macchina

今朝買完蛋卷，就落咗去銅鑼灣行吓，因為約咗人飲咖啡，但係未夠鐘，去SOGO行咗一陣，再慢慢行去灣仔，其實鵝頸橋過多一條街馬師道，去到咖啡店出面告士打道，見到係車行嘅陳列室，行入去大廈入面，先至搵到個入口，其實佢喺謝斐道都有入口，不過呢個正門入口反而封咗，都係要行入大廈裏面，側邊嘅門口入，入到去見到大約只有六張二人枱，另外有兩張係矮嘅大枱，可以坐大概六個人，因為冇晒二人枱，所以我哋坐咗一張六人枱，張枱好大但係好矮，我唔知佢可唔可以搭枱，我哋都唔介意，其實佢仲有大約6-7個Bar枱位，可以睇住人哋沖咖啡，最後都係揀咗張矮嘅大枱。店入面擺咗一架跑車，係人哋比賽嗰種，之前網上睇到呢間店嘅介紹，唔係呢款車，而家轉咗架跑車都好吸引。

餐牌都好簡單，呢度用餐時間只有一個鐘，而且有最低消費每人最少要叫一杯飲品，我哋叫咗兩杯咖啡，同埋一個沙律，一個三文治，我叫咗手沖咖啡，有三款豆可以揀，佢亦擺咗咖啡豆喺counter可以俾你聞吓，坐坐下見到佢有部機好得意，問咗店員，原來用嚟整牛奶，因為佢哋有款招牌咖啡係-86度 dirty，部機嘅作用係將牛奶入面嘅水份抽走，大約50%，所以牛奶會好杰身，倒入-86度嘅冰杯，令到牛奶變咗好似軟雪糕咁嘅質地，攞埋嚟你張枱先至倒咖啡落去，之前飲過-85度咖啡，唔係用呢種牛奶的話，個冰杯會好快溶，而家用呢種牛奶，就冇咁快會溶，仲好似食雪糕咁，都幾得意😊