2026年6-7月東京行 Day 6 - 河口湖、富士山五合目

今朝check out完就落去停車場攞車，一出嚟就見到落緊雨🤦🏻‍♀️今日要去富士山，所以都係較為長途車！我哋去咗便利店買少少嘢食，我就試咗Family mart 新出嘅蜜瓜沙冰，都幾香甜👍🏻

架車行到咁上下，又要去中途站休息，我哋去咗Expasa談合坂休息站，呢個站都好大，有幾間食店可以堂食，仲有Starbucks，我就幫襯買咗杯咖啡😆

我地第一站先去河口湖，想買富士山麵包，但係麵包店冇開，跟住直接去河口湖，出面落緊雨，所以湖邊冇乜人，我哋去旁邊嘅曲奇餅店，買富士山造型嘅曲奇餅同埋鐵罐仔，跟住就上返車，再上去富士山五合目！

我哋經過好多人打卡嗰間Lawson，但係睇唔到富士山，所以都冇落車影相，直接揸車走😅

上到嚟五合目，都有幾架旅遊巴，即係都有幾個團上咗嚟，亦都有少量私家車，不過雨勢都頗大，而且好大霧，乜都睇唔到，唯有喺商店入面行吓，好耐冇嚟過五合目，記得人生第一次去日本，就已經跟團嚟過，之後就冇再嚟過了，對佢嘅記憶都好模糊，呢度嘅商店都主要係賣手信，入面亦都有一間郵局，所以有明信片賣，呢度亦都有富士山登山嗰支木杖，以我所知，呢支木杖，係登頂嘅時候，可以幫你印標記上去，既然我哋冇登頂，所以都唔會買，見到手信之中最搞笑應該係罐頭富士山空氣，都要收人¥500🤣記憶中上次嚟嗰陣已經有得賣😅 留意店入面嘅洗手間係要俾錢¥100，而停車場附近有個公眾洗手間就係免費！

行咗一陣就上返車，因為雨勢都非常之大，因為日本有雙颱風迫近，天氣持續唔穩定！我哋揸車過去超市買餸，因為今晚煮villa，可以自己煮食，去咗一間叫做Watahan Super Center 買咗海鮮同牛肉，然後去做check-in，不過我哋去錯第二間villa，因為個名差唔多，不過過返去都係幾分鐘車程，去到就做check-in手續，我哋辦緊手續嘅時候，見到有另一對香港人夫婦都做緊check-in，佢哋話唔明職員講晚餐嘅安排，我諗佢以為晚餐係會煮好俾佢哋，其實佢呢度訂房訂埋晚餐嘅話，都係要自己煮，所以我哋冇特意訂晚餐，自己買嘢過嚟煮！攞咗鎖匙之後，可以直接揸架車去我哋住嗰間Villa度泊車！

參觀完間屋，就準備晚餐，我哋食得好開心，因為可以慢慢嘆，傾吓偈飲吓酒，都好舒服👍🏻👍🏻

酒店住後感：
Fuji Gran Villa - Toki
呢度一共有72間House，每間都係樓高三層，每間屋外面都有停車位，頂樓都係天台可以BBQ，主要分咗兩大類屋型，有冇風呂嘅分別，再分唔同type，我見我哋揀嗰種冇風呂嘅，都係主要分咗雙床房定係雙人床房，而有風呂嘅單位都係比較大，當然價錢都會貴啲！喺接待處見到係可以租單車，如果要喺天台BBQ亦都要租爐，不過個爐就已經擺咗喺屋入面，原則上每座樓嘅天台都望到富士山，爭在角度同埋有冇嘢阻，我哋住嗰間屋喺最入，富士山方向會比隔離兩間屋嘅電纜阻咗少少，問題係今日好大霧，連富士山都見唔到😅 間屋都好新淨，應該開咗唔係好耐，我哋都係網上見到廣告，見佢價錢都唔貴，原本我哋book咗另一間舊少少，但係價錢一樣，三個人嘅房價只需一千港元（如果兩位仲平啲），所以我哋轉咗book呢間，一入屋就係洗手間，再入係開放式廚房，前面有餐枱，旁邊係兩張床，廚房後面係浴室，上一層，沿着樓梯佢會自己着燈，基本上同頭先廚房及飯廳一樣大，但係只係得一張梳化，呢層都有浴室同洗手間，旁邊亦都係兩張床，梳化對面有個幕，for 投影機用！可以坐喺梳化睇，再上已經係天台，天台只有一張枱同幾張凳，仲有太陽傘，燒烤爐喺屋入面，不過落雨我哋就唔玩燒烤，可惜天氣唔好睇唔到富士山！廚房嘅設備都好齊全，除咗有一個雙頭爐之外，有一個電磁爐，可以擺喺飯枱打邊爐都得，不過今餐我哋買咗燒肉煎，因為唔知佢有電磁爐可以擺上枱，餐具各樣設備都好齊全，呢度基本上要揸車過嚟，不過我睇過最近嘅火車站喺富士急樂園嗰邊，行過嚟大概要十幾分鐘，如果拎住行李就有啲吃力，整體嚟講，呢度住係非常好嘅體驗👍🏻👍🏻👍🏻👍🏻