2025年11月日本東至西長途旅行 Day 19 - 中津、中崎町、梅田

今早去一個叫做豐崎的地方，主要去食一間叫麦と麺助的拉麵，搭御堂筋線去中津站，再行過去，去到未開門，但門口已排長龍，人龍要分三段，每段約有近廿人，我排在第三段，11:00 開門入左第一段一半人左右，約15-20 分鐘就有人走，排左差不多兩小時才入到去，在門口買飛等入坐，原來只有十個位！加上唔係立即執枱，所以進度較慢，廚房有三個人煮麵，樓面只有一個，要執枱又要招呼排隊嘅人，通常一次過有幾個人走，佢就執好晒先至放人入嚟買飛，再等入座，得10個位每個人食大約15至20分鐘，即係話一個鐘頭可以做到30個客左右，所以要差不多兩個鐘先入到嚟😓 

主要售賣雞拉麵，係醬油湯，我叫咗最基本嘅醬油湯拉麵，再加咗叉燒飯，因為叉燒飯係細細碗嘅，而且有半隻蛋，個湯幾好味，麵條嘅味道都唔錯，除咗雞肉佢仲有雲吞同埋豬肉，質素都唔錯，亦都食得出係用靚嘅料，叉燒飯就唔係好出色，正常發揮，不過要排咁耐就唔係太值得，如果排一個鐘頭以內都可以接受，由排隊到食完走，用咗差不多兩個半鐘！走嗰陣仲有條長龍，不過得兩段，佢收3:30 ，可能晏少少嚟會冇咁多人，一係就開門前早啲到，見佢逢星期二休息，我諗嚟之前都要check 吓佢有冇開！因為呢個位附近冇嘢行！

食飽就行吓！行過去中崎町，未去過呢個地方，淨係知道佢係有少少文青feel，同埋有好多咖啡店，所以過去睇吓有冇咖啡店飲返杯咖啡，呢度主要係兩條大街，街道有少少懷舊feel，因為有啲建築係保留緊舊式嘅日本建築，亦都有啲文青嘅感覺，有啲似原宿嘅橫街，唔係好熱鬧，但係每間舖頭都有佢特色，店嘅外觀都好有自己嘅style！

我去咗嗰間叫做Yatt 嘅咖啡店，佢門面唔算好特別，但係入面有三層，每層嘅座位都幾舒服，鋪入面嘅位置唔係好大，我上咗一層坐，原本可以再上多一層，但係最頂嗰層係榻榻米，而且樓底比較低，佢都有個牌寫住叫大家上落小心，因為佢呢座建築已經有一百年歷史😆 叫咗一個Scone 同一杯咖啡，買完可以自己搵位坐，咖啡都唔錯，scone 只跟忌廉，就遜色咗少少🤏🏻😅

食完嘢行過去梅田嗰邊，行行吓見到有間好靚嘅Starbucks，其實佢係喺Tsutaya 書店入面，而呢間書店在關西大學一座building 內，我就走過去睇吓，裏面座無虛席，原本想幫襯Starbucks都唔得，因為佢坐滿晒學生，全部都係開晒電腦喺度做功課，所以我都係影咗幾張相行個圈就走，反正我都啱啱飲完咖啡，都好飽！不過見冇人介紹過呢間Starbucks，所以就過嚟打卡！

去到梅田，呢度有兩個商場我都未嚟過，NU Chayamachi 同 Plus ，不過商場都幾細唔係好多嘢行，不過見佢都幾新，跟住行返去火車站嗰邊，主要係想去買咖啡豆，因為有一次我喺火車站個商場買咗包咖啡豆， 好友話好好飲，所以今次再去幫襯佢，店名係 Coffee Gallery Hiro，不過上次買嘅咖啡豆已經係幾年前嘅事，而家已經冇賣嗰隻咖啡豆，所以揀咗另外兩款，佢嘅咖啡豆係非常之香，而佢呢間店嘅位置都有少少隔涉，一般喺火車站行街都未必會行到入嚟😅上次都係誤打誤撞入咗嚟，跟住喺商場附近行吓，再去搵嘢食！

喺商場見到一間食仙台牛舌，見佢個樣好似幾正，就揀咗呢間叫做炭燒牛たん東山，叫咗個厚切牛舌套餐，個樣好似唔錯，不過味道就一般😅食完就搭返車返難波，返酒店休息！