以前在北角經過德成號幾次，都係冇機會買到佢地嘅蛋卷，因為唔係每日都賣，加上國內旅客瘋搶，基本上都買唔到，不過近日好似話容易咗買，所以呢日就去試吓，佢哋逢星期四五六營業，我驚星期四第一日同埋星期六係weekend會好多人，所以揀咗星期五，佢哋開9:30 ，剛好9:30去到，門口已經有一條好長嘅人龍，大約排咗7-8間舖位，見到人龍前半段都係一大班婆婆，店家遲咗幾分鐘開門，不過進度都好快，前面嗰班婆婆主要係幫人排隊買，我哋龍尾嘅人見到啲婆婆喺度分貨，後來有一個埋嚟問我哋，話買多咗一盒，加$50讓俾我哋，我哋話唔要， $50太多了！一路都見店家沒有截龍，應該係評估到夠貨賣，輪到我買嘅時候係10:05 ，買嘅流程好快，一邊收錢，一邊攞貨，每人限買800g，即係兩盒細或者一盒大，只收現金，我買了一盒原味和一盒椰汁味，走嘅時候見到人龍短咗好多！
跟住行咗去附近一間豆腐店，食返個煎釀豆腐同飲豆漿，又叫咗一個牛肉包試吓，今日雖然唔太熱，始終排隊冇冷氣都係有啲熱，不過呢度嘅冷氣都唔係好夠，因為佢係開放式店舖，即係冇嘢阻隔，就算有冷氣都會走晒，呢度嘅豆腐好滑好味！豆漿都唔錯，入面只有幾位女士在工作，座位亦唔多，好多人都係買豆腐返屋企煮，只有少數人喺度食！
食完就諗住行返去睇吓蛋卷賣成點，10:30返到去蛋卷店，見到門外剩返6-7個人排隊，店入面仍然有不少貨，早知10:30先嚟，就唔使排隊都買到🤭如果試咗好食，之後再返嚟買！
沒有留言:
發佈留言