今晚約咗好友去佢屋企食飯倒數，因為佢住喺荃灣，所以我晏晝就出去荃灣食啲嘢先，都有一段時間冇去荃灣，一直想去如心酒店嗰間餐廳，今日終於可以去啦，今日餐廳冇乜人，得三四枱客，我主要係想影佢個餐廳入面，有個位置係好靚樓底好高，十足十外國嗰啲教堂咁，叫咗一個芝士薄餅，一杯咖啡，薄餅比想像中大，味道都唔錯，佢係有幾款芝士喺裏面，一攞埋嚟已經聞到Blue cheese嘅味道😅 自從有一年聖誕食咗Blue cheese之後食物中毒，一路都冇再食過，我見佢有焗過，所以都唔太擔心😆咖啡都幾好，食完嘢係咁影相 影返夠本🤣
跟住喺酒店後面個公園度行吓，我都唔知呢度有個木化石體驗館，所以入去睇吓，佢係唔使收費，可以自由出入，呢個館嘅外型似係幾個貨櫃箱組合而成，入面有啲水晶同埋木化石嘅標本，又講解一啲木化石嘅形成，全程幾乎只得我一個人，係去到有個位有凳坐嘅地方有一個人坐咗喺度，其餘展覽嘅位置都冇其他人，行返出嚟見到公園嘅位置有一組假嘅恐龍骨，應該係可以俾小朋友埋去玩，因為佢係有啲沙喺地下，好似俾小朋友去挖掘化石嘅體驗，都幾特別！
跟住行過去荃灣廣場嗰邊行吓，收到好友order要買水果，所以去一田嗰度睇吓，買咗包藍莓，跟住見到有早排好熱賣嘅急凍生蠔，所以買兩包返去好友屋企食，由荃灣廣場行返去好友屋企，就係等於荃灣西站行去荃灣站咁遠😅去到佢屋企，都冇乜嘢要準備，因為好友已經準備好晒，淨係等埋另外兩個朋友嚟，就可以開餐，佢哋差唔多到就通知我哋，好友就煎定牛扒，今次佢經朋友介紹買咗條牛扒試吓好唔好食，除咗牛扒我哋仲有沙律、壽司、刺身、芝士同火腿，仲有我頭先買嘅生蠔，一路食嘢一路傾開嚟緊三月我哋一齊去福岡，所以一齊睇YouTube，睇吓人哋介紹福岡嘅景點，傾定有啲咩地方要去，睇到咁上下都差唔多夠鐘倒數，開住個電視機同埋手機一路拍片一路倒數，每年都係呢班朋友一齊倒數，希望新嘅一年大家最緊要身體健康，事事順利🥰🥰
沒有留言:
發佈留言