去完大阪一個半月之後，又去東京喇！今次個 package 貴左D，一來去六日，二來好遲先買，出發前19日才訂，因為原本兩人去，但對方遲遲未能 cofirm，拖到月頭才答覆！原本想訂的酒店已經沒有房了，無奈揀返 APA 洒店！航空公司就揀國泰，零晨機去，今天揾左未去過的地方，唔使次次都係果幾個地方！
今日坐巴士去機場，上次攪錯左尾班車時間，今次 Check 清楚，大約9:30 埋站，仍然係早左去到車站，上一班剛走了不久，要等廿幾分鐘，今次來了架P車，第一次搭，架車開得好快！半小時已經到機場！又早左！先去 check in 先！今次又坐國泰，前晩已經在網上揀左位，自助印登機證，寄埋行李，可以四圍行下！見到有聖誕裝飾，影下相，不過得一個，仲有一個整緊，冇乜野影就過關，因為都好肚餓！
今晚機場比較少人，過關好快！過左關去廸士尼商店望下，冇乜特別野，就去撘冇人架駛列車，去40號閘，目的當然係去 premium lounge 食野啦！因為好肚餓，所以攞左幾樣野食！魚蛋米、豬腸粉、燒賣、長通粉、白汁雞同翠玉瓜！食完仲加多碗魚蛋米！好飽呢！橙汁都飲左三杯！食完野，坐下 hea 下，仲有成個鐘，慢慢行去閘口今次32號閘，揀左窗口位，貪佢可以埃住瞓，飛機一起飛就瞓左，雖然中間瞓下醒下，好快到落機前廣播，即係仲有半小時到埗！日本落大雨！天氣預告好準，話今日落雨，明天會好天！
6:15 am 到埗，落左機，張 sim 咭用唔到！今次因為攞唔到免費 sim ，去左專業旅運買左張 sim ，佢地做緊特價$128 買一送一，有效期至明年三月尾，可以下次用，張咭話原價$288，4G無限 data 係 Happy telecom，之前買過3G 好慢，見呢張係4G，希望好D，但係用唔到，趁機場有 Wi-Fi 上佢地 Facebook inbox 問，但係太早，冇人覆！唯有晏D再問！
原本今日想去成田市同理 outlet ，諗住租 locker 放低行李，原來呢度冇 locker，但係有行李寄存公司，仲可以幫你送返酒店，20kg 以收費大約$185，都唔算貴，但係我都係改變行程，去左新宿先，因為太早 outlet 同成田市都未開所以去左搭火車返新宿，上到車當然是瞓覺了！瞓醒都差不多到了，新宿這邊都落雨，去酒店放低行李先，跟住去行街，行出酒店，就係 Hotel Gracery，呢間哥斯拉主題的酒店，樓下有好多食店，見到板前壽司，行過幾次都冇興趣幫襯，因為香港的板前麻麻地，不過最近睇電視，森美介紹人去赤板見附果間板前，好似好正，我諗同一間公司應該差不多，見門口D相好靚，價錢都係略貴，就去試試！早上近11:00 店內沒有人客，只有我一個，叫了一客拖羅刺身、滿瀉的海膽軍艦、牡丹蝦同埋兩件壽司，首先牡丹蝦洗得唔太乾淨，仲有小小蝦腸粘在蝦肉上，拖羅可以話違反商品說明條例，實物與圖片也差太逺，最重要唔係好好食！失望！壽司也不多説了，總之冇下次，唔值呢個價，有時旅遊節目拍攝，可能店家會比最靚的食材做拍攝吧！
食完野經過藥房就睇下野，藥妝店好多野睇，成日都有新品，好容易消磨時間，跟住唔少得去我最愛的高島屋！去到高島屋有 wifi，但係 Wi-Fi 用唔到，攪左成半小時先用到！可以聯絡sim card 公司，佢話幫我重置張咭，終於用到！不過說好的4G，卻只是3G！都冇辨法，用住先，係慢D，最緊要用到先！行完高島屋，去伊勢丹，今次幫朋友去一間叫做生活の木的商店買野，行去伊勢丹途中見街上有一大班人企響度睇手機，原來係捉 Pokémon！今日條街好多人，原來係日本勞動節假期！估計呢幾日都多人，實有D人攞埋星期五可以連放四日！
去到伊勢丹反而見到 LC有水晶球送，頭先在高島屋反而冇！幫人買完煲再去生活の木，呢間係賣香薰、茶葉之類的店，店員比左杯薑蜜我試，又幾好飲，買返支先，店員話加水 1:7 比例冲，不過佢好老實話我知，比客試果D係 1:5 ，所以好味D！買完野攞返洒店先，順便可以 Check in，今次住27樓，上一層就係溫泉，返到酒店就想瞓覺！放低野再出動！先去食野！
上次在大阪食過牛吉列覺得唔錯，見附近有一間叫做牛もと村的在地庫，店的地方不大，有一張四人枱和一張兩人枱，其餘約八個是吧枱位，去到時只有一張四人枱有人，但係坐低一陣已經爆晒，六點已經爆場，仲要等位，未到晚餐時間都咁多人！叫左個細的 set，只有一塊份量，每個都有個小火爐比你煎一煎塊牛扒，呢間個吉列外層比上次果間厚左小小，不過味道也不錯！
食飽行下當做運動！先去藥妝店行下，然後去左 Lumine EST 行，呢度有間眼鏡店，叫做 Zoff ，訂眼鏡只須半小時做好，鏡框由¥5000-9000，當然貴D都有，已經包埋鏡片，就去配返一副，眼鏡框可以自由試，試啱埋去部電腦度登記，有中文揀，入一D個人資料，揀返使唔使驗眼，攞左飛就坐低等，今日冇乜人，好快就到我，驗眼師英文麻麻地，大家靠簡單英文溝通，然後佢會sell 你加錢要塊好D既鏡，要薄D鏡片加幾千円，要埋防藍光又加幾千，我想要薄鏡同防藍光，要等十日，最後揀左薄鏡就算！比完錢，出去行下街睇野好快半個小時！攞埋眼鏡就返酒店休息，始終零晨機都攰喇！返到酒店都成十點，早D瞓，明天繼續！
沒有留言:
發佈留言