跟住就過去箱根玻璃之森美術館，其實佢好近我哋住嗰間民宿，喺大涌谷過去都好近，呢度要買飛入場，成人¥1,800，嚟到呢度佢又有少少落雨，不過美術館都有提供雨傘，呢度有部份係室內展館，有部份位置係好似花園咁嘅地方，都有唔少玻璃製品做裝飾，都整得好靚，有少少歐洲風格，可能因為佢係威尼斯主題，眾所周知威尼斯都係好出名做玻璃，可能係同佢哋有合作！
呢度有一個室內嘅位置整到好似歐洲嘅建築物，有拱形天花，上面有壁畫，都整得幾靚，另外商店都有唔少玻璃製品賣，我就買咗一個迷你玻璃沙鰻比好友做手信，出面嘅花園都有啲用玻璃做嘅花，例如玻璃嘅紫藤花，都整得幾靚，呢度亦都有間商店賣果jam，我哋都有試食，不過就唔係好啱口味！有興趣嗰啲味道佢又冇得試食🤣
跟住就出發去東京市中心，出咗車半個鐘左右就去咗休息站，呢個Expasa 足炳，好又話我哋嚟過，但係我就冇乜印象，呢個休息站都算係大站，我哋買咗支鮮奶同飯團，我就買咗炸雞上車食，日本嘅炸雞大部份都好食，而我哋買嗰支鮮奶嘅特別之處，係佢用A2牛奶，係日本稀小乳牛品種，我今次有帶膠杯，所以可以倒出嚟share😆 牛奶味唔係好濃厚，但係都好飲👍🏻
跟住再揸兩個鐘頭車，就去到表參道，因為好想去食一間壽司店叫做廻転鮨 銀座おのでら，呢間我都想去試，因為本身佢係做開Omakase，用同樣嘅貨源開咗迴轉壽司店，係非常之多人等位，因為佢不設訂枱，我哋先攞咗飛，再喺附近行吓街，再返去睇吓，等咗差唔多一個鐘就有位，見到佢壽司嘅價錢都唔平，應該算係比較高質嘅迴轉壽司，價格同好友嘅預期有落差😅價錢真係偏貴，我哋叫咗幾款壽司，都唔算特別出色，所以食咗少少就走！
我哋先去民宿check-in，嚟緊呢兩晚都住民宿，民宿嘅位置喺大田，搞掂check-in之後，就揸車過去台場，因為想去影高達，去到台場又落雨，好彩佢係商場，呢度有高達嘅Store，不過佢又係要會員預約先至可以去睇特別產品區，冇預約只能夠睇一般產品區，好有當然睇唔啱嘢啦，不過呢度都有介紹高達嘅歷史，都值得嚟睇！睇完再出去影高達，影完就返入商場食飯！
幾間都好有興趣，最後揀咗一間食蕎麥麵！跟住再買少少零食返民宿度食！又買咗一包餃子返去煮宵夜😆因為民宿有微波爐，我又買咗微波爐神器，所以就攞嚟試吓煮餃子，睇吓可唔可以做到燒烤嘅效果，不過煮完之後佢都係好濕，做唔到個底脆嘅效果！😅
酒店住後感：
Daiji Hotel 大田ホテル
呢個民宿係一座單幢樓，除咗地面一樓有個小Office，另外有幾間細嘅房，樓上兩層都係住宅式單位，一梯兩伙，唯一缺點係冇電梯，我哋要行樓梯上兩層，搬行李就辛苦啲！我哋喺地下接待處搵負責人，佢係一個中國人😅所以可以國語溝通，單位嘅面積就好似一般住宅咁，一入門口就係客廳，旁邊係洗手間，裏面有兩間房，一間係榻榻米，對住個廚房，旁邊有餐枱，入面有另一間房，旁邊就係浴室，呢度都幾新淨，好友揀咗最入嗰間房，咁我就瞓榻榻米，呢度雖然鋪咗一份床，其實個位置夠鋪多一份，廚房嘅設備都算齊全，仲有個焗爐，同埋呢度竟然係冇電視機🫣因為打風我哋都想睇吓天氣，同埋平時我哋住酒店都鍾意開住部電視機，等佢有啲聲唔會太靜，而家冇咗電視就真係好靜，唯有各自睇手機😅呢度樓下有自己嘅停車場，所以泊車唔使另外俾錢，對面仲有便利店，都算幾方便！
沒有留言:
發佈留言