今朝喺民宿check out之後，行去火車站出面嘅巴士總站，搭”都02”線巴士，坐8個站，在本所一丁目落車，酒店就喺斜對面，先去酒店放低件行李，睇埋附近泊車位置，等今晚好友到步嘅時候知道邊度有得泊車！跟住步行去藏前火車站，順便喺呢邊睇吓有冇嘢食，搵咗一間餐廳叫做Blucca，食個早餐，叫咗一杯咖啡同埋一個scone，見附近冇乜嘢行，就直接搭車出去新橋！
去新橋主要係搵一間食海鮮丼嘅舖頭，みこ食堂，見佢價錢都好平，去到見到其實係一間好細嘅海鮮丼舖頭，只有幾個企位，大部份海鮮丼都係¥1,900，有一個淨海膽嘅丼¥3,500有100g海膽，我唔想食咁多海膽，所以揀咗個海膽拼三文魚子丼¥1,900，佢係要喺門口買飛，轉頭會有人攞俾你，佢有免費嘅麵豉湯同茶供應，老實講個丼係會比較細碗，不過就啱我心水，因為要食其他嘢，唔想食咁大碗飯，當然海膽同三文魚籽嘅份量都係比較少，不過材料都係新鮮，質素都過得去！
跟住行過去JR新橋站嗰邊，呢度熱鬧好多，而且好多食肆，我原本想去食一間串燒，但係佢未開門，到夠鐘開門嘅時候，見到門口有啲職員企咗喺度，問佢哋話未開，唔知係營業時間改咗，定係唔想招呼外國人，所以我就放棄咗，喺附近商場見到有一間食蛋包飯嘅舖頭，只有幾個位，但係有廿幾人排隊，原來佢份量好大，但係價錢好平¥1,200起，唔怪得成條隊都係男士！
食完嘢行去銀座，又去飲咖啡，上次去到Glitch coffee要排隊所以冇飲，今次晏晝過去，唔使排隊，直接有位，先埋去揀咗要黑咖啡定係有奶嘅咖啡，跟住就揀用乜嘢咖啡豆手沖，揀咗Campo Hermoso ，跟住坐低等佢攞俾你，我坐喺Bar枱，可以睇住佢哋沖咖啡，呢間店嘅職員個個都可以講較流利嘅英文，而且動作都好快，證明呢度係做遊客生意多，流程都冇咁傳統地慢，都算係一個合理嘅速度，好快手就冲好你要嘅咖啡，咖啡係一個小樽裝住，另外有一個杯俾你倒出嚟飲，跟咗一張卡仔介紹你揀嘅咖啡豆，我揀呢款咖啡豆都唔係太啱我心水，不過都唔差，坐坐吓就開始多人，店入面只有十幾個位，不過知道有一班五個人差唔多走，等佢哋一走就可以release多啲位出嚟，門外面正好有3+2在等位😆飲完咖啡又買咗兩包咖啡豆先走！
原本今日想去試吓炸豬扒，見到店外排緊隊，有個牌寫住只係做外賣，我見佢淨係賣外賣都等好耐先完成一單落單，見店員俾張單你，要轉頭先可以有得攞，所以我就唔等了！我諗起之前喺福岡，有間烏冬店因為太多人排隊冇去食，最近佢喺東京開咗分店，我就行過去睇吓咩環境，間烏冬店開咗喺橫街入面，店名係麺屋いしヰ，竟然冇人排隊，仲有好多位，呢度主打兩款烏冬，一款係牛肉，另一款係明太子，我就揀咗牛肉，先喺門外買飛，再安排入座，店員都好好Service，見佢牛肉都好多油花，先用汁煮一煮牛肉，再放在烏冬上，再用火槍燒一燒，加埋個蛋黃，咁就搞掂！好好食👍🏻
喺銀座行多一陣街，就返去酒店等好友，搭返火車去藏前，行返酒店嘅路上見到一間好古舊嘅玩具店，見到門口放咗啲Badge¥100一個，難得見到有Sanrio 隻馬騮，所以買咗兩個，行過一間茶店，又買咗兩盒茶包，返到酒店先攞返行李再做 check-in，上到房放低行李等好友電話，佢到咗再通知我落去會合佢，然後一齊出去！
會合咗好友之後，我哋揸車去神保町，主要係去買眼鏡，好有之前大開一副太陽眼鏡，牌子係Airfly，主打係冇鼻托嘅眼鏡，方便運動人士，好有本來想配一副有度數嘅眼鏡，但係要等三個星期，不過佢就另外買咗一套鏡，過佢舊嗰副眼鏡可以換，我就睇啱咗一副太陽眼鏡，戴上去真係感覺幾好，而且全部日本做，雖然冇得退稅，但係可以打九折，等同退稅一樣，正👍🏻
買完眼鏡，就揸車去食晚飯，好友訂咗一間燒肉店，就喺赤板見附，我哋兜咗幾個圈先搵到個平啲嘅停車場，泊好車諗住早少少上去睇吓有冇位，店員話我哋訂咗幾點就要幾點，見佢地都好繁忙，我諗訂枱都好緊湊，唯有去行個圈再上嚟，店名叫做赤坂みすじ by Yoroniku，佢係樓上鋪，睇落都有啲歷史，我哋準時上返去就有位，佢唔係任食，只有散叫或者套餐，我哋睇過套餐唔係咁啱心水，所以都係散叫，揀咗餐牌上面打咗星號嘅牛肉，有牛肩、厚切牛舌等，呢度嘅牛肉嘅肉質唔錯，好軟腍，牛味亦都重，幾款肉都好食👍🏻👍🏻正👍🏻👍🏻
食完飯又去行吓Donki，又睇吓藥妝，又幫人買雨傘，跟住揸返車酒店附近間7–11 ，又係甜品時間，我買咗條朱古力脆皮包住香蕉，都幾好食！返到酒店都11點，聽日就要去富士山，希望天氣會好D！
酒店住後感：
Hotel Mystays Asakusa
酒店鄰近沒有火車站，最近都要去Metro嘅藏前站，或者遠少少嘅JR兩國站，或者好似我咁，喺錦糸町搭巴士過嚟，除非自己揸車，否則唔係太方便！酒店有點舊，入口係要行樓梯，如果好似我咁拎住行李，最好就行去停車場，嗰度有電梯上去2樓接待處，咁就可以唔使行樓梯，酒店最頂嗰三層8樓以上裝修緊，估計佢應該會成座翻新吧！佢成座建築有啲似住宅改建，房內有一個似係小型廚房嘅位置，只係冇煮食爐，但係有微波爐，而且有兩個雪櫃🤔有啲房嘅位置，門口係露天地方，房間入面嘅空間唔算大，洗手間亦都較細，我住7樓，所以早上check out 時都聽到樓上有少少工作聲音！不過房價都係比較平，而且四圍嘅環境都係比較靜，我哋只係住一晚所以冇所謂！圍繞酒店附近都冇嘢行，好在便利店只係隔兩個街口！
沒有留言:
發佈留言