尋日喺立山黑部行咗一日，今日繼續行！😅
今朝book 左由新島島去上高地巴士8:00 班次，所以我哋搭7:15火車，由松本駅去新島島駅，車程35分鐘，架火車係普通車，即係站站停，佢冇特急車，所以你搭邊一班都係站站停，下一班車係8:01 ，呢架火車係唔可以用IC卡出入閘，一定要買一張實體飛，我哋喺松本JR站，買咗一張實體飛¥720，正常咁用閘機過，但係在新島島出閘嘅時候係人手收飛，冇閘機，火車沿路經過每一個站，都係好細好舊，證明呢條線平時係冇乜人搭，我諗係去上高地嘅人先至會喺度搭車，好少人中途上落車！
去到新島島，落車嘅時候全部人都係去轉巴士，我哋只有10分鐘時間去個廁所，就要上巴士，巴士會停幾個站，我哋選擇喺大正池站落，因為網上建議由大正池開始行，向返巴士總站方向行，不走回頭路，最後喺巴士總站搭返巴士走，咁就最順路，除非你又咁嘅體能，想來回行一轉，因為近巴士總站嗰邊，係有條河，有啲人可能想行河嘅兩邊兜一個圈，影晒兩邊嘅景色都唔定！
55分鐘車程去到大正池，好多人同我哋一樣都落車，車站呢度有間喫茶店，亦都有少少嘅商店賣吓手信，我哋跟住其他人順路行，首先會在大正池邊影吓相，今日涼涼哋，但係又有太陽，所以唔凍，尋日已經曬紅咗，所以今日就開遮，因為頂cap帽喺行李篋，要今日先到酒店，唯有開遮😅大正池呢邊望到小小雪山，我哋沿着條路行大概行咗接近一個鐘，中途又影吓相，就去到田代池濕原，去到呢度開始多人，有一班好嘈嘅國語人，應該係台灣人，要趁佢哋未行埋嚟池邊，就要即刻影相走人，因為佢哋會一字排開企喺度影好耐，又要擺甫士又要輪流影，要等好耐先至等到個中間位，而且好嘈吵，有一兩個位置我哋都放棄咗影，因為唔知要等幾耐，不如早啲去下個點🫣
行多一個鐘左右，去到個位係何邊，我哋行嗰邊冇乜人，對面岸就好多人，因為對面岸影個雪山靚啲，而我哋行嗰邊就影對面嘅樹靚啲，最重要係冇乜人，我哋直程行到去河邊，係可以掂到啲水，因為冇人嘅關係，我哋係咁狂影相，又拍片，玩咗半個鐘，先繼續行🤭
用咗三個半小時，終於去到最終點，河童橋，呢度係最最最多人嘅地方，因為呢度有幾間商店同食店，而且係巴士總站嘅所在地，所以係最多人嘅地方，我哋都要喺呢度食lunch，搵咗一間叫做五千尺，喺商店樓上，去到攞咗飛先，見佢劃分咗兩邊，一邊係團餐食指火鍋，另一邊係Walk in客，見到佢其實有位，不過應該啱啱招呼完一個團，成個團走咗，但係D枱都未執，而Walk in嗰邊都有位，不過得一兩個Staff，又要上餐又要執嘢，所以唔係第一時間帶位，等咗幾分鐘先至開始叫Number，我哋前面有兩組人，所以都好快有位！餐牌主要係兩款牛肉，同豬扒類別，不過兩款牛肉都話賣晒，我哋就揀咗兩款豬扒，另外加一份炸雞，豬扒同炸雞嘅味道都唔錯，都算Juicy😋 而且我哋坐喺窗邊，可以影落去條河童橋，就見到有幾多人！
食完飯又係手信時間，因為我哋book咗四點嘅巴士，未夠鐘，我哋行咗兩間shop睇嘢，買吓手信，又食吓雪糕，又周圍影吓相，等到差唔多時間，就行去巴士總站排隊等車，巴士總站嗰度都有商店，又有洗手間，因為呢程巴士要個幾鐘，所以去一去洗手間係必須的🤭 而我哋搭16:00 呢班車，係開兩架巴士，證明係好多人呢個鐘數走，去分開1號車同2號車，我哋搭1號車！在巴士總站見到有上高地開山祭，後來睇返報道，係明天舉行😅
巴士17:05 去返新島島駅，我哋今朝上車地方，但係去松本嘅火車要等十幾分鐘，因為有兩架巴士一齊到，所以排隊搭火車嘅人都好多，不過我諗都唔使急於排隊，因為我哋係搭火車，火車相對多位好多，如果唔排隊，最多可能要分開坐，不過呢個巴士站冇嘢睇，唔排隊都冇咩做😅 大家都係排住隊睇手機🤣 呢度都係人手收飛，因為我哋係網上買咗飛，所以淨係show email俾佢，佢就會俾一張飛仔我哋，陣間去到松本出閘用，呢架火車又係普通車，站站停，不過呢架火車嘅車身油咗一啲卡通公仔，所以大家都影吓相先上車，火車開嘅時候我見全部人都有位坐，仲有位剩，當然中途都有其他人上車！
返到松本已經接近六點，我定決定去尋晚食唔到嗰間叫做 鳥こまち 串燒到訂枱，去到門口見侍應企咗喺度，問佢可唔可以book枱，佢用翻譯機話佢哋冇英文Menu，我哋又用翻譯app話佢知我哋可以用翻譯軟件，最後成功訂咗枱7:30 ，佢呢度有張紙仔俾你✅食啲乜嘢嘢串燒，我哋攞咗張紙返去翻譯，先返酒店攞返件行李，休息一陣先再出嚟！返到酒店，行李已經到咗，我哋攞返上房，大家各自返房整理自己嘅行李，然後一齊研究吓將餐紙，翻譯好之後就揀定食乜嘢！差唔多夠鐘就落去食嘢！今晚同琴晚爭好遠，因為尋晚係星期六，所以好多地方都冇位，今晚呢間串燒店，大概只有五成滿坐，我哋揀咗一個set 有十本串燒，再加一D想食嘅串燒，串燒嘅質素唔錯，好食，又叫咗一個炸山藥，都幾特別，整體嚟講我哋都好滿意！食完飯例牌去便利店行吓，然後返酒店房飲埋支牛奶，就係呢個時候，睇電視上高見到，原來可以有廚具借用，可惜我哋住埋今晚，所以冇機會自己煮了😅
沒有留言:
發佈留言