今朝一早出發，要撘高速巴士往高山市，之前上網買左車票，用QR code 上車便可，先在便利店買早餐，再行去名古屋高速Bus terminal ，我地搭8:30 車，去到坐在等候室食早餐，發現原來呢度有便利店，可以過嚟先買早餐😅 食完早餐去7號閘等巴士，掃完QR code ，放好行李，就上車坐，上齊人夠鐘就開車！不過有人遲到，所以遲左兩三分鐘開車！
車程要兩小時，又係瞓覺嘅時候！行左一個鐘多D，去左長良川SA休息站，take 個break 得9分鐘時間要上返車，都有去手信店望一望，冇野啱，去個廁所就上車，約11:30 到達高山站！
巴士站旁是火車站，我地book 嘅酒店好近巴士站，過左火車站就係！我地去酒店寄左件行李去金澤先，因明天去白川鄉，不便帶行李(後來發現其實可以寄存行李在白川鄉車站)，在酒店找職員安排寄行李，剛好截單前安排到，可明天到達，我們只保留一日要用的物品，便寄走了行李箱！攪掂就出去行吓！
知道附近有條高山老街，跟地圖去睇吓！其實高山老街不只一條街，係一個area，我地要經過一條河，河上有幾條橋過河，都係老街的一部分，先去搵一間食飛驒牛壽司嘅店，叫做金乃こって牛，去到嘅時候大概有六七個人排隊，大家都係買一set三件壽司，兩件飛驒牛壽司係竹炭塩和ginger soy sauce，仲有一件係飛驒牛軍艦，佢係用一塊蝦餅當係碟咁裝住三件壽司，慳返唔使用膠碟，買完可以喺店入面坐低食，佢除咗壽司仲可以買啤酒飲，我哋就淨係食壽司，食完行過隔籬間舖頭食雪糕，店名花風華，我哋買咗一個抹茶雪糕同埋一杯雜莓雪糕，雪糕唧得好靚，味道都好好！坐低食完先繼續行！跟住又食咗五平餅，都係一個米餅，表面塗咗醬油，味道有啲似醬油團子！我哋喺附近繼續行街，沿路都見到有幾個位有櫻花，我哋都停低影咗輪，雖然只有幾棵，但係D花都好靚，我哋都影咗好多相！
行到咁上下，都有少少攰，見呢度有間叫做藍花珈琲店，就坐低飲杯嘢，店入面嘅裝修好有超和氣氛，好懷舊，裝飾亦都好細緻，每張枱都有一個小小嘅花瓶，大嘅枱仲有五個添，花瓶都係插咗真嘅花，呢度嘅咖啡杯擺咗喺一個櫃度，每個都唔同款，都好有特色，我哋叫咗一杯咖啡同一杯抹茶，仲叫咗一件Tiramisu一齊食，呢度環境靚，咖啡好飲，甜品好食，坐得好舒服😌
飲完咖啡繼續行，去咗一間賣味噌同埋醬油嘅店，呢度只有兩款味噌醬，可以試味，我我哋冇買味噌，但係買咗豉油，之後去咗一間賣清酒嘅店舖，佢呢度可以俾錢試飲各款清酒，可以自己去扭蛋機買一個扭蛋，入面會係一個清酒杯，然後攞清酒杯去裝清酒飲，我哋覺得個清酒杯幾得意，所以每人扭咗兩個，咁啱四個都唔同款，我哋冇嗜酒亦都冇買酒，純粹係扭咗兩個酒杯🤣
行到咁上下都天黑，又係要去搵嘢食，原先想去一間叫做丸明食壽喜燒，但係上網睇佢今日冇開，我哋行過佢間鋪都見到佢真係冇開，但係行行吓有見到第二間丸明，原來佢唔止一間分店，呢間就好多人，我哋諗住攞飛等位，但係都截咗攞飛，所以食唔到，跟住經過幾間食店都冇開，開始擔心冇嘢食，跟住見到一間叫做美円，剛好有兩個位，所以就入咗去食，我哋叫咗壽喜燒、葉燒牛肉、炸牛扒、大拖羅刺身、鯛魚壽司等，食物質素一般，壽喜燒其實得兩片，難怪價錢咁平，整體嚟講呢餐都係麻麻哋，話晒飛驒高山嘅牛肉應該好食，不過冇乜選擇，唯有係咁，食完飯行返酒店，先發覺酒店對面有間燒肉店，我哋晏晝經過嘅時候覺得佢好吸引，但係頭先醒唔起，早知返嚟呢度先食！跟住喺手信店行咗個圈，買咗包牛肉乾，諗住過兩日上山嘅時候食，跟住就返酒店休息！
酒店住後感 ：
TOKYU STAY Hida-Takayama Musubi no Yu
東急ステイ 飛騨高山 結の湯
酒店嘅位置非常好，旁邊就係高山火車站，同埋高速巴士站，作為一個接駁點，非常方便，附近有便利店和手信店，酒店亦都非常新淨，服務亦都很好，我哋住嗰間房都幾大，我諗佢本身係三人房，因為佢窗邊有一張長梳化，應該係一張單人床，只係冇放被鋪，就當梳化坐，最意外係酒店房間入面原來有洗衣機同微波爐，仲要係二合一洗衣機可以乾埋衣，可惜我哋行李已經寄走咗，而且只係第二日，都唔多衫洗！酒店亦都有溫泉可以浸，我就冇去浸，所以唔知個溫泉係咩情況，好友有去浸，佢話都唔錯！
沒有留言:
發佈留言