在富山高速巴士站，乘8:10 的濃飛巴士往白川鄉，車程約40分鐘，先去便利店買個豚肉包做早餐，酒店有免費咖啡，所以唔使買，食完包就去搭車！
架巴士係會停白川鄉再去金澤，所以我哋稍後都會搭車去金澤，車程比想像中快，去到白川鄉巴士站，好多人，車站有啲大型及中型嘅locker，只有十幾個locker，細嘅¥500、大嘅¥1000，我見大locker可以放到兩個中型篋，不過喺火車站斜對面有間屋仔，佢有代客存行李，如果真係冇locker，就可以去屋仔度寄存，因為佢唔係locker，就冇尺寸限制，我哋只有兩件輕便行李，所以租咗一個細locker ，基本上一班巴士，已經佔用晒所有locker，後面再嚟嘅人，應該都要去屋仔度寄存，我哋用宅急便寄咗件行李去金澤，而家咁睇，其實可以唔使寄，直接寄存喺度，價錢就平好多！
放低行李就開始行入去白川鄉，因為我哋差唔多係最早嗰班車，所以暫時冇乜人，有好多個位置影相都唔多人，呢度都有幾棵櫻花，不過冇尋日喺富山見到嗰啲咁靚！行到咁上下越嚟越多人，因為陸續有唔同地方嚟嘅巴士，同埋旅行團，所以開始多人！
巴士站行過去會見到有一間叫做和田屋，可以付費入場參觀，我哋就冇入去，淨係喺出邊睇吓，跟住行到入去，有個鞦韆位，我哋有打鞦韆影吓相，旁邊有間小食店，我哋又買個飛驒牛肉包食，呢度可以坐低食，而且店前面有個牌，有日期，側邊仲有個木嘅水箱，裝住啲飲品，都幾特別！不過，個包味道麻麻地😅
我哋隨意咁行，行到去一個位，有間餐廳，裏面好似幾靚，不過佢只係招待團客，所以我哋入唔到去，就喺外圍影吓！跟住行咗去一個叫做明善寺嘅地方，呢度又係要付費入去參觀，今次我哋就有俾錢入去，因為呢度有兩三層，比起頭先和田屋只有一層，同樣價錢就呢度抵啲，所以我哋就入去睇吓，雖然只係睇佢嘅建築，入邊亦都擺咗啲以前嘅用具，又有啲介紹，又可以喺個窗度望返出嚟睇，相對抵好多！
行到咁上下去咗一間shop度睇嘢，呢度有個扭蛋機，係扭白川鄉圖案嘅布袋仔，佢一共有四款，有兩個神秘款，好友抽咗個，開出嚟睇覺得幾靚，我又抽咗一個，抽中咗神秘款，好友就再抽多四個，佢話用嚟做手信，佢好好彩抽到唔同款😅 （後來我哋喺第二間店見到同一款扭蛋，唔使抽，擺晒喺度你自己揀) 所以有興趣就去第二間店買好過！起碼可以自己揀款🤣
行到咁上下都要搵啲嘢食，老實講呢度冇咩好食，主要都係小食為主，見到有一間係食蕎麥麵，喺冇得揀嘅情況之下都要照食，要等一等位，好彩返枱都快！餐牌嘅選擇極少，基本上得幾款選擇！我哋揀咗炸蝦同燒鯖魚蕎麥麵，味道就一般！
食完飯繼續行街，我哋去咗食雪糕，佢有一款清酒雪糕，好友就揀清酒雪糕，我就揀牛奶雪糕，兩款都好味😋
跟住我哋等巴士上去展望台，雖然可以行路，不過係斜路，所以都係等巴士，好多人排隊，我哋係最後上我哋搭嗰架車果兩個，所以要企喺門口，好彩車程都好快，落車嘅時候見到只有兩個人等巴士落山，因為上山難落生易，所以落山冇乜人搭，上到去都好大風，望台呢度可以望晒成個白川鄉，個個都狂影相，跟住指示牌行落山，條路好易行，亦都好近，其實行上去應該都唔係太辛苦😅 我哋訂咗3:55 巴士去金澤，所以行到咁上下就去巴士站等車，先去locker攞返啲嘢，然後坐喺巴士站入面等，差唔多夠鐘巴士就埋站，車程要個幾鐘！
去到金澤，先去搵我哋間酒店，認領番我哋件行李，順便check-in咗先，見到酒店有賣巴士一日券¥800，就買一張聽日用，放低嘢就出去，我哋上網搵咗間餐廳，所以想去睇一睇先，餐廳喺火車站旁邊嘅Forus商場，我哋去到，訂咗位先，跟住喺附近行吓街，睇吓巴士喺邊度搭，又影吓個地標鼓門，等夠鐘先返去食飯！
差唔多夠鐘就返去攞枱，我哋去呢間叫做箔Haku 的食店，佢係食omakase，只有兩個套餐嘅選擇，我哋揀咗壽喜燒加壽司，見佢呢度大概只有20個座位，全晚只有16個客，佢係吧枱形式，圍住個窗邊，店員係會將食物捧到你面前，首先嚟一個前菜，係一嚿豆腐配魷魚仔，兩樣都幾好食，通常呢啲魷魚仔都會好腥，呢個就唔會，好新鮮！跟住係三款生蝦，店員捧咗三盤蝦過嚟，每款蝦有幾隻，我以為要揀一款，原來係每款一隻，佢只係講解呢啲係乜嘢蝦，之後先至裝上碟，再攞過嚟，有兩款蝦係各一隻，而富山嘅白蝦就一小堆，因為好細隻，三款蝦都係新鮮蝦，好味，尤其白蝦，平時好少有機會食到，難得咁細隻都咁新鮮！跟住係竹箂魚刺身伴芝麻醬、三款蔬菜、和牛壽喜燒在你面前即刻煮，原來每人只有一片牛肉😅加咗少少菜，跟住係天婦羅能登生蠔同埋白蘿蔔，個生蠔好好食，跟住係茶碗蒸同七款壽司，壽司嘅魚都係一啲Regular嘅魚生，唔係好特別，不過都新鮮，仲有個麵豉湯，我哋每人加多兩隻天婦羅生蠔，最後甜品係抹茶affogato，店員喺你面前整一碗抹茶，再倒落雪糕，然後先至交俾你食，個抹茶好濃郁，好食！整體嚟講食物嘅質素係唔錯，性價比算高，我哋就啱啱好飽，我見有啲外國人應該食唔飽🤭
食完飯又去影吓個鼓門嘅夜景，再去便利店行吓，然後返酒店休息！
酒店住住感：
Koko hotel (Hotel Wing international)
我哋訂酒店嗰陣時，酒店仲係叫做 Hotel Wing，見大堂有個通告， 4月1號開始改咗名Koko ，我諗可能收購咗，因為好多間Hotel Wing好似做唔住，消失咗，而呢間酒店嘅裝修唔係好似過往住過嘅Koko ，之前住過幾間，裝修格局都係以黑白為主，呢度就好明顯唔同風格，不過酒店嘅房間都唔算舊，空間都尚算足夠，我哋可以各自打開自己個篋喺地下，浴室空間都大，兩張床之間嘅空隙都闊，仲提供咗兩款枕頭，酒店大堂有提供包裝護膚品，呢兩年日本嘅酒店開始唔提供包裝嘅護膚品，我見房入面都有大支裝嘅護膚品，我諗佢派晒手頭上嘅包裝護膚品，就會轉晒用支裝，我就照用佢支裝嘅護膚品🤭
沒有留言:
發佈留言