又出發，甚少喺呢個月份會去日本，因為天氣都比較熱，今次搭凌晨機，自從HK Express 上個月搬咗去香港機場T2，今次係第一次去新T2，記憶中以前係有T2，但係冇乜人去，今次唔知係咪算係翻新咗，見多咗食店，所有機場巴士都加左去完T1再去T2 ，車程多4分鐘，呢邊好新淨，食店就一眼睇晒大概有6-7間，而登機櫃位幾乎係全自助，就算有職員嘅counter都唔同T1咁嘅櫃位，簡單好多，我自己去自助機辦登機手續，自己去寄行李，影一陣相就去過海關，過咗海關之後係冇店舖，直接就去搭無人駕駛，搭一個站就可以去返T1 ，其實都係以前無人駕駛嗰條線，只係多咗一個T2站，如果要食嘢，一係過關前食，或者過關後搭返無人駕駛去T1食，我因為同朋友食咗晚飯，所以就唔使食喇！
去到日本係上午六點幾，過海關完全唔使排隊，去到行李運輸帶仲要等行李，出到機場仲諗緊搭乜嘢車出市區，見到有個LCB ，Low cost bus，去東京站單程只需要¥1,500，比較利木津巴士¥3,100和NEX ¥5,500 來回更平，見佢最遠去到池袋¥2,300，我唔知道佢係咪一向都有得搭，因為比較少搭巴士，咁啱見到就試吓，見佢班次都相當密，買完飛10分鐘後有車，行出去6號車站，巴士同一般旅遊巴差唔多，有專人幫你搬行李上行李巴士上的區，俾張飛你之後認領行李，然後上車等開車，我見都幾多人搭，車程65分鐘去到東京站，去到火車站，先將件行李放喺locker，因為今次住民宿，所以冇得寄存行李，大嘅locker每日¥1,000，如果去寄存行李嘅舖頭就要¥2,000😅
跟住喺東京站搵嘢食，之前mark咗好多間舖頭都想食，原本想去食壽司，但係太早佢未開，跟住搵咗一間法式餐廳叫做Viron ，喺東京站行過去都好近，去到門口已經見到係好法式嘅裝修，店外面亦都有啲枱凳，就好似法國嘅餐廳咁，不過今日有少少雨而且比較熱，所以室外位係冇人坐，入到店係餅店，如果你選擇喺度食，就會安排座位，我揀咗兩件餅之後先知道應該攞咗位先，因為佢有張紙俾你mark名同人數，所以要等一陣先有位，其實眼見佢已經有位，不過日本嘅餐廳係點都要你等，不過都好快可以入座，揀咗兩件餅係brioche 同一個pie，另外叫咗杯latte，咖啡係LavAzza ，兩件餅都唔錯，咖啡就一般！
跟住行過去銀座，睇返自己Mark咗嘅食店，有一間拉麵店，開11點，去到嘅時候10:55 ，已經有四個人排緊隊，咁我就排埋一份，拉麵店係Ginza Ton Box，一入門口就係售票機，拉麵只有兩款湯底，醬油同鹽味，同埋淨係得叉燒，只係要唔要多啲份量同雞蛋，我揀咗有雞蛋嘅醬油拉麵，店入面只有七個座位，不過佢好似有樓上，因為喺門口見到有條樓梯，但係唔多覺佢有帶人上去，見師傅係逐碗做，所以買完飛都要稍等，由入門口買飛到拉麵上枱，都用咗18分鐘，拉麵嘅味道都唔錯，湯底都幾好👍🏻食完出嚟11:30，已經見到大排長龍😅
喺銀座行咗一陣開始落雨，我本來係有帶遮，但係把遮擺咗喺個行李箱度，所以要買一把遮，不過本身都諗住買一把WPC嘅 IZA 遮，行咗去Loft，見佢今期做水族館主題嘅promotion，有幾間日本水族館嘅產品售賣，有我哋之前喺福岡去嘅嗰間水族館都有！
跟住行過對面UNIQLO，又買咗兩件T恤，行到咁上下就過返去東京站，行去大丸睇吓啲手信，因為知道Sugar butter tree出咗一款新嘢，係綠茶味嘅Sugar butter pie，只係關西機場先有得賣，去到大丸見到佢有原味，即係牛油味，即刻買咗三盒，諗住有一盒喺日本試食咗先！如果好食再返嚟買！
買完嘢攞返行李，再搭車過去錦糸町！今次又住錦糸町！由東京站搭火車JR總武線過去，只係三個站，民宿都幾近火車站，民宿樓下係一間燒了店，放低行李之後，本來想去食生蠔，但係佢冇位，唯有book定明天晚上，今晚就去民宿樓下食燒鳥！店名係Yakitori Major 焼鶏メジャー，見佢都好新淨，可能開咗唔係好耐，店門係半透明，望到裏面有幾個客，有幾個空位，問一問職員有冇位，佢話有，不過佢哋只提供 Course Menu 17品 ¥7,980，咁就試一試佢，因為見喺Tabelog 評分都幾好，店嘅面積好細，一眼睇晒，中間係燒烤爐，圍住燒烤爐有八個位，另外有一張三人枱喺旁邊，我坐低嘅時候有四個客，佢哋應該比我早少少到，因為佢哋都係食緊頭盤，店員都好快上咗頭盤，有三款食物，一小碗好似粟米湯嘅飲品，一個凍嘅螺，仲有一款係魚生，都好精緻，味道唔錯，跟住係一個紫菜包住嘅食品，但係我已經唔記得咗佢係咩嚟😅跟住陸續上串燒，每燒完一款，師傅就會將串燒放喺你面前隻碟，師傅都會講呢串係乜嘢，分別有雞腿、雞頸、砂肝(腎)、雞肝、雞翼等，雞串燒都係高質素，好食，有一款迷你漢堡包，入面嘅肉係雞肉加鹿肉，都幾特別，店員用有限嘅英語去講解，又用翻譯機翻譯，店員話師傅識講中文同韓文，後來師傅同我講國語，原來佢係來自中國，真係睇唔出，我估佢喺日本好多年，所以個樣已經唔似中國人😆食完之後店員話可以encore一款串燒，我就揀咗雞肝，因為好好味！食完嘢再出去行吓，因為咁錦糸站附近都好多嘢行，佢有一座商場，有齊各個主要連鎖店，有Daiso、Life 超市等，難得佢有Workman Girls，我都買咗兩條褲，又買咗隔熱床墊，見佢價錢好平，所以買來試吓🤭行咗一陣再返民宿休息！
菲奧雷錦糸町 by Tranova
我去到搵唔到間民宿，因為網站比嘅地圖係唔啱，好在屋主俾咗圖片，之前冇睇清楚，而家搵唔到嘅時候就再睇多次佢嘅圖片，先至搵到原來係斜對面嗰座，去到先發覺原來佢係冇電梯，其實網站有寫，不過真係冇為意，我諗就係佢價錢較平嘅原因，民宿嘅地下係一間燒鳥店，地面1/F及2/F屬於燒鳥店，3/F-5/F就係民宿，好彩我住3/F，只係上兩層，大約二十級樓梯，佢一梯兩伙，每層只有兩個單位，我在信箱取了鎖匙，再拎埋件行李上去，一入門口一眼睇晒，因為我係一個人，所以訂嘅係單人房，佢有個小廚房，一張單人床，有枱凳，洗手間都頗大，有日式洗衣機，另外有浴室，最好係有浴室寶，可以幫助乾衣，之前睇網上評價話佢冇牙膏牙刷，但係今次見到佢有，應該屋主係接納客人嘅意見，不過佢就冇供應漱口杯，當然可以攞廚房嘅杯用，不過我已經自備咗，所以就用自己嘅膠杯，用完就掉費事再帶返香港！整體嚟講成間民宿都好乾淨，亦都幾新淨，不過我一個人就用唔到廚房！呢間民宿都唔錯，位置都算近火車站，比起我上次住嗰間再近D，只可惜沒有電梯，頭尾兩日要拎行李都幾吃力😅
沒有留言:
發佈留言