟，佢另外有今朝煮咗嘅毛蟹，所以我哋就要咗隻即食，因為等半個鐘太耐，下次去呢個魚市場想食蟹，應該要第一時間訂咗先，然後先再慢慢食其他嘢，等佢可以慢慢煮😅 隻毛蟹佢切好晒方便我哋食，上次北海道食唔到新鮮嘅蟹，我哋都心念想食蟹，今次終於有新鮮蟹食，可惜呢度冇長腳蟹！新鮮蟹確實係鮮甜好多，食完隻生蠔都好飽，食埋隻蟹我哋就唔再食嘢！呢度亦都有唔少蔬菜，特別係筍，有啲舖頭淨係買筍，而且係好大個！我諗都係呢度嘅名物！

跟住我哋再搭巴士去兼六園，好友去過金澤，佢話一定要金箔雪糕，喺兼六園入口已經有一間叫箔一，好友話要去佢去過嗰間係最好食，所以我哋就冇喺呢度食，不過見到旁邊有間coffee shop，叫做Sway coffee roastery，就入去坐低飲杯嘢，好友唔係好飲咖啡，不過佢陪我飲，所以佢飲有奶嘅咖啡，我就飲齋啡，加上落緊雨，所以我哋想坐一陣，店入邊嘅裝修好日式風格，都坐得幾舒服，見到佢有買咖啡豆，但係見佢烘焙日子已經係成個月前，所以就冇買到，咖啡都幾好飲👍🏻

跟住行入去公園嘅嗰條街，見到有幾間舖頭，不過都冇開，只有一間糕店有開，我哋就行去售票處買飛入場，喺公園入面行咗幾個圈，又影吓相，公園入面既有櫻花又有紅葉，不過係少量，可能金澤唔係太多景點，所以入面都幾多人😅 呢度都有一間商店，又有一間食，店，我哋就冇乜嘢睇啱，行咗兩個鐘就走，順便行去對面金澤城影吓相，呢邊我哋冇買飛，如果連埋兼六園一齊買飛係會平啲，不過我哋對啲古城冇乜興趣，所以喺外圍影相就算，出返去巴士站等巴士去21世紀美術館！

好友話佢上次嚟冇去到美術館，呢間美術館最出名嘅就係佢有個打卡位，係一個假嘅泳池，個人企喺泳池入面，望返上去會見到其他人，又或者喺出面望返入去泳池，不過因為今日落雨嘅關係，泳池嘅頂部係沒有開放，因為佢係露天位置，即係話你想影返個人喺泳池入面係冇得影，而入去泳池裏面係要預約，不過可以即時做預約，我哋好好彩，只需要等30分鐘就可以入去，可能因為今日落雨，所以少咗人過嚟，我哋嘅入場券仲有優惠，因為我哋有一日巴士券，所以又平咗百幾円😆，我哋張入場券只係包1-6號館，而泳池就喺1-6號館入面，既然有半個鐘頭時間就行吓呢啲美術館，不過老實講真係冇咩睇，有幾個館係好細，只係一間房擺一件藝術品，基本上幾分鐘就可以出返嚟，有一兩個館係大D，多少少展品同埋有啲介紹可以睇吓，等到夠鐘我哋做就可以去泳池了，職員俾張中英文對照嘅說明我哋睇，入去泳池只可以逗留5分鐘，亦都勸喻大家唔好霸佔位置影相，等其他人都可以影吓，我哋入去嘅時候係我哋嗰一round最後兩個人，佢要落樓梯或者搭𨋢落去，去到個泳池見到有7-8 個人影緊相，跟住我哋就企埋一邊影，然後等人影完個扶手位，我哋先至影，影影下發現啲人走晒，得返我哋兩個，其他人可能夠鐘走咗先，我哋就係咁喪影，影得好開心，影到咁上下就走，睇吓時間原來影咗8分鐘🥹，不過奇怪一路都冇人入嚟，唔知係咪我哋啲round未走晒，所以唔放人入嚟住，我哋上去嘅時候就啱啱好見開始放緊人入去，好開心可以影到泳池呢個位，仲要冇人，好有更加興奮，因為上次冇入嚟，今次入嚟仲要影到咁多相😆出返去戶外位置影咗幾張相就走，因為仲係落緊雨🤦🏻‍♀️

跟住去搵西茶屋街， 好友話佢食嗰間金箔雪糕喺呢度，但係去到覺得唔對路，因為呢度條街好靜，啲舖頭全部冇開，而且呢條街好短，完全唔係旅遊景點咁，跟住我再上網查吓，原來有條叫東茶屋街先至啱！去返頭先嗰巴士站搭巴士，過返去東茶屋街嗰邊，我哋就已經搭咗五程車，已經回本了，去到東巢屋街，已經四點幾，一去到就見到好友講果間金箔雪糕店，睇吓店名叫做箔一，咪即係我哋喺兼六園入口嗰間🥹，不過呢度可能係總店，大好多，而且有其他產品售賣，我哋先嚟攞杯金箔雪糕，店員都好醒目，叫我哋拍video，佢整咗一杯軟雪糕之後，喺我哋面前攞一塊金箔，貼在雪糕上，好有儀式感😆，佢有個area俾你坐低食，仲要整條紅色嘅小橋流水🤣其實金箔係冇味嘅，不過個雪糕幾好食，個脆筒又好脆又好味，所以整體嚟講係好食嘅，價錢係¥1,188，就係貴喺張金箔度😅 食完雪糕喺個店度睇吓有咩賣，其實佢有啲手信，個樣幾靚，不過唔知好唔好食，亦都有金箔護膚品，如果要試用就要叫店員，可能佢成本高，所以唔會擺喺度任你試，試咗個金箔Nano lotion 覺得幾好，啲金箔搽咗上手，慢慢會融入咗皮膚，另外買咗支金箔潤唇膏，不過呢度冇得退稅，又唔知其他地方有冇得賣，所以就咁買咗就算！

食完雪糕行出去，見附近有幾間小店，行咗入其中一間睇吓，呢度都有金箔雪糕賣，仲要係金銀兩隻色，價錢仲要平啲，所以我哋忍唔住又買一杯食吓，睇吓金銀箔有咩唔同，買完又係可以坐低食，雖然預咗佢冇味，不過呢度嘅金箔，好似有少少渣，唔知係個純到唔夠，定一話係佢做得太厚，總之就係好似有塊膜咁，唔能夠完全用晒喺口，可能就係佢平啲嘅原因，不過杯雪糕同個脆筒都係一樣好食，呢間店除咗雪糕亦都係有埋一啲手信，不過我哋就睇唔啱，出嚟再行吓隔離幾條街，都有一啲商店賣手信同埋日本手工藝品，不過佢哋開始關門，呢度應該收六點，行咗個圈出返嚟，頭先兩間雪糕店都關咗門，所以我哋就出返去火車站，搭返巴士去總站落！

過到嚟又影吓個鼓門落緊雨嘅情況，跟住行吓附近嘅店舖，有個area係賣手信的，見到有一款金箔費蘭雪，但係佢只能夠擺幾日，到期日我哋都未返到香港，所以唯有放棄，跟住見到一款蛋糕，就買咗一件自己食，然後行返去尋晚個Forus 商場，睇吓有咩食，最後揀咗間金澤天丼的，好友揀咗個海鮮天婦羅丼，我就揀咗個天婦羅蝦蕎麥麵，另外叫咗天婦羅蠔同埋雞，食物就一般！食完嘢就返酒店執行李，聽日要過去富山，之前買咗JR立山黑部五日pass，聽朝去火車站換飛，然後就出發去富山！