家後2.0 / 主教山、前深水埗配水庫

又去深水埗，去咗食餃子，呢間餃子店之前有去過想食，但係當時冇位，今日嚟到，等一陣都有位，呢度除咗餃子之外，最出名係芝士蛋糕，淨係叫咗佢哋嘅餃子，加碗麵，冇試佢哋嘅蛋糕，我見好多人都有叫蛋糕食，諗咗一陣都係唔食，因為食完餃子同麵都飽，餃子嘅味道都唔錯，麵就正正常常！

食完麵就行過去深水埗配水庫，其實佢個位置係接近石硤尾，要行一條斜路上去主教山，跟住要行一啲樓梯，第一段路有啲健身設施，有啲老人家喺度做運動，可能因為呢個位置係比較近石硤尾邨，行一小段路之後會見到有個位擺咗好多佛像，記憶中曾經好似有人介紹過，好多人可能搬屋或者親人去世冇人供奉，就將屋企嘅佛像擺喺呢度，所以有好多唔同嘅佛像，呢度亦都有預備咗香枝俾人上香，繼續順路行都係樓梯，而喺每個平路嘅位置，都會出現一兩張好殘舊嘅乒乓波枱！🤔🤔 唔見有人打乒乓波，波枱上亦都鋪滿晒塵，有點詭異😅

前後行咗大約都有2-3百級樓梯，終於去到配水庫嘅入口，呢度有個牌顯示入場人數限制100個，而家有幾多個入咗去，可能初初呢度開嘅時候好多人嚟，所以有限制，而家過咗一段時間就冇咁多人，不過如果人多嘅時候，上到嚟先見到個牌，就要等吓，不過我見佢呢度都有個位置係俾人坐嘅，可能就係for人地坐低休息或者等吓，去到配水庫再要落樓梯去睇，地方唔算好大，有少少告示牌，同埋有啲講解嘅說明，我去到嘅時候大概有40人左右，四圍睇吓影吓相，跟住就走，行第二條路落返去，去到中間左右就行返之前上嚟嗰啲樓梯，又會經過嗰啲佛像，沿路落返去石硤尾邨！本來想去附近嗰間日昇度買韭菜餅，不過佢今日冇開，上次在土瓜灣食過，知道佢喺附近開咗分店，由石硤尾行過去太子呢段路，會經過佢間舖，可惜今日冇開食唔到韭菜餅！

行到去太子，就去花墟行咗個圈，而家花墟唔俾擺啲花出嚟路邊，係好行咗好多，不過就會覺得少咗好多選擇，同埋要入去人哋舖頭先至睇到有咩揀，我就冇咩睇啱，呢度啲花都幾平，不過好似話而家大陸都可以淘返香港，仲要平好多，我諗對呢度影響都大，尤其是情人節呢啲節日！

跟住行過去花園街，睇最近好Hit嘅抹手布，我之前買咗一條係一杯咖啡圖案，知道呢度有一檔賣香港情懷嘅抹手布，係雞蛋仔、蛋撻、電車之類嘅圖案，去到見冇呢啲款式，不過就有碌柚葉、賀年圖案，不過聽到店員話晏少少有貨返，所以轉頭再過去睇，行過啲見到有另一檔，不過賣啲款式都好唔同，多數都係賀年主題，仲要平少少，頭先嗰檔$50 四塊，呢檔只係$10 一塊，不過圖案就冇咁靚，轉頭返去果然返咗少少貨，係四款車款，分別係富豪雪糕車、叮叮、郵政局車、紅色的士，佢可以$25買兩塊，所以我買咗雪糕車同叮叮，因為我唔鍾意的士，郵政局車又太大塊，見佢可以買兩塊，所以就唔買兩塊就算，因為屋企已經有咖啡同埋哈利波特嘅朱古力蛙😅 可惜冇雞蛋仔同蛋撻，不過店員透露佢哋會陸續有貨返，同埋年宵市場會有得賣🤭