今日去中環做檢查，搞掂咗就去附近睇吓有乜嘢食，上次同好友去中環行過一段石板街，今日行埋另一段，見到有間餐廳，主要都係買麵包，之前網上有人介紹過，見佢排晒隊，今日可能黃雨嘅關係，唔使排隊仲有好多位，攞咗位之後，望一望啲麵包，樣樣都好吸引，叫咗一個Pain au chocolat ，同一杯Matcha cloud ，跟住坐低等，先發覺原來有另一個餐牌，有沙律同埋一啲酸種麵包，不過既然叫咗嘢，所以冇再叫餐牌上嘅食物，杯飲品上層係抹茶嘅泡沫，下面係椰子水，個配搭都幾得意，至於個Pain au chocolat 個樣好靚，好有層次，不過味道就冇想像中咁好，外皮唔係好脆，牛油味亦都唔算濃，食完再加多一個Quiche mushroom ，呢個就脆D，表面略為燶咗少少，可能佢reheat咗，食落口係暖暖哋，整體嚟講都算唔錯！
沒有留言:
發佈留言