期待已久嘅張學友演唱會，終於返嚟香港，我從來未聽過佢嘅演唱會，只係覺得佢已經60幾歲，再唔聽嘅話可能都唔會再有機會，托朋友買咗張飛，自己一個人去聽，佢喺紅館開，三面台，自從去完啟德主場館之後，而家覺得紅館好細，不過好處就睇得清楚啲，正如佢自己都話，佢去過世界咁多地方演唱，紅館真係非常之細，但係曾幾何時係佢哋歌手夢想要去嘅地方，所以佢對紅館都係有情意結！
入場嘅時候，工作人員每人派一個口罩，好搞笑，可能驚我哋有人身體不適傳染到佢，因為見佢出入紅館都戴口罩，可能驚病咗會表演唔到！一開場連續唱咗四首歌，都係比較輕快嘅歌曲，中間換衫嘅時間都係一兩分鐘，都傾咗兩三次計，佢講嘢都幾風趣，話自己係64歲嘅老人家，因為佢話睇新聞嘅時候，新聞報道都會話”一名60歲老翁….”，所以佢覺得自己係老翁🤣🤣🤣 不過佢即時表演做到一字馬😮之前睇過唔少影片，都話佢唱歌失準，走晒音，今晚見佢冇走音，不過間唔中有一粒音會甩甩地，始終都唱咗三百幾場，加上之前中過COVID，以佢呢個年紀我覺得算係咁，之前第一晚佢唱完之後，流出嘅歌曲名單，有李香蘭，但係今晚佢冇唱，因為呢首歌都唔容易唱，好彩佢唱咗我最鍾意嘅舊情綿綿！😍😍 整體嚟講，都好滿意，佢話70歲嘅時候希望仲有人會嚟聽佢開演唱會，我諗佢70歲嘅時候唔知仲唱唔唱到😅如果佢仲唱到，我一定嚟聽😆
沒有留言:
發佈留言