2025年11月日本東至西長途旅行 Day 20 - 心齋橋、中之島、Sky Terrace、心齋橋

後日就返香港，呢兩日留在大阪市中心，都冇乜地方去，想搵D未去過嘅地方，都唔太多選擇，先去心齋橋最後衝刺，去藥妝店購物，先去食早餐，搵到一間叫做鶏白湯らーめん・つけ麺 金麦的拉麵店，見佢喺Google嘅評分有4.8 ，去到未開門，仲有4分鐘，所以喺門口等吓，短短幾分鐘就起咗一條隊，排咗四五個人，我第一個，一開門就入去買飛先，呢度主打雞白湯拉麵，座位都係十個左右，不過佢另外有兩張四人枱，坐低一陣之後，越嚟越多人，好快成間店就九成滿座，拉麵嘅味道都唔錯，當然我覺得銀座篝仍然係最好味嘅雞白湯🤭呢度都唔錯嘅，始終大家個味道都唔同，難以比較😆

行返去心齋橋，由街頭行到街尾格晒價，搵到一間叫做瓦屋藥妝，喺心齋橋有兩間分店，螢光綠色嘅招牌都好易認，使唔齋橋嗰間Daiso 對面有一間分店，我印象中上次嚟已經有喺度，但係因為佢太細間同埋好多嘢冇賣，所以冇特別行入去睇，雖然佢售賣嘅貨品唔多，而且大部份產品同出面嘅價格差不多，但係FANCL嘅產品係特別平，但係佢嘅貨量唔多，品種亦都唔齊，一包公價¥3,600的supplement ，見到有隻白鶴嗰間賣¥6,745 兩包(等於¥3,373一包)，已經算平，但係呢間只係賣¥2,768，真係好平！可惜佢得返幾包，唯有聽日再嚟睇吓佢有冇返貨！

買完嘢去搭御堂筋線去淀屋橋站，再行條過去中之島，呢個島冇乜嘢好行，不過有個公園，應該有一啲聖誕嘅攤檔，不過呢幾日應該未開，所以去到見到有啲車仔，但係冇開檔，沿着公園行有個玫瑰園，但係啲玫瑰好疏落，可能唔啱天氣，因為仍然好凍，呢度有個大阪市中央公會堂，我唔知佢入邊有乜嘢做，不過外型就好似英式建築，有啲紅色磚，應該係歷史嘅建築。再行過啲見到有間書店，旁邊有個巨型青蘋果🍏藝術品，又過去影吓相，行到咁上下，開始天黑，公園嘅聖誕燈飾都開始着燈，唔算好澎湃，見佢已經天黑就可以過返去車站嗰邊，去Sky terrace睇夜景了！

呢座Yodoyabashi Sky Terrace 地面只有一間舖頭，樓上應該仲有食店，我主要係上去30樓睇夜景，去到30樓佢都有一間coffee shop，睇景嘅位置只有180度，呢度嘅夜景都幾靚，影到條天橋有八條線行車，馬路兩旁亦都裝飾咗聖誕燈飾，雖然唔係好多，但係都好靚！

影完夜景，過返去心齋橋，去咗大丸搵嘢食，見到一間意大利餐廳叫做 Tanto Tanto ，揀咗個牛扒晚餐，有沙律、南瓜湯、牛扒，叫咗杯 Ginger Ale ，食物不過不失，食完飯再行返去心齋橋，因為想食抹茶雪糕，去咗宇治園，買咗個Mont blanc 甜筒，佢有抹茶或者焙茶味道，我揀咗抹茶，啱啱買完佢就貼咗個售罄牌出嚟，不過我食緊嘅時候，佢又掹返走個牌，又有得賣😅 再行多陣心齋橋，去咗上島咖啡店，買咗啲咖啡粉，係好細包嘅比好友，因為佢冇磨豆機，所以買咖啡粉俾佢，跟住返酒店執吓啲行李，準備後日返香港了！