今朝要check out嘅時候，順便用大堂嘅磅，磅下件行李，只係23 kg，原本想搭Uber，最後都係決定搭地鐵，要去東京站有兩個方法，一係搭車去秋葉原轉車，或者搭返去錦糸町轉車，我最後決定去錦糸町轉，因為秋葉原可能要上上落落！錦糸町要落一層行去另一個月台，我知道有電梯，所以最穩陣就係咁樣轉，直接搭到去東京站，雖然推住件行李，但係東京站入面好大，推住行李行都冇問題，再睇多一次有冇其他手信要買，然後就去搵啲嘢食，見到一間食親子丼嘅店，叫做伊藤和四五郎商店，我去到嘅時候一個客都冇，當我坐低落完單開始食嘢嘅時候，就開始有人入嚟，當我走嘅時候幾乎坐滿晒😅
行多陣就去買車飛，喺7號站旁邊有售票處，有自助售票機，買飛係冇分搭幾點班次，可以即買即搭，因為LCB班次好密，每10分鐘一班車，搭唔到呢架可以搭下架！我見到架車未滿晒佢都開車，因為夠鐘，咁亦都唔介意搭下一架，因為時間尚早，車程大概係一個鐘，我呢班車都係唔滿，我旁邊都冇人坐，巴士先停T3 ，再去T2，總站係T1 ，我就要去T2，去到機場時間尚早，都係兩點鬆啲，咁就喺機場行一陣，睇到有個手提行李箱，幾啱我心水，因為香港都有嗰個牌子，所以我諗住返香港睇吓幾錢先，亦都唔係急住需要買，因為佢係比較細size，我都考慮如果太細不如孭背囊，但係我又唔想買太大，所以都係考慮吓先！見到機場呢度有間Pop Mart，竟然冇乜人，Labubu嘅產品非常齊全，連早幾代嘅限定公仔都有！可見熱潮已過😅
我搭五點機，三點先至去寄行李，唔使排隊都好快，過海關亦都冇乜人，過咗海關就搵Royce嘅手信，佢出咗一隻圓形嘅費蘭雪蛋糕，中間加咗朱古力醬，好友推介或必食，所以我就買咗幾盒，味道都唔錯👍🏻上機之前又去食飯，去咗菊川食鰻魚飯，原本考慮食篝拉麵，不過今個行程冇食過鰻魚飯，所以都係改食鰻魚飯，食完鰻魚飯再去整個甜品，叫咗一個蜜瓜巴菲！好好味，跟住見到隔籬嗰間神乃咖啡店，有隻七夕嘅咖啡豆，又買一包試吓😅
跟住就去等上機，今次飛四個半鐘，小睡咗一陣，到步之後又搵嘢食🤣 又去翡翠食咗碗水煮牛肉麵同小籠包先返屋企😆
沒有留言:
發佈留言