2026年6-7月東京行 Day 11 - 兩國、江戶東京博物館、中目黑、東京站

話咁快，好友嘅七天旅程就完結，佢哋今日返香港，我就留多兩日先走，今日終於冇落雨，好友車我去酒店放低件行李先，酒店喺兩國火車站附近，好友送到我去酒店佢哋就自己揸車去機場，我就去酒店寄存行李，然後出去睇吓，喺火車站旁邊有座江戶東京博物館，見佢好似幾熱鬧，好多人排隊入場，咁我又入去睇吓，原來佢呢度係剛剛翻新完冇幾耐，所以咁多人去，呢度分咗兩個場館，一個係常設展，應該係長期做嘅展覽，另一個係特別展，即係會成日轉換主題嘅展館，我見特別展今期係洋館，而且要比¥1,600但係場館細好多，咁我就揀咗常設展¥800，場館大好多，亦都係最多人去，長者有半價，唔怪得咁多老人家排隊！

場館佈置成江湖時代嘅街道，有幾座建築物，仲有條橋，地方都好大，一入場已經係條橋上面，落咗橋係主要展覽嘅地方，展覽咗好多江戶時代日本嘅房屋及建設，亦都有好多微縮影，展示以前嘅街道及房屋嘅模樣，亦有一啲比較近代嘅展品，有唔少打卡位，我覺得都好值得參觀，因為地方又大又新淨，價錢亦都唔貴！仲有個假嘅富士山景，今次喺河口湖一帶睇唔到富士山，有個假嘅補返數🤣🤣

睇咗個半鐘就出返嚟，搭車過去中目黑，因為上次經過一間炸豬扒店，今次想去試吓！佢就喺Starbucks附近，店名係とんかつ富士㐂，呢度係用國產林SPF豬肉，佢係一種無菌豬，可以半熟，我叫咗極厚大里肌，都幾厚身，我覺得佢炸得過熟，中間沒有粉紅色，係完全熟透，所以肉質唔夠嫩😅不過都好好味👍🏻👍🏻

食完飯行過去旁邊Donki，幫好友睇吓有冇佢要買嘅嘢，點知呢間都有，一路幫好友搵佢要嘅嘢，行咗好多間都冇，終於喺呢間搵到，買完又行去Starbucks買杯嘢飲，今次就冇買嘢，淨係飲咗杯咖啡！冇落雨，天氣就開始有啲熱😅

搭返車出去東京站，諗住買埋手信，行咗一陣，再去睇吓去機場嘅巴士喺邊度買飛，然後去一間我之前mark低咗要試嘅拉麵店，叫做 Ramen Sugimoto らぁ麺 すぎ本，叫咗個醬油拉麵，醬油湯都唔錯，拉麵都幾好！買埋手信，就返去酒店附近食晚飯！

去到兩國車站，睇吓有冇lift，隨便睇吓附近有咩食，都係想食串燒，不過search咗都搵唔到有咩啱，所以最後去咗鳥貴族，呢間唔多人，又唔使等位，叫咗幾款串燒，覺得佢都係太多汁，有啲鹹，所以食得唔多，加上食完拉麵冇幾耐，咁就早啲返酒店執一執啲行李先！

酒店住後感：
APA Hotel & Resort Ryogoku Ekimae Tower 316
APA 我都住過好多間，呢間係最Grand，唔單止有溫泉，仲有泳池，地面係接待處，上一層有Lawson，酒店入邊仲有幾間餐廳，好少見佢有咁多設施，房間亦都算係比其他APA較大，但係房價係我住過最平嘅一間APA，只係需要二百幾蚊一晚，真係非常抵，唔知係咪因為淡季嘅關係，其實酒店行去火車站只係4分鐘，而且都係平路，位置都好方便，酒店仲提供咗¥2,500 offer 比你call Uber，我check過，如果由酒店去東京站，車費係¥2,400 至¥3,000，即係話可能免費或者幾百円就可以車你去東京站，都好抵！下次可以考慮再住呢度，如果價錢冇變😅