今日plan咗去睇紅葉，先去食啲嘢，行過去黑門市場望吓，經過一間壽喜燒店，未開門已經排晒隊，我繼續去黑門市場，去到見到而家賣嘅嘢都非常之貴，去過好幾個市場，好似築地同錦市場，都冇呢度咁貴，而且明顯少咗遊客，我行咗一個圈見到啲價錢咁高，所以都冇食到嘢就走，行返去頭先見到嗰間壽喜燒度望吓，佢就喺黑門市場其中一個出口嘅斜對面，去到已經開咗門，亦都有啲人喺入邊食緊嘢，見佢價錢都唔貴，而且唔使等位，咁就試一試佢，店名叫做鶴屋，套餐由¥3,100 起至¥11,000(未計稅)，視乎你揀邊種牛肉，最貴係神戶牛，大部份人都揀黑毛和牛¥4,800，有120g 牛肉，我都揀呢個餐，另外追加50g 神戶牛，睇吓兩者嘅分別大唔大，黑毛和牛睇落都唔錯，油花都算均勻，係切到非常之薄，每個鍋有五片牛肉，有啲蔬菜豆腐墊底，有碗飯同埋一隻蘭王蛋，50g 嘅神戶牛就只有兩片，明顯較多油脂，呢度個壽喜燒汁都唔錯，唔會太甜，亦都唔會太鹹，味道啱啱好，牛肉嘅質素都唔錯，神戶牛係好食少少，但係又唔係話爭好遠，建議食黑毛和牛就足夠！食飽就出發去睇紅葉！
行去日本橋站搭阪急千里線去北千里，睇指示應該係2號出口出去三色彩道，不過我發覺原來東側出口，一出去係天橋，可以過埋馬路，仲方便啲，沿着三色彩道行，近地鐵站呢邊嘅紅葉唔算多，沿着斜路上去就會越見越多，行到差唔多街尾嗰一段係最多紅葉，唔單止紅葉，仲有橙色同黃色，難怪叫做三色彩道， 馬路兩旁都係三色樹葉，地上亦都鋪滿咗落葉，都幾靚，呢條馬路唔係好多車，人亦都唔多，可以慢慢影吓相👍🏻👍🏻
影完相行返去火車站，呢度屬於吹田市，火車站呢度有個AEON Mall，不過都頗舊同埋幾細，冇乜嘢好行，我就去Starbucks飲吓佢個Soupuccino湯，hea 一陣就撘返車去日本橋，去返黑門市場斜對面果間上島飲咖啡！記得上次嚟嘅時候呢度係好多人，店家仲要求每人最少叫一杯飲品，今次嚟到就少咗好多人，我上咗樓上坐吓，飲完咖啡先再行！
行去道頓崛，原本想去上次食過果間烏冬，去到門口又係排晒長龍，上次嗰條人龍長D，等咗足足個幾鐘，所以有人排隊基本上都唔會等，行去搵一間串燒店，店名叫做 BATTEN YOKATO AMERIKAMURA 博多串焼きバッテンよかと，近美國村果邊，去到剛剛開門未有客，又得我一個包場🤭 呢度有樓上，不過樓上只有兩張四人枱，樓下吧枱大概有11個位，叫咗佢哋熱賣嘅燒粟米，叫咗碟青瓜，又叫咗幾串雞牛豬，呢度嘅串燒做得幾好，全部即叫即燒，所以都要等吓，仲有陣陣嘅炭火味，好食！一路食越嚟越多人，當我走嘅時候已經要排隊等位😅
沒有留言:
發佈留言