2025年11月日本東至西長途旅行 Day 18 - 勝尾寺、箕面市、難波

嚟過大阪咁多次，都未去過勝尾寺，今次就去睇吓！
先去千日前嗰間東方酒店旁邊嘅星乃咖啡店食個早餐先！搭御堂筋線，坐到去總站箕面萱野站，呢度得南北兩個出口，北口會比較近啲，其實兩邊都可以去到巴士站，只係車頭嗰邊定車尾嗰邊出，南口就要過馬路，基本上呢度最多人搭係30號巴士，見到排晒長龍嘅就係去勝尾寺😅 平日係30分鐘一班車，週末假期就20分鐘一班車，車費¥800，車程約20分鐘，巴士直接去到勝尾寺門口，入場費¥500 ，會比一張空白的明信片你，等你自己逐個點印顏色上去，一共有六個地點，由A-F，只要順路行足全程就可以集齊！

勝尾寺嘅特色就係周圍都係達磨，而且呢度地方都幾大，呢度最大嘅打卡位，就係一大堆達磨，呢個位要排隊影相，不過佢嘅排隊有啲亂，只有一個人守喺入口，上面有冇排隊都唔知，都係靠自己見到有位就埋去排🤔因為佢分開咗幾條隊，要排邊條你自己決定，你見到條隊可能得一兩個人，但係嗰兩個人可能影好耐，不過今日唔算好多人，所以每條隊都係排一兩個，喺排隊影相嘅呢一邊，佢條隊都有一堆達磨，喺排隊入口嘅達磨另一邊，仲有兩堆達磨可以影，不過呢個位唔可以行入去，如果想影冇人嘅達磨就要喺呢度離遠影！好多人見到達磨就去影相，忘記咗第一個印明信片嘅位置其實就係旁邊！我都係遺忘咗，去到最後先至印返，因為第一個點同第六個點其實喺好近，只係兜咗一個圈返嚟，每個點都有大約10-15 位俾你蓋印，所以唔使急，建議直接用力按一下，不要搖動按壓個印章，否則印出來會有殘影😅

沿路行，係小小上山嘅路，有座彌尾寺，對面係售賣達磨同埋御守嘅地方，呢度都要排隊，因為好多人買一個細嘅達磨，裏面有一支籤，通常啲人攞咗支籤出嚟之後，就將個達磨放喺勝尾寺任何一個位置，所以會見到好多細細個嘅達磨，當然有啲人會買大個少少，再大個就要擺喺頭先好多人排隊影相嗰個位！因為每年去到12月29號就會將D達磨燒咗佢，見到售賣嘅達磨有好多唔同嘅大細，最大嘅去到廿萬円一個😅我就只係買咗一個金色嘅達磨鈴鐺 😅 沿路會見到其他蓋印章嘅點，順着次序A-F 去蓋就得，如果你見到自己skip咗一個，就可以轉頭搵返！

呢度周圍都係細嘅達磨，沿路嘅風景都幾靚，任何一個位置都可以做打卡位，呢度有一個湖，中間有個鳥居，沿住個湖行返落去入口嗰邊，蓋埋最後一個印章，就完成咗張明信片，可以喺湖邊影返張相，我又攞返張明信片去果堆達磨度影相😆 臨走之前，當然係去商店shopping，呢度所有商品都係有達磨圖案，我見到有薯條，都好想試，但係個篋真係冇位放薯條，所以我淨係買咗一包即食麵😅

走嘅時候去返巴士站排隊，呢程巴士都係¥800，如果有四個人，都建議搭的士，呢度有個牌寫住四個人¥3,200搭21分鐘，的士約¥3,600 搭15分鐘，不過我見冇的士，可能呢個鐘數冇乜人上嚟，如果早啲可能會有車，因為我嚟嗰陣時見到有的士喺度等客，所以搭的士係15分鐘，但係等車就未必慳到時間，巴士嘅人龍都好長，不過車都好密，基本上上滿一架第二架就到，我好好彩又有位坐，因為架巴士行山路，經常要轉來轉去，有位坐會好D😅

返到去箕面萱野駅，呢度其實有個商場 Q’s mall ，我先去搵啲嘢食，火車站上嚟係食肆商場，有食店同超巿，呢度食店唔多，但勝在冇重複，好幾間都吸引，去左一間叫做炭火燒鳥真骨鳥，食串燒亦有其他雞肉𤔡主嘅食物，例如親子丼，我叫左幾款串燒，又叫左鐵板雞肉和燒雞翼，真係炭火即燒，好好味👍🏻 食完再落一樓超市行吓，呢間超市好多organic 食品，好吸引，見有煨蕃薯🍠賣，又買一個食吓！去商場外的櫈坐低食，好味！

撘返御堂筋線去難波，四圍行吓街，又要去返難波parks ，因為要去搵 Workman women 買條褲，叫做Mediheal warm ，話着住瞓覺可以幫助恢復疲勞，去到見到剩返三條，兩條中碼一條加大碼，本身佢得三個size，中/大/加大我諗相等於大中細碼，所以買咗加大碼，不過佢嘅質地係非常之厚，真係要好凍嘅天氣先着到 (後記：第一日着覺得似乎冇乜作用，因為自己對腳都唔係好攰，但係佢實在太厚好熱，跟住嗰幾日冇着，就發覺對腳比較容易抽筋，再着之後又冇抽筋，應該都係有效減低疲勞)，買完野在附近搵地方食晚飯，去左一間叫做うな 釜，係食鰻魚的，食左個鰻魚飯，味道一般，食完飯再去搵一間叫Orange 的運動及露營用品店，買兩支ほりにし調味鹽！跟住就返酒店休息了！