2026年4月昇龍道之旅 Day 8 - 名古屋市

成個旅程過咗七日，日日都要早起起身，今日終於可以瞓晏少少，瞓到自然醒，我早咗起身，好友繼續瞓覺，就落去大堂攞杯咖啡飲，咖啡係預先沖好用一個暖水壺裝住，放喺大堂接待處前面，我斟咗一杯就上返房飲，等埋好友起身搞掂晒就去check out!

我哋book咗10:00車飛去名古屋站，我哋個pass包埋，車程要兩小時，去到名古屋站，我哋喺附近行一陣，因為我哋book咗食蟹，仲有差唔多一個鐘先夠鐘，所以我哋喺火車站嘅商店行吓睇吓嘢，見到有啲雞翼手信，見佢有三件裝，所以我哋買一包試咗先，先決定買唔買手信，買完手信就行過去食lunch!

我哋day one已經book咗かに本家，早咗幾個字去到都冇問題，我哋keep咗行李喺接待處，就要上一層，全部要除鞋，樓上係完全個室，雖然係榻榻米，但係可以坐嗰隻，對腳伸喺枱底嗰種，我哋一早已經揀咗兩個set lunch紋別會席餐，再加多一個雪場蟹+長腳蟹刺身，雪場蟹係蟹鉗，長腳蟹就只有幾片肉，另外加一個黑醋炸蟹鉗，套餐有蟹肉豆腐、忌廉焗蟹、熟雪場蟹腳、炸蟹餅、壽司等等，個刺身好好食，所以我哋叫多一份，都食得夠飽，今個旅程終於有兩餐新鮮蟹🦀食，正！😋😋

食完飯返酒店check-in，呢兩晚將會住喺榮，一出門口見到有架巴士係可以去榮，就諗住搭巴士過去，點知我哋上錯車，去咗相反方向😅唯有搭一個站落返車，行過對面搭巴士，巴士無論搭幾多個站都係¥210，我哋間酒店喺榮站同伏見站之間，搭巴士反而啱路，落咗車行落一個街口，轉入去就到， check-in 放低行李又出去！

先去搵咗機場巴士個站，睇定後日喺邊度搭巴士走，跟住就行去榮站，呢邊都幾熱鬧，我哋搭地鐵去大曾根站，因為好友要幫佢細佬買眼鏡，要去到嗰度先有，搵到間眼鏡舖，亦都有賣佢要嘅牌子，可惜冇佢要嘅款，見附近有個商場就過去行吓，入面有幾個大牌子嘅連鎖店，不過我哋就冇嘢睇啱，反而見到有支3.8牛奶想買嚟飲，所以我哋去Daiso買咗紙杯，就可以share嚟飲，味道都唔錯，不過唔算好濃郁，跟住我哋行返去火車站嘅時候，見到有間成城石井，原本想買ginger ale，見到原來有一款係10倍嘅薑味，雖然未飲過，但係我哋都每人買咗四支🤣

搭返車去名古屋站，因為上網search高島屋都有嗰個牌子眼鏡，不過去到都係搵唔到佢要嘅款，買唔到嘢，就去搵嘢食，因為都夜喇！喺高島屋見到一間八かく庵，食吟釀蒸し，其實佢主要係食豆腐製品，基本上全部食物都係好清淡，因為佢係食原味，唔添加其他嘢，如果想食得清淡，呢個都係一個唔錯嘅選擇，我哋叫咗兩個套餐，一坐低佢就俾咗一杯好細杯嘅豆漿我哋，好濃嘅豆味，但係冇落糖，所以都好淡味，跟住嚟咗一碗豆腐花，同樣係乜嘢都冇落，可以想像到豆腐花咩都唔落，係好清淡，不過佢咁先食到佢豆味都好濃郁，而且豆腐花係可以refill，跟住係三款用豆腐做嘅前菜，仲有一個係蔬菜做嘅前菜，跟住係一碗焗薯，主菜就係蒸牛肉，牛肉下面舖咗啲菜，牛肉嘅肉味都好濃，不過蒸過咗火，有啲韌，跟住蒸枝豆同壽司，仲有雲吞，個配搭都好特別，跟住嚟一個腐皮壽司，甜品係豆腐果凍，所以成餐都係食豆腐為主😅我覺得清清地都幾好，食咗咁多日肉，呢一餐清吓腸胃，唔錯！

餐廳附近有間賣水果嘅店，見到士多啤梨都唔錯，所以買咗一盒返酒店食，食完飯搭地鐵返酒店，酒店本身有提供宵夜拉麵半個麵份量，我哋就去食麵先，順便攞今日買嗰包雞翼，加埋落個麵度試吓，個雞翼就麻麻哋，所以決定唔使買嚟做手信，食完麵好友就去浸溫泉，我就返上房沖涼瞓覺！

酒店住後感：
Dormy Inn Premium Nagoya Sakae
酒店嘅位置距離榮車站，步行大概8-10分鐘，如果伏見站，都係差唔多時間，因為伏見站嘅出口都要行一條長嘅隧道，而且好多個出口冇電梯，由最近嘅出口行去酒店大概2分鐘，只係隧道都要行5-6分鐘！不過我哋只係搭咗一次地鐵去酒店，我哋選擇搭巴士仲方便！同其他Dormy Inn酒店一樣，酒店都有得浸溫泉，有免費宵夜拉麵，溫泉門口有雪條，早上有益力多提供，酒店嘅房間唔算舊，洗手間同洗面盤係分開，浴室冇浴缸，因為有溫泉，所以只有花灑，房入面嘅空間唔多，我哋都要移動吓啲枱凳先至放到兩隻篋，佢喺睡房同廁所之間都有道門，夜晚可以關咗個門，酒店仍然係每日執房，而家日本好多酒店都係三日先至執房，最多係換毛巾，呢間仍然保留每日執房，都算少有！