聖誕北上 - 極炙、麟嶼Sanlin The Island、蒲匠

早兩日同好友傾開偈，大家今日都冇節目，所以就相約一齊北上食野，我哋都驚會好多人，不過我哋早上10:00集合咗一齊搭車上去，又唔係好多人，同平時差不多，後來睇新聞先知下午係超多人，可能今日係假期嘅原因，過中國海關嘅時候，我哋冇攞行李箱，可以直接入境，唔需要過X光機，咁就快好多！由火車站出嚟見到地鐵排晒長龍入閘，我哋call車都唔係即刻有車，而且等車嘅位置都企滿晒人，所以我哋行過去一個少少嘅位置，咁就call到車，第一站先去食燒肉！

去左一個小區，呢度冇乜人，我哋直接去搵嗰間燒肉店叫做極炙，我哋叫咗個套餐，餐牌上高係冇嘅，要掃碼點餐嘅時候先見到，有前菜沙律、兩隻蠔、六款牛肉、三款牛舌、仲有一碟牛肉，同埋甜品水果，呢個應該係二人餐，我哋三個人食，就係唔想食咁飽，留肚陣間去飲嘢😅呢度係用炭爐，有專人幫你燒，質素都唔錯！

食完晏就去附近行吓，去咗搵一間霸王茶姬，坐低飲杯嘢吹吓水！然後搭車過去深業上城！

之前嚟過一次，上次呢度係冇咁熱鬧，今次有個area叫做The Street，呢個位置係半露天，全部都係食店，原本想去一間意大利餐廳，但係超級多人等位，所以去咗另一間Cafe 麟嶼 Sanlin The Island ，食件cake，我哋冇叫飲品，因為佢選擇唔多，又唔想飲咖啡，所以淨係食件cake!

跟住再喺商場行咗一陣，就去攞飛等位，意大利餐廳仍然好多人等位，所以我哋上咗樓上見到有間叫做蒲匠，呢間都頗出名，我哋攞咗飛先，因為佢應該啱啱入晒一轉，所以應該冇咁快有人走，又喺附近行吓，睇佢哋嘅餐牌，佢係做任食，有牛肉同埋海鮮，因為有一個好友唔食刺身，所以我哋就冇叫包刺身嘅套餐，佢仲有烤榴槤，飲品又係任飲，食物嘅質素都唔錯嘅，我哋主要係想食蒲燒鰻魚，鰻魚肉都幾肥美，不過我唔係太喜歡個蒲燒汁，我哋食到好飽，所以食完就出去行吓先！

呢度經過條天橋會過到去對面蓮花山公園，上次日頭嚟過想行，但係當時好熱，今晚就可以行過去睇吓，不過佢只係一個公園，所以冇咩睇！

行返出去搭車過去海關，早少少返香港，回程都唔係好多人，所以都好快過到關！