星期日, 10月 25, 2026

2026年10月大阪、仙台、青森之旅 - Day 1 大阪難波、心齋橋















成個夏天都冇去旅行,終於等到天氣冇咁熱,可以出發了!

今次先去大阪獨遊幾天,因為沒有凌晨機,所以搭早機,先去lounge食個早餐,好友用積分換咗lounge嘅優惠券,可以入去食嘢,今次個閘口喺520號,要搭接駁巴士嗰種,呢個位地方比較細,所以好多人,delay 左小小,飛機準備起飛時我已經瞓着咗😅瞓咗差不多三個鐘,跟住就係等降落!
















到步後買咗張Rapit來回車飛,雖然會喺仙台返香港,但係我要搭內陸機由大阪去仙台,所以買咗來回車飛,40分鐘就去到難波,先去酒店放低件行李,然後出去搵食!

行咗去千日前嘅道具街,上次見到有一間類似挽肉と米嘅食店,都係燒一舊舊免治牛肉,配白飯,不過佢呢度嘅免治牛肉係任食,任食30分鐘¥2,000,60分鐘就¥2,500,如果揀貴啲嘅和牛套餐就要¥5,000-6,000,半個鐘就有啲趕,所以都係揀一個鐘可以慢慢食,每個位前面都有一個小炭爐,店員會放一嚿肉,嚿肉係已經熟咗,只係Heat 住佢,佢有一盒生雞蛋放旁邊,都係任食,佢哋用嘅係蘭王雞蛋,只要你一食完嚿肉,店員就會即刻上第二嚿肉俾你,我前後食咗五嚿,非常之飽,食飽就可以將枱面有個牌,寫住唔使再添加個面向店員,佢就唔會再俾肉你,其實都幾抵食!



















食完飯就去心齋橋行吓,順便影吓固力果跑跑人,因為下個月會拆咗第六代跑跑人,再換新嘅第七代,所以趁最後機會影吓佢!跟住再去附近行藥妝店,我發覺喺大果間Donki 後面嗰條街,開咗幾間藥妝店,都係一啲不知名嘅小店,但係佢哋嘅價錢都好平,其實舊年已經見到,但係因為見到兩間店員都係講國語,所以都唔係好敢幫襯,今次再去,相隔一年見佢仲做緊,而且多咗一間係泰國人開,佢哋嘅產品都平過晒其他藥妝店都幾多,因為有朋友叫我幫佢買藥,所以我影咗360度嘅產品相,等好友同屋企嗰盒做比較吓,比較完之後發覺所有嘢係一樣,所以就買少少試一試,可惜佢哋冇FANCL嘅產品,舊年幫襯過一間賣FANCL產品係比較平嘅藥妝店,但係嗰間反而執咗😅行到九點左右,就返酒店休息!


















酒店住後感:
Hotel Asiato 藝術酒店
酒店就在黑門市場最南邊嘅入口,由難波站行過去大概7-8分鐘,呢度可以話係旺中帶靜,旁邊嘅黑門市場好熱鬧,但係轉出嚟就變咗好靜,酒店附近視線範圍內都冇便利店,要行返出大街先有幾間,酒店接待處好細,一入門口就係個counter,旁邊擺咗一D自取嘅日用品護膚品等等,側邊仲有一個角落位置,供應免費飲品,酒店有兩部電梯,上到房,房間嘅空間唔算大,只可以放到打開一邊嘅行李箱,梳妝台都算大張,仲可以拉張凳出嚟坐,房間嘅裝修都好新淨,價錢亦都好相宜,單人房三晩只是港幣$1,000,職員也很友善,下次都可以考慮再住呢度👍🏻








 

沒有留言:

2026年10月大阪、仙台、青森之旅 - Day 1 大阪難波、心齋橋

成個夏天都冇去旅行,終於等到天氣冇咁熱,可以出發了! 今次先去大阪獨遊幾天,因為沒有凌晨機,所以搭早機,先去lounge食個早餐,好友用積分換咗lounge嘅優惠券,可以入去食嘢,今次個閘口喺520號,要搭接駁巴士嗰種,呢個位地方比較細,所以好多人,delay 左小小,飛機準備起...