2026年6-7月東京行 Day 10 - 六本木、木更津、新宿

今日可以瞓晏少少，我哋10點先出門，先去附近搵一間阪急百貨，因為好友要買蛋卷！順便喺度行一陣，我哋book咗12點食晏，揸車過去六本木，泊好車就去搵餐廳食晏！

今次book咗候布雄 L’atelier de Joël Robuchon，雖然香港都有，但係日本嘅價格因為匯率低咗，差不多等於香港半價！餐廳嘅座位唔算多，唔知係唔係有啲房睇唔到，出面多數係吧枱位，我見兩位都係安排吧枱位，我哋三個先至坐四人枱，午餐嘅餐牌有幾個選擇，主要都係頭盤同主菜有得揀幾多款嘅分別，我哋揀咗最貴嘅套餐，有兩款頭盤及兩款主菜，店員話有Secret Menu，加¥1,500可以將頭盤轉做帶子，咁我哋就轉左，主菜就揀左兩款牛肉同兩款魚，我哋share食，先上咗麵包，跟住頭盤，最好味都係個帶子，用牛油煮嘅帶子一定好食！有一款牛肉我就覺得有少少羶味，應該係牛面頰，另一款都唔錯，反而個薯蓉好出色！甜品我就揀咗菠蘿雪糕，好幼就揀佢哋signature 嘅朱古力mouse，整體嚟講，我就覺得冇驚喜，正常發揮！

食完飯，揸車過去木更津三井outlet，揸咗成個鐘先到，呢個outlet我已經嚟過兩次，今次再嚟，我反而買咗件衫，相反好友乜都冇買，平時佢哋買嘢多過我，可能去outlet都去得好密，佢哋話上次買嘅嘢而家仲有得賣😅仲話下次都可以唔使去outlet！

跟住揸返車過去新宿，因為今晚又book咗食壽司😅今次呢間壽司店喺哥斯拉對面，嗰座Building，我曾經上過去食鰻魚飯，間鰻魚飯已經執咗，呢間壽司店叫做鮨やまけん，我哋個套餐有16品，再加任食鮪魚壽司(赤身及中拖) 16品包含咗前菜、壽司等，食完都唔算好飽，所以我哋每人叫兩件中拖壽司，食完再叫，不過個師傅都好識做，直接切咗三款刺身俾我哋，因為食刺身都可以好飽，七件厚切刺身都真係幾飽，跟住仲有魚蓉配多士，食埋麵包唔使驚唔飽😅所以我哋都冇再叫壽司，因為真係飽喇！

食飽飯就去Donki行吓，跟住再去藥妝店，因為呢兩間通常都係收得比較夜，都係返去之前必去嘅地方，我哋喺Donki買咗幾支酒，因為好有飲完我買俾佢哋嘅”澪”有汽sake，覺得好飲，雖然香港有得賣，始終日本平啲，而且今個旅程佢哋冇乜買嘢，但係又買咗32 kg行李，所以就買幾支酒返去，仲幫我帶埋返香港，因為我個篋已經爆咗🤦🏻‍♀️我哋俾錢嗰陣，個收銀妹妹，原來係香港人🤣