今日諗住搭12點嘅巴士去機場，朝早check out咗件行李放住喺酒店先，然後行去榮火車站買手信，好友喺Donki買咗指甲油，跟住我哋去三月地庫睇手信，買咗少少蝦餅同朱古力，仲可以退稅，搞埋退稅再返酒店，喺附近便利店見到有新出嗰隻Pierre Hermé 朱古力飲品，就買嚟試吓，都幾香滑，不過唔算好特別，我哋上車嘅巴士站係總站開出嚟第一個站，我哋嘗試行過去總站睇吓，見到都冇人排隊，所以就返酒店攞行李，就咁喺對面等，決定唔拖件行李去總站了！
巴士嚟到冇乜人，我諗佢去到榮火車站會多人啲，果然去到真係有好幾個人上車，我哋搭Hong Kong Express，要喺T2搭，我上次喺T1，見到機場都幾大，都幾多嘢睇，但係T2係完全相反，只有三間廉航喺呢度辦理登機手續，過咗海關之後，只有三間食店，一間免稅店和一間手信店🤦🏻♀️原先諗住買蝦餅，呢度冇我想買嗰隻牌子，唯有買其他嘢代替，三間食店分別係食鰻魚飯、咖喱、拉麵，我哋揀咗食拉麵，食完飯買完手信都冇乜嘢做，唯有坐喺度等，呢度得幾個登機閘，除咗Hong Kong Express，其餘兩間係菲律賓同台灣嘅廉航，班次亦都唔多，所以啲舖頭係冇人，如果由名古屋返香港係去T2的話，建議喺T1 行完街買完嘢，先慢慢去T2辦手續登機🥺
返到香港，我哋去食小籠包，接機大堂擺咗隻巨型貓貓，當然要影吓相啦！總結今個行程，一共用咗10日，好友用AI去安排行程，大致上行程同酒店都理想，不過喺兩次寄行李嘅安排，我就認為由高山去白川鄉可以唔使寄行李，因為行李可以上巴士，落咗車可以寄存行李喺火車站嘅locker，或者寄存行李嘅店舖，上巴士嘅時候又可以擺行李，巴士直接去到金澤火車站，每件行李¥1,000，寄行李要¥2,920 ，平一半有多，當然你想行李點對點去到酒店，就可以用宅急便寄！JR pass 就盡早換飛先，以免好似我地咁，要特登搭長途車去換飛😅
沒有留言:
發佈留言