2025年11月日本東至西長途旅行 Day 16 - 金閣寺、下鴨神社、錦市場、祇園

今日嘅早餐就喺酒店樓下嘅小川咖啡店食，原本想食三文治，但係佢話售罄，唯有叫咗一件士多啤梨蛋糕配咖啡，食完就出發去金國寺，行返去巴士總站搭205 號巴士，總站上車只有幾個人，不過沿路都好多人上車，所以架車好快都滿晒，搭咗差不多一個鐘先去到金閣寺！

金閣寺原來又叫做鹿苑寺，沿路見到好多紅葉，要去睇金色嗰座寺廟，要買飛入場，佢張飛係一道守護符，都幾特別，今日呢度唔算好多人，入口寫明叫啲人唔好影一大group團體相，可能驚阻住其他人，不過啲人都唔理，好彩冇一大團體嘅遊客，最多都係四五個人，一見到金閣寺，大家都要停低影吓佢，我就環繞住佢影咗好多張相，你過咁多次京都，都係第一次去金閣寺，真係好靚，因為佢喺個湖中央，加上金碧輝煌嘅外表，所以係好靚！可惜冇一啲好近佢嘅紅葉做陪襯🤣 順路行出金閣寺嘅時候，見到有啲小販賣零食，見到有Wasabi花生，有得試食，覺得都幾得意，所以買咗幾包做手信，跟住就搭車去下鴨神社！

又係搭205號巴士，大約半小時就去到下鴨神社，其實佢叫做賀茂御祖神社 (下鴨神社) ，佢最出名係佢嘅御守，佢係好似喱士咁樣嘅御守，一共有八款，除咗四季主題之外仲有中秋同埋祭典，另外仲有一款係長期售賣嘅鳥羽守，而家冬天係雪花圖案，我當然都要買返一個啦，希望下次嚟京都，可以再嚟買其他圖案，其實我覺得紅葉係最靚，可惜我嚟遲咗，踏入12月就轉咗係雪花，不過都靚嘅😍

出返去烏丸，又係搭205號巴士，今日幾程車都係搭佢！去錦市場，上次去因為食飽咗所以冇食嘢，今次特登留肚過去食嘢，原本有一間壽喜燒想去試，不過見好多人，所以都冇食到，去錦市場掃街！今次見佢冇上次咁多遊客，可能少咗大陸人，見到有一間賣串燒嘅，就買咗幾串試吓，味道一般，見到有好多海鮮檔，多數都係燒烤，想去食生蠔，行到街尾見到有一間叫做かき屋 だいやす 牡蠣 錦 大安，可以入去坐低食，叫咗一個生牡蠣四種盛，有四款生蠔，另外叫咗一碟大蜆，同埋兩隻燒蝦，好味😋 見到有一間賣薯條嘅店舖，好似幾吸引，不過份量好似都唔細，所以最後都冇試到，食完嘢就出返去京都站！

去返祇園附近行吓，去大丸百貨行吓，見有個巨型Mario ，又影吓相！😆 再上去餐廳嗰層，搵啲嘢食，見到有間拉麵店叫做凛，就試一試佢，份量都幾大，味道不過不失！跟住過返去京都站嗰邊，行吓地下街，見到呢度其實都好多食店！不過已經食飽咗，所以冇再食其他嘢，就返酒店休息！