今日又瞓晏少少，我地又搭巴士落去名古屋，因為今朝要去柳橋中央市場，去到已經11點，不過見到呢度好多店冇開，佢有部份係街市形式嘅魚檔，我諗可能收咗檔，至於可以食嘢嘅地方，都唔算好多，大概佔三份一嘅店舖，而且行咗幾間都唔係太吸引，有一檔明顯係做遊客生意，嗰檔就比較熱鬧D，跟住我哋見到一間叫做魚河岸割烹鮮，係食海鮮丼，但係佢11:30先開門，所以喺門口坐低等一等，見佢午餐由¥1,200 起，除咗海鮮丼，仲有炸天婦羅丼，而且佢係有任食蕎麥冷麵，同埋南瓜沙律，見有唔少係打工一族嚟食飯，遊客相對少啲，而且見佢哋多數叫最平嘅海鮮丼，我哋就叫咗一個淨海膽嘅海鮮丼，一個有海膽嘅雜錦海鮮丼，都好新鮮，海膽雖然唔係好靚，但係都不過不失！呢個海鮮丼嘅三文魚籽好食啲，呢個旅程食咗幾次，呢個最好食，其餘嘅都唔係三文魚籽，所以味道怪怪地！😅
食完嘢喺附近行吓消化吓，行去大名古屋大廈，呢度有個商場，亦都有空中花園，呢期做緊Miffy，又上去影吓相！喺商場食咗杯番薯雪糕，都幾甜！跟住去高島屋超市度行吓，買咗半個芒果食，味道唔錯，不過唔夠甜，都係菲律賓嘅芒果甜啲😅
跟住搭返車過去榮，主要去綠洲21睇吓，上次嚟都有去過，記得喺商場飲咗杯3D咖啡，間餐廳已經冇咗，我哋行去電力塔個公園坐吓，然後行去榮嘅中心一帶，睇定今晚食乜嘢，然後去大須新天地通行街，行過一間廟見到有人整年糕，仲有免費派發，不過條隊好長，所以我哋冇排，跟住見到一間書局好特別，裏面嘅裝修好得意，同一般書店嘅擺放好唔同，一入門口仲有呢間書店嘅模型，可惜全部係日文書😅
行到咁上下，出返去搵我哋頭先睇啱咗一間食串燒嘅舖頭，叫做炭火やきとり豆鳥，去到舖頭見到有兩個位，不過佢哋話留咗俾人，叫我哋上樓上，上到樓上見到煙霧彌漫，因為有人食煙，其實呢度得四張枱，有兩張枱共七個人，都有幾個食緊煙🚬，都迫於無奈照食，用AI翻譯餐牌真係非常之準確，我哋手指指餐牌去落單，見到店入面今期有幾款期間限定食品，有串燒提燈，即刻叫返兩串試吓，佢呢度落order每樣串燒都最少要落兩串，原本想每樣叫一串試吓先，而家唯有每人一串，串燒做得唔錯，一食個雞髀肉就知道，夠唔夠Juicy，味道調得好唔好，一食就知，確係做得唔錯，我哋其中叫咗款雞心邊，幾特別，口感有啲煙靭，幾好食，見佢雞肝有分白肝同埋砂肝，兩款都叫嚟試吓，白肝好好食，以後食串燒都要食白肝🤣，好Juicy，平時啲雞肝係好似粉粉地，但係呢個有少少爽身，所以我哋要encore😋提燈都要encore，雖然佢個樣冇平時嗰啲橙色蛋黃咁靚，蛋黃係淺黃色，但係味道唔錯！整體嚟講，我哋對呢餐都好滿意，唯一係有人食煙，而且空氣唔流通，如果坐樓下就好喇！因為呢間舖冇門，坐樓下就空氣好流通！我哋一食完要即刻走，成身吸晒煙味好臭，要快啲返酒店沖涼洗頭🫣
沒有留言:
發佈留言