早在七月初已經相約好友 F 去睇呢個展覽，當其時好友告訴我要和男友分手，轉眼間已經過咗一個月，時間過得真係好快，我地訂飛果陣時因為做緊早鳥優惠，所以早成個月買，呢個展覽上星期已經開始左，今日終於輪到我哋！
相約好友一齊去食D野先，近近地去金記冰室食D野先，然後去九龍灣行咗一陣先，今日酷熱警告，氣溫有成35度，熱到不得了，留在冷氣地方真係唔想出去，到差唔多夠鐘先至行過去，在九龍灣果間戲院行過去都好近，去到門口 scan QR code之後要排一陣間隊，因為要分流進入會場，因為要搭lift，每次大概放11-12 人入 lift ，我哋都等左三、四轉先至入到去，出邊實在太熱喇，入到去有冷氣就唔同晒，上到去，第一個場景係萬福寺同埋狸貓，我唔係好知係邊套卡通片，第二個係魔女宅急便嘅麵包店，整得好靚，可惜唔可以行埋去影，第三個場景係哈爾移動城堡，有一個移動城堡嘅裝置，自己會郁，仲會發聲！
影完哈爾移動城堡嘅場景之後，要行樓梯落一層，落到去第一個場景就係飛天紅豬俠，架飛機佈置場景，好似側邊D雲會郁咁，幾有立體感，跟住係幽靈公主，佢有一個位置會播片，影片一停就會在布幕後面現出一隻動物，應該係戲入面嘅其中一個角色，因為我冇睇過呢套戲，所以我唔知呢隻係乜嘢嚟，過咗呢個佈置之後，就見到有人排隊，果度寫住排隊要45分鐘，主要係要影千與千尋的油屋，職員話可以之後返轉頭影，我哋諗住轉頭都係要排隊所以而家排左先，其實我地睇完之後覺得唔需要排，原因係個場景，在行過果陣時趁無人影緊相果陣影就得喇！因為個人企埋去係影唔到，因背景太光，個人太黑，我見D職員幫人影相，張張相都係個人黑麻麻睇唔到樣，因為佢唔俾用閃光燈，所以會前面個人好黑，後面個背景好光，所以根本係睇唔到個人樣，咁可以唔需要個人埋去影啦！淨係影個場景就得！影完油屋又要排隊，條隊係影火車上的無面男，終於有一個場景係可以坐埋去影，所以個個都排隊！
跟住係天空之城，通去場景嘅路上，戲中飄浮半空的女主角被掛咗喺天花，影出嚟唔知點咁！天空之城有兩個場景，第一個係男女主角在火車軌上跑，呢個場景建議觀眾單眼睇，會更加有立體感，而另一個場景就有好紅嘅燈光，都係電影入面嘅其中一個情景，去到最後一套電影嘅場景就係龍貓，首先有一個場景係同頭先天空之城果個好相似，都係要單眼睇先有立體感，係兩個女主角跑返屋企嘅情況，跟住有一個好似樹林咁嘅佈置，有一幅好似石頭咁嘅牆，牆上面有好多個窿，裝入去會見到有隻龍貓在瞓覺，旁邊亦都有人排隊，因為要同龍貓影相，呢個場景就係最經典果一場，龍貓同兩個主角企在巴士站等貓巴士果場場景，背景做咗D假嘅落雨效果，個個都埋去企在龍貓同女主角中間影相，我哋當然有影啦！
再行過去就已經係商品售賣部，當然有好多宮崎駿電影入面嘅角色商品售賣，睇的人都唔少，有D產品之前都未見過，亦都講明係呢度限定商品，好友買咗一個龍貓嘅BB枕頭，因為佢朋友下個月生BB，佢朋友亦都鍾意龍貓，所以佢就買定俾佢做禮物，我就買咗一個杯，係千與千尋角色嘅杯，其實都掙扎左一陣，因為屋企有好多杯，不過真係唯一睇啱呢個杯，其他嘢都唔係咁啱！買完野我哋就走啦！
沒有留言:
發佈留言