住咗一晚咁靚嘅Villa真係唔捨得走，今日出發過去靜岡！
本來諗住今朝去買富士山麵包，但係大家都唔記得咗呢件事，直接出咗去Workman 睇衫，不過就睇唔啱嘢，因為我自己早兩日已經買咗，然後就去河口湖嘅大石公園，仍然係落緊大雨，不過呢度都唔少人，可能大家好似我哋咁嘅心態，來都來了，都出去睇吓啲花花草草，呢個公園三年前嚟過，當時係睇芒草，今日呢個天氣係睇繡球花，後面嘅商店好多人買雪糕，我記得上次我就冇買，今次就買來試吓，佢所有雪糕都係兩種味，我揀咗薰衣草配一種唔知乜嘢花，個味道都唔錯！
食完雪糕我哋揸車去靜岡，揸咗一個鐘頭多D車就去到，我哋去富士山世界遺產中心，因為嗰度冇得泊車，所以我哋泊咗架車喺附近嘅AEON，然後行過去，點知今日冇開🤦🏻♀️ 唯有喺門外影張相到此一遊，跟住行返去AEON，行個圈睇吓有冇嘢買，最後我哋冇買嘢，但係喺嗰度食lunch，去咗一間叫做美山，係食Shabu Shabu，而且係放題，所以我哋就每人叫咗個牛+豬嘅套餐，食物嘅質素都OK價錢都算平！
跟住有個幾鐘頭車，就去到酒店check-in，放低行李再出去食嘢！大家都想食串燒，搵咗附近一間評分比較高嘅串燒店，叫做焼ki鳥×栃木もの Kibun Joujou，佢係樓上舖，只有Bar枱位，上到去剛剛好有三個位，店員都非常友善，大家用有限英語溝通，都食得好開心，雞串燒味道唔錯，價錢合理👍🏻食完嘢都九點幾，所以條街已經冇嘢行，今日大部份時間喺交通上，所以夜咗先到酒店😅
酒店住後感：
Koko Hotel Shizuoka
由於靜岡縣係好多模型生產商所在地，所以好多裝飾都係用玩具模型，酒店門口個名都係，呢間前身亦都係Wing Hotel，就上次金澤住嗰間一樣，酒店有啲位置幾新淨，可能房間翻新過，房入面嘅空間唔大，酒店有提供浴場，我就冇去浸，大堂亦都有提供小包護膚品俾人自取，泊車去指定嘅停車場可以有優惠，不過好友泊錯咗去第二個停車場，所以冇用到優惠，不過冇優惠都係¥1,600 爭¥400！
沒有留言:
發佈留言