2026年6-7月東京行 Day 2 - 御茶之水（聖橋）、迎賓館（赤坂離宮） 、谷中銀座

今朝起身去火車站附近行咗個圈，睇吓有咩巴士搭，先去食個早餐，見到一間好舊嘅咖啡店，叫做Cafe Mountain ，叫咗一件果醬多士加烚蛋及一杯咖啡，餐廳應該好有歷史，內部裝修都好舊，食完個簡單嘅早餐，再去望吓Skytree，尋日落完雨，今日都好大霧，好彩冇落雨！

食完早餐去搭JR中央總武線，可以直接去御茶ノ水，火車去到秋葉原，停咗喺5號月台嘅牛奶店前面，所以落車飲支鮮奶，再等下一班車，今次揀咗東京·府中產嘅Craft Milk，見佢係數量限定，味道都唔錯，不過唔算特別香濃，飲完剛好有火車埋站，又上返火車去御茶之水😆

今次去御茶之水，主要係想去聖橋，睇吓影唔影到三條火車線都有火車， 聖橋出口一出去就見到有啲人捕咗喺天橋上，我都埋去捕埋一份🤣 等咗一陣就影到三架火車同步經過！其實離遠仲有一條火車軌，不過範圍比較細，應該都好難影到四車同步！等咗2分鐘就已經影到已經算OK😆 影完相去附近行吓，見到有間教堂，東京復活大聖堂，都幾靚，不過只係影外圍，因為今日星期日，有啲人喺入面做崇拜，為免打擾人，所以只係影咗外圍！

再行去火車站嘅另一邊，呢邊有一座湯島聖堂，係日式嘅佛堂之類嘅建築，唔算特別靚，不過到此一遊，影幾張相就走！

跟住搭車去四ツ谷站，由御茶之水過去只係四個站，跟住行去迎賓館赤板離宮，呢個地方主要係接待外國嘅領袖，見面或開會嘅地方，去到門外已經見到一個英式大閘，好有歐洲feel，唔係傳統日本嗰種和式建築，大閘呢邊係出口，要兜返去側邊嘅入口入場，入場前要經過安檢，檢查都頗仔細，今日星期日，參觀嘅人都幾多，不過只係見到日本人，感覺好似只有我一個係講英文😅 因為我同安檢嘅人講英文嘅時候，佢哋嘅表情好意外，仲問我邊度嚟，點解識嚟呢度？我只係答佢哋喺Facebook見到有人介紹😅做完安檢之後，買飛入場，有幾種票價，我原本係想買睇晒所有嘢，但係職員只係俾咗張飛我去本館和庭園，冇咗別館，唯有睇少一個館，因為見地圖上呢個和風別館比較細，去本館參觀嘅時候，講明唔可以影相，所有相機手機要收埋，入到去確實係好富麗堂皇，真係歐洲式嘅宮殿咁，牆上面有好多畫係同雀鳥有關，各個廳都有幾個大嘅水晶吊燈，好似參觀緊歐洲嗰啲皇宮咁，不過每個廳嘅面積都唔算好大，同埋屋頂嘅畫像，冇歐洲咁靚，樓底亦都冇咁高，每個廳入面都擺咗一啲正要喺度影嘅相，平時可能冇留意，而家睇返啲相，先發覺原來喺呢度影，見到一張係李克強，又有法國總統，喺佢哋影相嘅位置就擺返佢哋嗰張相，下次睇呢啲新聞可以留意吓個背景，有好多個位置都幾靚，可惜唔可以影相，參觀完本館，就可以出去庭園！

睇地圖個庭園好似幾大，實際又冇想像中咁大，細過歐洲嘅皇宮庭園好多！今日天色唔太好，加上只係影外圍，睇落有點舊，喺庭園有個空地，擺咗兩格餐車，可以買少少嘢食，我就買咗個Scone 加杯飲品，坐一陣，見到人哋有Tea set可以high tea，都幾識做生意！今日有少少熱，坐一陣就走了！

搭返JR去日暮里，主要係去谷中銀座，去打卡動漫電影你的名字景點夕陽階梯（夕やけだんだん)，呢度有條商店街，由火車站行去夕陽階梯都好近，先經過幾間小店，喺樓梯口有一間叫做cannelé de papin 嘅小店，顧名思義係食cannelé ，我反而俾佢嘅雪糕吸引咗，所以買咗一杯桃雪糕同朱古力費蘭雪，見佢有啲迷你cannelé ，不過一買要五件，所以我都冇買嚟食，店𥚃面可以有幾個座位坐低食，門外亦都有枱凳，我就坐喺出面食！食完垃圾可以掉返去舖頭入面嘅垃圾桶！雪糕好味，桃好甜！費蘭雪就普普通通😆

沿着樓梯行落去，兩旁都有一啲食店，有啲都有貓貓裝飾，落到去商店街左右兩邊，先行左邊，其實呢條商店街唔係好長，店舖亦都唔係好多，不過都算各具特色，有咖啡店、服裝、食店等等，我只係買咗咖啡豆，經過一間賣牛肉的店，見佢啲肉都好吸引，我又唔想自己一個喺民宿煮，所以都冇買！😅

行咗一陣冇乜收穫就走了，因為今晚book咗食生蠔，所以先返去民宿放低啲嘢，再出去食生蠔，呢間拉麵店むかん牡蠣，日頭係賣拉麵，晚上係居酒屋，上次住錦糸町食過一次，生蠔¥150一隻，都好抵食，不過其他食物相對係少選擇，我諗佢主要係飲酒，我叫咗三隻生蠔，又叫咗一碟菜，同埋一碟雲吞有兩隻大雲吞，之後再加多兩隻生蠔🦪最後加多半碗拉麵結尾😆

食飽就喺附近行吓，去咗便利店見到之前飲過”澪 MIO”呢隻有汽sake，出咗新嘅口味洋梨香味，見佢細細支，就買一支過幾日同朋友一齊試飲！跟住行咗去Workman Girl ，試咗一條夏天着嘅長褲，質料好清爽，而且好啱身，即刻買咗兩條，又買咗一張降溫嘅床墊，聲稱可以-6°C，見佢幾十元，就買嚟試吓！買完嘢就返民宿休息！