廿一由八cafe

食完拉麵，行上兩條街去山道搵coffee shop，去咗呢間咖啡店，位置都有啲偏僻，不過入到去都有三四枱客，我哋每人叫咗一杯咖啡，另外叫一件巴斯克芝士蛋糕share食，好友叫咗佢哋嘅special，蘋果冷萃咖啡同埋一杯手沖咖啡，我就叫咗杯冷萃咖啡，蘋果冷萃咖啡就麻麻哋，因為蘋果汁嘅味蓋過咗咖啡味，覺得咖啡好淡，我個杯冷萃咖啡就正正常常，都OK，而好友嗰杯手沖咖啡就等得比較耐，好有比較鍾意Nutty 一啲嘅口味，不過佢哋冇，所以用咗特別嘅沖調方法去減低佢嘅甜度，佢杯咖啡裝咗喺一個小樽度，另外俾咗兩個咖啡杯仔，因為兩個咖啡杯嘅杯型都係唔同，可以飲到兩種唔同嘅口味，真係好神奇，店員都有介紹呢一樣嘢，我哋坐到咁上下，差唔多到午膳時間，成間coffee shop爆晒，仲要等位添，估唔到位置咁偏僻，都有咁多客，可能就係因為偏僻附近冇乜選擇吧！不過呢間確實係唔錯，咖啡好飲蛋糕好食👍🏻

 

de Sang Bleu

上個月同好友喺IG見到呢間拉麵店，但係見佢暫時唔開，要等到八月，前兩日見到佢有update營業資料，所以我哋就上網預約，因為佢係預約制，我哋各自搭車去石塘咀，去到佢仍未開門，等咗一陣就入得去，裏面只有幾張四人枱，見有人Walk in佢哋話唔做，餐牌都好簡單，基本上有三款雞湯拉麵，主要都係雞湯加咗鹽味/醬油/鹽味黑松露，然後個湯底有濃厚同冇咁濃，所以變咗六款拉麵，另外仲有今日特別口味蠔和蜆，我哋對黑松露冇乜興趣，所以就叫咗鹽味濃厚雞湯、醬油濃厚雞湯、蜆和蠔湯，因為麵同埋雞肉叉燒都係一樣，佢另外仲有啲配菜，我哋就冇加到，因為一陣仲要去飲咖啡！

我哋期望都幾高，因為山長水遠，又要預約，不過老實講質素係唔差，但係亦都唔算係好好，大家都覺得唔值得花咁多時間，搭咁耐車過嚟食，除非你喺附近住，就一試無妨😅加上個侍應好似係暑期工，講嘢比較掘，我哋想要張凳嚟擺嘢，因為我哋拎住袋嘢，我哋三個人坐一張四人枱，有一張凳係拎走咗，見到擺咗喺側邊，所以我哋先至問佢攞張凳，佢話張凳污糟喎，問佢有冇第二張，佢話有第二張但係爛嘅🤦🏻‍♀️ 總之就係令人覺得佢搵藉口唔想攞俾你，最後佢都攞咗張佢所謂爛嘅凳俾我哋，跟住見到隔籬枱個客唔知問佢乜嘢，佢話唔得㗎喎！語氣唔係幾好🫢，跟住埋單嗰陣，拍完咭等咗好耐都冇出返張單俾我哋，然後行咗去，個廚師都忍唔住出去睇吓佢搞咩搞咁耐，最後係廚師幫我哋攞埋張單，到走嗰陣都見唔到個侍應出現，呢一點都係好趕客嘅地方🫣

 

蜘蛛俠-英雄重生 Spider-man Brand new day

自從Peter Parker從人們的記憶中消失後，Peter 繼續以蜘蛛俠嘅身份幫助警方，但係Peter孤軍作戰，非常想念自己心愛嘅人，可惜好朋友Ned 和女朋友MJ都忘記了他的存在，他亦會忍不住接觸他們。
在Peter協助警方的同時，他發現有一股神秘力量，能夠侵入不同的人身上，有人將這股力量亦嘗試入侵Peter，但發覺無法侵入，但發現到Peter的記憶，知道佢心愛的人是MJ，所以用MJ來引Peter出來。。。。！

今集嘅蜘蛛俠係最感人嘅一集，因為Peter不斷回想梅姨及MJ的感情，非常想念她們，而自己卻要孤獨生活，而另一新角色Jean ，亦都有好深的姊妹情，兩人同病相憐，非常傷感！
 

文記車仔麵(Food Atlas)

最近尖沙咀海港城嘅food court 重開，搬咗上去city‘super 樓上，改左個名叫Food Atlas ，食店嘅選擇都幾多，而且見到好多人食，我揀咗食車仔麵，呢間車仔麵應該係深水埗長龍店，之前因為佢成日排長龍所以冇機會食，呢度就唔使排隊，用自助點餐嘅方式落單，揀咗幾款餸，雖然冇乜人，但係都要等，其實我見到個麵餅一早已經淥好咗，只係冇人去夾啲餸落個麵度，過咗幾分鐘先至有人去做呢樣嘢，食物嘅味道都幾好，個人認為未至於要排隊食，當然深水埗可能平D所以多人食，而且其實好多地方都冇車仔麵食，就以尖沙咀為例，我諗除咗呢度都好難喺海港城搵到第二間車仔麵食！佢呢度全部食店係半開放式廚房，睇到佢哋衛生做得麻麻，例如落單紙浸住落碗度，擺喺出面的自助嘅調味料同埋辣菜甫，有啲打開晒蓋，或者倒到一枱都係，都冇人去清潔😅好彩食嘢嗰邊嘅枱上高都有調味料，嗰邊就乾淨啲，下次再去試吓其他食店🤭

 

The Odyssey IMAX 奧德賽

在木馬屠城的特洛伊戰爭後，Odysseus和他的部下一直下落不明，在他們失蹤了二十年，他的兒子Telemachus 已長大成人，而他的母親Penelope 一直被求婚者追婚，目的要奪取Odysseus 的皇位，當中包括了Antinous，他想借故令Telemachus 殺人而令他被流放，Telemachus 決定去尋找父親的下落，與此同時，Odysseus 身處一個島Ogygia，與Calypso 一起，他對家人及部下的記憶漸漸清晰，開始記起之前的事，決定要重返自己的家。。。。！

呢套戲因為拍攝嘅時候係用IMAX去拍攝，所以喺戲院都要睇返IMAX版本，所以要提早差唔多一個星期就要買飛，否則買唔到中間位置，佢好似有4DX版本，不過我諗有幾場戲應該都拋得好犀利，因為係講喺海上驚濤駭浪，可以想像到係會拋得好犀利😅，未睇呢套戲之前都睇咗好多影評，好大部份都係負評，當然大家對導演都有好大嘅期望，因為之前佢嘅電影實在係好創新及有深度，呢套戲如果唔係抱住好大期望有啲乜嘢好大突破嘅劇情，其實都幾好睇，中間都冇悶場，都唔覺得套戲有三個鐘咁耐，個人覺得選角好似爭啲，同埋好多演員嘅戲份都好少，當中有場戲好有千與千尋feel 🤣
 

麻吉灶咖(又一城）

自從又一城間H&M關咗之後，見佢將三層樓嘅舖位瞓返開，分別有開幾間食肆，呢間台式食店，之前在K11見過，但係從未食過，商場原本有一間茶木，執咗之後就變咗呢間係唯一台式食店，點入面唔係太多人，地方亦都唔算話好大，試左牛腩麵同藤椒牛肉拌麵，牛腩麵都係台式風味，都唔錯，拌麵叫咗中辣，但係我覺得唔辣😅 牛肉係牛腩，加咗一啲青椒碎，面係比較粗嘅波浪闊條麵，呢個都唔錯，飲品都係一啲台式嘅綠茶，分別試咗橙味同菠蘿味，我覺得菠蘿味好少少😆

 

蘇哥清湯腩(又一城)

之前呢度有一間茶木，而家又轉咗手，賣清湯腩，又去試吓佢，叫咗崩沙腩麵，另外試咗紫菜三寶丸麵，崩沙腩不過不失，正常發揮，三寶丸都正常嘢，依家先嚟講呢度算係較平，所以都算係咁！

 

Toy Story 5 反斗奇兵5

Jessie 和巴斯等玩具陪伴着Bonnie玩，Bonnie 想結識新朋友一齊玩但她不敢開口，所以她鬱鬱寡歡，父母見她不開心有認識不到新朋友，所以買了新款的電子遊戲Lilypad，令她可以在網絡上與同學聯繫，並開設了群組，互相交流，令到Bonnie開始減少玩玩具，終日沉迷在虛擬世界，在一次Bonnie前往同學家中過夜，她帶上了Jessie，但害怕被同學取笑，所以丟失了Jessie又不知道，Jessie 被另一女孩檢了回家，Jessie 等透過網絡聯繫Bonnie。。。。

故事嚟到第五集，胡迪戲份都減少咗，亦都好現實地反映現在嘅小朋友都係喜歡沉迷網絡世界，當中亦有唔少壞處，例如網絡上嘅欺凌，但亦因為網絡嘅協助，令小朋友更容易取得聯繫，可以話有利有弊，我諗實體玩具仍有佢生存空間，因為年紀較幼嘅小童，仍然係會玩玩具，而且近年又興返，好似爆旋陀螺咁，都可以令小朋友放低電子產品，重拾玩具嘅快樂！不過呢套卡通片仲有冇第六集就真係睇吓創作人有咩諗法，都要睇吓未來嘅趨勢係點，套戲都有唔少感人之處，都係一啲令人懷念嘅舊物舊事！
 

邂逅蒙羅麗莎·文藝復興的再現

今日去睇展覽，五月已經推出咗呢一個展覽，呢個展覽係免費嘅，不過估計初初推出嘅時候會比較多人，所以過咗一排先至去睇，人就唔多，不過有一班好似國內學生咁嘅團體參觀，所以有一班人同時出現就好似好多人，佢哋一走咗就冇乜人，展覽圍繞着講蒙羅麗莎同達文西嘅資料，亦都有講解呢幅畫嘅畫工，亦都有介紹達文西嘅人生同作品，另一個展廳就介紹文藝復興嘅部份藝術品，展館就唔係好大，主要都係展出一啲複製品，所以好快都行晒兩個館！

行過對面仲有個展館，係香港電影幸會25歲，主要係展示一啲得獎電影嘅獎座、戲服等，亦都有一個影相位，係可以同電影海報嘅角色影相，最多人揀當然係賭聖🤣 仲有一啲比較懷舊嘅場景可以影吓相！

落返樓下會有個金庸展覽，介紹返金庸嘅小說，睇埋呢個，再行埋佢間商店，我就走喇！

 

雞三和 / Cooley Oysters / 達人屋

今日約咗好友一齊喺銅鑼灣食lunch，去咗時代廣場地庫，見到有一間食雞嘅舖頭，就試一試佢，我哋都叫咗三種食法嘅set，佢係可以就咁食，或者加一啲調味，最後係加湯，雞就麻麻哋，話就係日本雞，但係同日本食都爭得遠！

食完飯我哋去附近行街，去咗Donki買酒，買咗上次我喺日本飲嗰隻澪，佢冇日本嘅洋梨味，不過就有士多啤梨味，買一支擺喺屋企，下次食飯飲😆

行到夜晚又再搵嘢食，去咗希慎地庫，上次見到呢間有生蠔食，但係冇食到，今日再去試一試佢，揀一款主菜加$68可以轉做套餐，多咗個湯或者沙律，同埋飲品，另外仲可以六折食兩隻生蠔，我哋叫咗四隻，因為一個好友唔食生蠔！生蠔主要係嚟自澳洲，質素都唔錯！主菜就叫咗三文魚、牛扒、豬扒，食物都唔錯，難怪呢間舖頭好多人食！

食完飯又係甜品嘅時間，行去渣甸街，有一間買榴槤嘅舖頭，叫做達人屋，我哋買咗個榴槤雪糕，佢係一個牛奶雪糕球，加一球榴槤蓉，再加兩舊新鮮榴槤肉，榴槤肉係好細舊，因為係一個好細嘅榴槤度攞出嚟，都幾抵食，而且味道唔錯，本來想一人一杯，不過買一杯試咗先，食完又覺得唔需要再加，因為都夠飽！食完雪糕就各自搭巴士走，因為大家都搭唔同嘅巴士線返屋企😅

 

世界女排聯賽2026(啟德體藝館)

又去啟德，上個月好友買咗飛睇排球，我完全唔記得咗呢件事，好彩佢前兩日提醒我，從來未試過喺現場睇比賽，見有中國女排，又買到飛，咁就去睇吓啦！

今日係第一日嘅賽事，一共有三場，我哋睇兩場，五點場係意大利對烏克蘭，好友話意大利係世界排名第一，所以贏面好高，比賽係五盤三勝制，取得25分𤔡之勝出，意大利第一場就贏咗，第二場就係烏克蘭，跟住兩場都係意大利，所以只係打咗四局，我哋睇完就去食個飯先，喺附近求其搵咗間嘢食咗碗麵，再返返嚟睇埋最尾嗰場，中國對加拿大，中國隊嘅打氣當然係勁好多，不過我哋後面一排都係捧加拿大，所以佢哋都叫得好大聲，兩隊嘅實力相若，所以都幾緊湊，因為輪流每隊一球，所以打足五局，最後中國隊都輸咗，分數只係爭幾分，真係可惜，不過中國女排冇以前咁犀利，加上啲隊員都唔係好識，淨係頭先喺洗手間見到2號，見佢打得都幾好，另外18號成日都接到對手嘅波，都守得好好，我同好友都覺得佢係MVP🤣🤣🤣🤣

 

DAYVI

今日約咗好友去啟德攞手信俾佢，見到呢間賣Gelato嘅車仔檔，之前睇過一條片，意大利人話如果賣Gelato嘅舖頭，啲Gelato係有冚蓋嘅話，代表係好嘢😆咁佢呢檔又真係冚咗蓋，旁邊有個黑板寫住有啲咩口味，店主係一個外國人，可能係意大利人，旁邊亦都有簡介呢間店舖，係一個意大利男士同一個香港女士結婚後，喺香港買Gelato嘅故事，原來佢都有幾間分店，我買咗一杯三球雪糕，揀咗金沙、雜莓、薄荷朱古力，其實佢得五六款口味，金沙又真係幾好食😋其他都唔錯！