2026年6-7月東京行 Day 8 - 日本平、箱根仙石原

今朝早少少出發，先去靜岡縣嘅日本平，喺山頂嚟，今日個颱風應該迫近東京，所以天氣仍然係大雨大霧，去到日本平個纜車站，泊好架車，入去行個圈睇吓，因為呢度有商店，主要都係賣一啲手信，跟住直接行上去日本平夢陽台，因為落雨嘅關係基本上冇乜人，除咗我哋只係見到有兩三個人，原本呢個地方係可以望到富士山，當然而家大雨大霧係睇唔到，呢度嘅地下係一個參觀講解日本平嘅位置，上一層就係餐廳，我哋就叫咗少少嘢食同飲品，都係有富士山主題嘅飲品，我就食咗一個scone，同埋一杯Wasabi雪糕，個味道都幾特別，幾好食！

食完嘢行返落去纜車站，喺商店買咗杯橙味雪糕，呢杯就麻麻哋！

跟住我哋去清水魚市場，原本我哋plan咗今日搭船去駿河灣，但係因為打風嘅關係，航班取消咗，所以要改為揸車過箱根嗰邊，喺魚市場睇唔啱嘢，因為原本想買啲食物今晚食，既然睇唔啱就揸車去今晚住嘅地方附近，好友 book mark咗間超市，我哋就去嗰度買嘢食！

揸咗兩個鐘頭車先去到箱根嘅仙石原，今晚又係住house，所以要買餸，我哋去咗一間叫做A coop，呢間超市唔係好大，不過都幾多人，我諗好多人同我哋一樣，因為箱根都好多本地旅遊住宿，我哋買咗嘢今晚打邊爐，去完超市走嘅時候先發覺斜對面有間精肉店，應該啲肉會更加好，所以見佢企滿晒人！不過已經買咗肉，所以冇再去睇，直接揸車去我哋住嘅地方！

成功check in之後，我哋就準備晚餐，諗住煲個煮完擺上枱度食，因為佢冇獨立嘅電磁爐可以攞去枱面用，唯有喺爐頭煮完成煲擺上枱食😅

酒店住後感：
A未來箱根 Sengokuhara Resort 仙石原渡假村
其實都唔係好清楚呢個度假村真正嘅名，因為喺地圖上面冇好清楚嘅指示，去到現場見到係好隱蔽，唯一係旁邊有半圓形嘅波波屋吸引到我哋望過去，呢度附近應該都好多呢一類嘅度假村，我哋住呢個度假村只有幾間屋，完全係冇職員，係自助check-in，雖然佢嗰度有個Office，不過係冇人，呢度有個指示牌，顯示咗呢度應該有四間屋，都係以 “Xの影”命名，我哋住嗰間係”桂の影” ，而呢幾間屋都係俾好多樹包圍住，都幾潮濕，真係幾有荒山野嶺feel😅 

屋入面都算幾新淨，間屋有三層，地面就係飯廳廚房同客廳，地方都幾大，客廳旁邊推門出去，仲有個室外浴缸俾你浸溫泉，不過位置有啲奇怪，因為浴室喺地庫！落一層地庫，有另一個榻榻米嘅廳，應該係人多嘅時候可以愛嚟改造睡房，及一間雙床睡房，一個浴室連洗手間，由客廳上一層就只係一間睡房，因為間屋係尖頂，所以頂樓係比較細！呢度可以最多住到8人，因為客廳張梳化都可以拉出嚟變梳化床，間屋都唔錯，不過真係頗潮濕，好在每一層都有抽濕機，我哋入屋開冷氣亦都要開埋抽濕機，好友揀左住地庫間房，我就住頂樓，頂樓係有個窗口可以望到落客廳，所以呢間房係冇冷氣，靠隻窗將客廳嘅冷氣打上嚟，不過房入面有抽濕機同涼風機，好友落去地庫開冷氣嘅時候，部分體冷氣機一打開跳咗隻蜘蛛出嚟！嚇到佢唔敢瞓地庫，最後佢哋選擇喺客廳瞓😅因為間屋好似喺樹林入面咁，所以好容易發現屋入邊有昆蟲，好似我落車攞一攞嘢返嚟就已經有蚊飛咗入嚟😅所以入住都要考慮驚唔驚有昆蟲😅而且夜晚出面係冇燈，不過樓梯嗰度有自動感應燈！