今朝早餐在樓下嘅小川咖啡店食，今朝有多士，食完就搭車落去難波，搭JR京都綫落去梅田，再轉車去難波，先去酒店放低件行李，出去食個lunch，記得上次同好友去大阪，去過一間小店想去食豬腳，但係因為冇位就冇食到，今次去到就有位，仲要啱啱好得一個位！
小店叫かどや，佢有燒肉、燒鳥、內臟、豚足，係好舊式嘅居酒屋格局，坐位主要係圍繞住廚房嘅高櫈，有兩三張係四人枱，好地道好街坊，價錢都非常之實惠，豬腳每碟¥800，見到每枱必點豚足，仲可以叫豬腳湯，係免費嘅，餐牌中英文對照，串燒一律係¥600 三串，另外飲品只有酒類，如果唔飲酒可以自己帶飲品嚟，我叫咗豬腳、串燒牛同雞，幾乎每一個客都叫啤酒飲，但係我唔想飲啤酒，所以我叫咗杯Sake，後來見到佢有牛肝，好想食，又覺得三串好似好多，最後都係忍唔住叫咗一客，佢係半生熟，好好食好抵食😋😋
食完嘢行去難波Parks ，竟然喺商場撞到朋友，佢仲要係早幾日啱啱結婚，而家嚟日本渡蜜月，咁有緣撞到梗係要影返張相，我都冇約佢哋食飯，費事阻住人哋新婚蜜月，我自己喺附近行街，跟住就等佢天黑着燈，因為佢呢度有好多聖誕燈飾!
影完相就行返過去千日前，原本想去食一間爐端燒，但係佢要預約，所以食唔到，跟住再行去一間烏冬店，近住高島屋嗰邊，呢間烏冬店係好耐歷史，以前個店主係一個叔叔，着住好靚好型嘅牛仔褲，喺度煮烏冬，仲會同啲食客傾吓偈，問吓你喺邊度嚟？今次佢已經唔見呢個叔叔，可能有仔女接咗手都唔定，當年食一個烏冬，只需要¥500，而家就去到¥620，價錢都係相當平，當然佢嘅份量都唔係好大碗，食完順便行去高島屋行一陣！
在高島屋行咗陣，見到有甜品店，叫做一凛堂，主要係食抹茶食品，我叫咗個抹茶芭菲，幾好食👍🏻👍🏻食飽就返酒店休息！
Sarasa hotel Namba
呢間酒店之前住過一次，其實個位置都唔錯，由難波站行過去大約8分鐘，而且價錢比較平，當然佢嘅房間都係會比較細，酒店都頗多韓國人住，大堂嘅職員都有唔同國籍嘅人，有中國人、泰國人，所以英文同國語都可以交流到，今朝擺低咗行李，夜晚返嚟check-in嘅時候行李已經送咗上房，房間係好細長方形，一眼睇晒，好在佢床尾有個櫃，可以擺行李，不過廁所係非常細，我都未見過個浴缸係上窄下闊，一邊窄係因為要就個洗手盆，而個座廁亦都係少少打側嘅，酒店沒有供應樽裝水，所以要自己買，佢大堂都有得賣，亦都有免費咖啡機，不過我就冇飲過！房間最大嘅優點係有落地玻璃窗，同獨立冷暖氣機，唔係中央系統嗰種！
沒有留言:
發佈留言