2026年4月昇龍道之旅Day 5 - 京都車站、富山松川公園

今朝check out咗之後，又影吓個鼓門，因為今日出太陽！跟住就去火車站嘅JR窗口換飛，因為我哋之前喺香港買咗張pass，係要嚟到名古屋再換張實體飛先至可以用，其實Day 1 喺名古屋已經可以換，不過我哋未有咁快用，所以諗住嚟到金澤先至換，去到JR窗口，職員告知在這裏不能夠換呢張實體飛😱😱😱😱😱😱 跟住問佢可以喺邊度換？佢話最近去返高山或者過去京都！ 京都❓❓❓❓ 如果由金澤去高山要搭地鐵轉巴士，大概要兩個鐘多D，但係去京都可以直接火車去，喺敦賀站轉第二架火車，一個鐘多D就去到，我哋冇諗過金澤呢個都係大站，竟然冇得換飛❗️而且我哋嗰張pass後面有個QR code，個網頁顯示可以喺邊度換飛，都有金澤，但係職員話已經改咗唔可以換，再上網問AI都係話冇得換， AI俾我哋嘅解決方案同職員俾我哋嘅差唔多，如果我哋去京都換咗張車飛再過去富山，來回兩個人要比多3萬幾円🥺上網查過如果搭巴士，好似我哋嚟金澤嗰條路線，即係話經過白川鄉去返高山，巴士飛係最平，但係要提前一個月訂，即係根本買唔到即場飛，所以唯有搭鐵去京都係最快嘅方法🫣所以我哋商量完之後決定都係走一轉京都❗️❗️好後悔冇喺第一日在名古屋換飛！🤦🏻‍♀️🤦🏻‍♀️🤦🏻‍♀️🤦🏻‍♀️

搭火車去京都，中間會在敦賀站轉車，搭咗1小時40分鐘，就去到京都，先去京都駅八条口的JR 窗口換咗張pass，順便買埋過去富山嘅車飛，中間有接近4小時可以留喺京都，我哋去食個lunch，去咗火車站入面一間迴轉壽司店，叫做寿しのむさし，呢度價錢都算合理，質素都唔差，然後喺火車站附近影吓相行吓，因為我哋拎住行李，都唔行得太遠，就喺火車站嘅商店買下手信！真係要話俾人聽，特登走咗轉京都食晏😅🤣

京都搭火車去富山，只需53分鐘，我哋book嗰間酒店就喺火車站，即刻去check-in，然後同職員講今晚攞件行李俾佢哋寄，預計後日先去到松本嘅酒店，今晚返嚟仲有時間整理吓個行李， check-in完就出去行吓，上網睇過附近其實冇乜景點，原本想去一間好靚嘅Starbucks，不過好友唔飲咖啡，所以改咗去松川公園，睇吓仲有冇櫻花，過到去公園好靜，冇乜人，亦都冇櫻花，所以行咗個圈就走，加上開始天黑，行返去火車站，呢度有個賣手信嘅area，我哋睇啱咗啲嘢，不過諗住食埋飯先買，因為頭先經過一間海鮮店好似唔錯，睇完一輪揀好晒心水嘢就唔買住，去食飯先！

富山呢度有個富山灣，所以海產係特別豐富，尤其最出名係白蝦同埋魷魚仔，我哋見到嗰間食店叫做魚どん亭，門口擺咗幾盒冰鎮嘅魚同海鮮，見到有個螺好似幾好，去到嘅時候有位，我哋叫咗兩款海鮮丼，再加攞同埋白蝦刺身，海鮮丼嚟到嘅時候先見到原來佢本身有白蝦刺身，應該唔使另外叫，個攞肉好爽甜，好好味！兩個海鮮丼，貴嗰個係多咗海膽同扇貝，其他都一樣，雖然有個螺殼做裝飾，不過冇螺肉😅 海鮮丼都新鮮，味道OK，不過啲飯就食唔晒！因為佢都好豐富！

食完飯就去手信店買手信，我哋見到一間叫若廣的店，是賣鯖魚壽司，可以擺放兩三日，所以就買咗三盒，留返聽日上去立山黑部食，因為有朋友話，去到立山黑部，果度食物嘅選擇少，而且巨多人，建議我哋買定乾糧上去食，所以我哋就揀咗壽司！買完手信早D返酒店，要寄行李，明天仲要好早起身！

酒店住後感：
富山地鉄酒店 Toyoma Chitetsu Hotel
酒店嘅位置非常好，就在火車站旁邊，非常近，如果要去立山黑部，落樓下已經係 ESTA 電鉄富山站入口，好方便，附近JR 富山站亦都有商場可以行街買嘢！酒店嘅外觀雖然有啲舊，不過房間都唔舊！只係洗手間有部分發黃，兩張床是拍埋一起的，我哋要自己推開少少，空間唔多，不過我哋冇行李，所以問題不大！