歡樂時間過得特別快，又係時候講拜拜！話咁快去到最後一日行程，今日要搭黃昏機，所以只有半日時間，原本今日行程係要去牛津同埋溫莎堡，呢兩個地方都要自費入場，成團友又係得我地三個唔 join，諗住在出面影吓相就算，因為個收費都幾貴，點知連自費都去唔到，因為買唔到飛，於是改咗半日自由活動，其實我覺得買唔到飛，都可以在門口外面影吓相，不過自由活動都OK啦，今日可以瞓晏少少，不過就係因為瞓晏左，就食唔到酒店早餐！出去搵嘢食，去返尋日 Oxford street，坐返13號巴士，尋日用咗£3.5今日又用左£1.5，張八達通已經冇晒錢! 我地諗住今日回程搭的士，雖然唔知幾錢，都即管試一試！
搭巴士去到尋日行過的 Oxford street，好多鋪頭都有開，見到有間 Selfridge 未開門已經好多人等，睇落呢間百貨公司好似好大，而且呢座建築物好古老，上面有一個好大的雕刻，好靚好古色古香，成日在網上見到有人話要在呢間公司的網站購物，都想去行一行，不過佢未開門，我地又未食早餐，食完野再睇下點，行咗一陣發覺呢度冇乜嘢食，亦都冇乜嘢睇，行行下見到我哋琴晚食嗰間Angus Steakhouse 另一間分店 ，於是走去鋸個早扒！雖然係 brunch ，我地都叫左兩塊扒，一碟磨菇同芝士焗薯條，食到非常之飽！
食完飯在附近行下，但係冇乜好睇，好多大牌子香港都有，行多兩行想話飲杯咖啡，行左幾間都無位，可能係星期日的原因，條街都頗多人，行多一陣見唔多夠時間，最後都係決定返酒店hea ! 因為有冷氣又有 wifi ，我地坐的士返去，全程£12，三個人計每人幾十蚊港幣，我地去大堂攞返行李，坐在大堂的沙發上hea，好友都睡着了，hea 左半個鐘，團友都陸續返來，推埋行李上巴士，就出發去機場了!
機場都唔太遠，大約40分鐘就到了，領隊望到退稅的地方，今日竟然冇乜人，於是佢話過咗關先搞退稅，因為要退稅的物件都要手提，佢話可以在過關後才退稅，我地在T3，好友就要去T5，領隊教咗佢地點樣過去，因為佢地班機遲我哋三個鐘飛，原本諗住行李機艙之後，可以一齊食D野，但係我地要過關後搞退稅，所以行李寄完艙，就即刻過關，冇時間一齊食飯，就此告別了！
過咗關之後，有一些商店，旁邊有個counter搞退稅，其實所謂退稅，係將退稅單寄番俾退稅機構，只是一些名牌物品需要展示，證明會帶走，才可以做退稅，在退稅單上蓋印後，就可以將退稅單寄咗佢，呢度有郵筒俾人寄！我買咗陳醋，連埋好友買果D，我帶左返香港先，都可以退稅，不過D醋唔駛check，所以寄艙！搞掂晒之後，當然係自由活動時間啦，呢度地方好細，冇乜嘢睇，見到有 Harrods ，D野都幾貴，多數係茶葉、朱古力、 shortbread 之類的手信，因為太貴所以冇買，見到呢度有好多酒賣，價錢唔算貴，不過唔知好唔好飲，因為好多都係威士忌，同埋 Gin 酒！所以都係冇買，最後買咗幾包朱古力做手信，買完野冇乜嘢做，唯有去食少少野，見到一間叫做 Strada，係食意粉同薄餅，諗返今個行程，好多餐都係食薄餅同埋意粉，不過在機場都好難搵到其他選擇，在門口望一望餐牌，叫咗個 chicken and mushroom ，同一杯橙汁，味道都OK，慢慢坐下，先去等上機！上機前買咗支水，主要想用埋D英鎊！坐低一陣就可以登機，今日班機唔太多人，應該有位剩，我坐的座位，旁邊兩個位都冇人坐，我諗原本係比好友的，因為他們轉了日期，呢班機又唔爆，在後面的一對大陸夫婦，想坐上來，我先一步坐咗窗口位，原來佢地想分開坐，諗住旁邊冇人就可以瞓得舒服D，我都係咁諗！飛機起飛無耐，就開始派零食，轉頭就開始派餐，食完野無幾耐唔太餓，所以叫了魚柳，食完野睇咗一套電影，翻睇 Beauty and the Beast ，睇完就開始瞓覺，拉起個手柄，將隻腳申過隔離位，又放個背囊在窗邊，挨住訓，一瞓就瞓左幾個鐘，醒果陣成五點，即係香港時間早上10點，即係話仲有三個多小時就到步，亦準備係早餐了！早餐又叫咗粥，食完都冇再瞓，望住個窗等到步，知道香港打緊風，希望能夠平安到步，大約下午1:20飛到香港，班機人唔多，落機都快D！
一收到message，就知道已經3號風球，梗係想快D返屋企啦，不過一如以往，都係要等行李！見到團友個個都攞到行李，我就未見，攞咗行李的團友就走先，大家有少少依依不捨，始終一齊相處左11日，領隊等我地攞晒行李走佢先至走，我走果陣，應該仲有一組團友未取行李，好想快D返屋企，嗱嗱聲去搭的士，去到的士站，竟然唔使排隊，好快可以上車，架的士比較殘舊，個女司機仲好細粒，我果個29 kg的行李，都係自己搬上車尾箱！返到香港覺得好熱，因為就快落大雨，又3號風球，返到屋企睇新聞，話五點半前會掛8號，好在及時返到屋企！
總結今個旅程，意大利果幾日真係好開心，因為我未去過羅馬、佛羅倫斯、威尼斯，其他地方雖然去過，但係又有D唔同，例如去巴黎鐵塔，上次只係離遠睇，今次就可以上去，上次去凱旋門可以行埋去影相，又可以行香榭麗舍大道，今次就唔得喇！今次搭火車過境，上次就搭飛機，上次搭英航坐 A380 空中巴士，今次坐國泰，上次參加EGL今次參加 Jetour ，團費每日計，上次就平D，自費項目就大家差不多收費，領隊小費就今次比上次平左＄10一日，團友質素就兩邊都高，都係比較斯文的客群，亦都好友善，我諗要報團之前，問清楚D景點只係在外圍影相定係可以入去，其實章程有講，不過冇留心睇，都係問清楚好D！行程最後一日，領隊都介紹下佢地公司有D乜嘢長線團，佢話南非團同埋郵輪團都值得推介，不過暫時都唔好去長途的旅行團，將來有機會再考慮吧！
