2026年6-7月東京行 Day 12 - 飯田橋、早稲田、錦糸町

今朝去酒店2樓望吓，地方都幾寬敞，跟住就去搭JR，去秋葉原轉山手線去飯田橋！去到秋葉原，又去月台飲返支鮮奶！😆

去到飯田橋，去搵一間咖啡店叫做Cafe Flat 木屋，見佢係一間舊舊地嘅咖啡店，有自家製嘅蛋糕，推換入去見冇人，有一個店員喺旁邊瞓着咗，過一陣佢先聽到聲醒返，我就坐低叫咗一件血橙蛋糕，同一杯咖啡，咖啡佢哋係即時手沖，味道唔錯！

食完早餐，行出去嗰陣見到旁邊有個鳥居，呢度有間叫做東京大神宮，見佢都有啲佈置，因為就嚟七夕，入去望吓，都係有啲繪馬，亦都有御守賣，見到佢門口附近有啲廣告牌，話附近有間茶寮，行出去就見到喺神宮嘅斜對面，應該係新開嘅，叫做伊勢茶寮！

見呢間茶寮主要係食日式甜點，同埋飲抹茶/煎茶，又入去試吓，見到佢有一個好似Gelato嘅物體，所以order咗一個橙味，另外叫咗杯抹茶latte，好少聽到有伊勢嘅抹茶，通常都係靜岡，杯抹茶好好飲😋 Gelato就普普通通，我見佢有賣茶葉，諗住買包抹茶，點知茶葉只係有煎茶嘅紅茶或者綠茶，而抹茶嘅產品只有糖，咁我都照買一包試吓啦！

跟住行返去火車站，見到有一座建築物叫做 Sakura Terrace，有埋去望吓，呢度都有幾多嘢食，我比一間生蠔店吸引咗，就入去裏面睇吓，其實大部份舖頭都未開門，因為時間尚早，呢個商場好細，不過主要係得食店，見佢有位置可以坐，咁我就坐一陣等佢哋開門，我想食嗰間生蠔旁邊有間意大利餐廳，見到門口排晒隊等開門，都好吸引，不過一心想食生蠔，留返下次先試意大利餐廳！

等到呢間叫做貝殼莊嘅餐廳開門，入去嘅時候，店員話今日Booking比較多，可能要等耐少少上菜，我話我淨係食生蠔，等吓都冇問題！生蠔見到有一種至五種嘅分別，我叫咗四種，其實就冇得揀要邊種，總之比四種唔同嘅你，我嗰份有岩手、宮城、兵庫、北海道四個產地嘅生蠔！調味料有五種，佢用一個小型嘅樽仔裝住，分別有紅白醋、Tabasco、橄欖油、日本醬油，其實幾款都唔係太啱我口味，所以我都淨係用鮮檸檬汁！生蠔好味，早知叫五隻😆😆

跟住搭車去早稻田，主要係想去法輪寺，車站出嚟都要行一段路，法輪寺嘅入口係一條樓梯，兩旁同埋頂部都掛咗好多風鈴，所以好多人都企咗喺樓梯度影相，上到去其實就唔係好大，不過周圍去都係用一啲唔同嘅石盤，用浸住一啲花，所以個環境都好靚，而呢度嘅御守都好靚，主要都係一啲喱士做嘅，另外亦都有啲花花主題的花手水，好靚！我就買咗今期嘅繡球花，順便攞住佢嚟影相😍😍

喺法輪寺出嚟，見到對面有另一間寺廟，不過呢度冇乜嘢睇，我唔知佢係咪墓地🫣

既然嚟到早稻田，就梗係要行去早稻田大學望吓啦，因為成日都聽到呢間大學名，喺門口影張相到此一遊，喺大學斜對面有一座建築物，外型好特別，所以影咗幾張相，見佢地面嗰層係salon，樓上就唔知係乜嘢😅

行返去火車站嘅時候，見到有一間咖啡店叫做早苗，個招牌都俾啲草遮住晒，個外型都幾特別，所以又入去飲杯嘢，裏面都係好舊，佢哋都有咖啡豆賣，我叫咗杯咖啡同埋一份飛碟多士，咖啡都OK，咖啡豆就唔買啦，因為今次都買咗幾包😄

跟住搭車去吉祥寺，純粹過嚟行吓街，原本都想去食牛扒，不過我唔記得咗間牛扒喺邊，所以最後都係冇去搵，就搭返車去錦糸町！

晚餐去咗火車站嗰間根室花まる，上次喺東京站食過，錦糸町呢間好似係新開，係立食壽司，去到要等位，不過都好快，正常佢落單係要寫日文要乜嘢壽司，不過佢有提供英文餐牌，用號碼代替壽司名，方便遊客落單，我都揀咗好幾款壽司，我覺得呢間好食過東京嗰間😅 食完嘢就搭返車去兩國站，今晚要執行李，聽日要返香港了！喺兩個站見到有個類似訪客中心嘅地方，有幾間食店，呢度整到好似一個相撲比賽場地咁，夜晚冇乜人可以影吓相！